ಹೆಣ್ಣು ಶಿಶುಗಳ ಮಾರಾಟ : ದತ್ತಕ ಕಾಯ್ದೆಗೆ ತಿದ್ದುಪಡಿ ನಿರ್ಧಾರ

ಬೆಂಗಳೂರು : ಮಕ್ಕಳ ಮಾರಾಟ ಹಾಗೂ ಅಕ್ರಮ ದತ್ತು ಸ್ವೀಕಾರ ತಡೆಗಟ್ಟುವ ಸಲುವಾಗಿ ಕಾನೂನನ್ನು ಬಲಪಡಿಸಲು ದತ್ತಕ ಕಾಯಿದೆಗೆ ತಿದ್ದುಪಡಿ ತರುವ ಮಸೂದೆಯಾಂದನ್ನು ಮುಂದಿನ ವಿಧಾನಸಭೆ ಅಧಿವೇಶನದಲ್ಲಿ ಮಂಡಿಸಲು ರಾಜ್ಯ ಸರಕಾರ ನಿರ್ಧರಿಸಿದೆ. ಈ ವಿಷಯವನ್ನು ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಸಚಿವೆ ಮೋಟಮ್ಮ ತಿಳಿಸಿದ್ದಾರೆ.

ಉತ್ತರ ಕರ್ನಾಟಕ ಪ್ರದೇಶದಲ್ಲಿ ಅದರಲ್ಲೂ ಚಿಂಚೋಳಿ ಸುತ್ತಮುತ್ತ ನಡೆದಿದೆ ಎನ್ನಲಾದ ಹೆಣ್ಣು ಶಿಶುಗಳ ಮಾರಾಟ ಹಾಗೂ ಅಕ್ರಮ ದತ್ತು ಸ್ವೀಕಾರ ಪ್ರಕರಣಗಳ ಹಿನ್ನೆಲೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಅವರು ಹೇಳಿದರು. ಸರಕಾರೇತರ ಸಂಸ್ಥೆಗಳು ಮಕ್ಕಳನ್ನು ತಮ್ಮ ಸಂಸ್ಥೆಗೆ ಸೇರಿಸಿಕೊಳ್ಳಲು ಇನ್ನು ಮುಂದೆ ಸರಕಾರ ಕೆಲವು ನಿರ್ಬಂಧಗಳನ್ನು ಹೇರಲಿದೆ ಎಂದೂ ತಿಳಿಸಿದರು.

ಪೊಷಕರಿಗೂ ಶಿಕ್ಷೆ : ಚಿಂಚೋಳಿ ತಾಲೂಕಿನ ತಾಂಡಾಗಳಲ್ಲಿ ನಡೆದ ಹೆಣ್ಣು ಶಿಶುಗಳ ಮಾರಾಟ ಪ್ರಕರಣದಲ್ಲಿ ಶಿಶುಗಳನ್ನು ಮಾರಲು ಯಾರೂ ಬಲವಂತ ಮಾಡಿಲ್ಲ. ಪೋಷಕರೇ ತಮ್ಮ ಮಕ್ಕಳನ್ನು ಮಾರಿದ್ದಾರೆ. ಮಕ್ಕಳನ್ನು ಕೊಳ್ಳುವುದು ಹೇಗೆ ಶಿಕ್ಷಾರ್ಹವೋ, ಮಾರುವುದೂ ಕೂಡ ಅಪರಾಧವೆ. ಹೀಗಾಗಿ ಮಕ್ಕಳನ್ನು ಮಾರುವ ಪೋಷಕರನ್ನೂ ಶಿಕ್ಷಿಸಬೇಕಾಗಿದೆ ಎಂದು ಅವರು ಹೇಳಿದರು.

ಮಕ್ಕಳನ್ನು ದತ್ತು ಪಡೆಯುವುದು ಇತ್ತೀಚಿನ ದಿನದಲ್ಲಿ ಒಂದು ದಂದೆಯಾಗಿ ಹೋಗಿದೆ. ಪಾಲಕರು ತಮ್ಮ ಮಕ್ಕಳನ್ನು ಬಡತನ ಬೇಗೆ ತಾಳಲಾರದೆ, ಇಲ್ಲವೇ ಮಗು ಹುಟ್ಟಿದ ಕೂಡಲೇ ತಾಯಿ ಮೃತಪಟ್ಟು, ಮಕ್ಕಳನ್ನು ಸಾಕಲಾರದ ಸ್ಥಿತಿ ನಿರ್ಮಾಣವಾದಾಗ ಮಾರಾಟ ಮಾಡಿದ್ದಾರೆ ಎಂದು ವರದಿಗಳಿಂದ ತಿಳಿದುಬಂದಿದೆ ಎಂದೂ ಅವರು ಹೇಳಿದರು.

(ಇನ್‌ಫೋ ವರದಿ)

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...