ತೆಂಗು ಬೆಳೆಗಾರರಿಗೆ ಸಿಹಿಸುದ್ದಿ : ಟ್ರಾವೆಲ್‌ ಕಿಟ್‌ನಲ್ಲಿ ಎಳೆನೀರು

ಬೆಂಗಳೂರು : ಎಳೆನೀರನ್ನು ಸ್ಯಾಶೆಗಳಲ್ಲಿ ಹಾಗೂ ಬಾಟಲ್‌ಗಳಲ್ಲಿ ತುಂಬಿಸಿ ಮಾರುವ ಯೋಜನೆಗೆ ಸದ್ಯದಲ್ಲಿಯೇ ಚಾಲನೆ ದೊರೆಯಲಿದೆ. ಈ ಯೋಜನೆಗೆ ತಕ್ಕ ತಂತ್ರಜ್ಞಾನ ರೂಪುಗೊಂಡ ನಂತರ ಐದು ಉದ್ಯಮಗಳಿಗೆ ಅನುಮತಿ ನೀಡಲು ಕೇಂದ್ರಸರಕಾರ ಒಪ್ಪಿಕೊಂಡಿದೆ.

ತೆಂಗು ಅಭಿವೃದ್ಧಿ ಮಂಡಳಿಯು ರಕ್ಷಣಾ ವಿಭಾಗದ ಆಹಾರ ಸಂಸ್ಕರಣಾ ಪ್ರಯೋಗಾಲಯದ ಸಹಯೋಗದೊಂದಿಗೆ ಎಳೆನೀರನ್ನು ಕ್ಯಾನ್‌ ಮತ್ತು ಪ್ಯಾಕೆಟುಗಳಲ್ಲಿ ಕೆಡದಂತೆ ತುಂಬಿಡುವ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಿದೆ. ಈ ತಂತ್ರಜ್ಞಾನವನ್ನು ಐದು ಉದ್ಯಮಗಳಿಗೆ ಹಸ್ತಾಂತರಿಸಲಾಗಿದ್ದು, ಕರ್ನಾಟದಲ್ಲಿ ಪ್ರತಿದಿನ 10 ಸಾವಿರ ಎಳೆನೀರು ಸಂಸ್ಕರಿಸುವ ಸಾಮರ್ಥ್ಯವುಳ್ಳ 75 ಲಕ್ಷ ರೂ. ವೆಚ್ಚದ ಉದ್ಯಮ ತಲೆಯೆತ್ತಲಿದೆ.

ಕೃಷಿ ಸಚಿವಾಲಯದ ಪ್ರಕಾರ ಎಳೆನೀರಿನಲ್ಲು ಸಾಕಷ್ಟು ಪೋಷಕಾಂಶಗಳಿದ್ದು, ಸಕ್ಕರೆ, ಖನಿಜಾಂಶ, ವಿಟಾಮಿನ್‌, ಪ್ರೋಟೀನ್‌ಗಳ ಜೊತೆಗೆ ಸಣ್ಣ ಪ್ರಮಾಣದಲ್ಲಿ ಕಿಣ್ವಗಳೂ ಇರುವುದು ಕಂಡು ಬಂದಿದೆ. ಈ ಯೋಜನೆಯಿಂದಾಗಿ ಪ್ರಸ್ತುತ ಎಳೆನೀರು ಸಂಸ್ಕರಣೆಯಿಂದ ತೆಂಗು ಬೆಳೆಗಾರರು ಎದುರಿಸುತ್ತಿದ್ದ ಮಾರುಕಟ್ಟೆ ಸಮಸ್ಯೆಗೆ ಪರಿಹಾರ ಸಿಗಲಿದೆ.

(ಇನ್ಫೋ ವಾರ್ತೆ)