ಮಹಾರಾಷ್ಟ್ರದಿಂದ ಭೀಮಾ ನದಿಗೆ ಶನಿವಾರ ನೀರು ಬಿಡುಗಡೆ?

ಬಿಜಾಪುರ : ನೀರಿಲ್ಲದೆ ಒಣಗಿಹ ಭೀಮಾನದಿಗೆ ಉಜ್ಜಿನಿ ಜಲಾಶಯದಿಂದ ನೀರು ಬಿಡಲು ಮಹಾರಾಷ್ಟ್ರ ಸರಕಾರ ಸಮ್ಮತಿಸಿದ್ದು, ಶನಿವಾರ ಸಂಜೆಯ ವೇಳೆಗೆ ನದಿಗೆ ನೀರು ಹರಿದುಬರುವ ಸಾಧ್ಯತೆ ಇದೆ. ಈ ವಿಷಯವನ್ನು ಜಿಲ್ಲಾ ಉಸ್ತುವಾರಿ ಸಚಿವ ಕಾಶಪ್ಪನವರ್‌ ತಿಳಿಸಿದ್ದಾರೆ.

ಈಗಾಗಲೇ ಉಜ್ಜಿನಿ ಜಲಾಶಯದಿಂದ ನೀರು ಬಿಡಲಾಗಿದ್ದು, ಅದನ್ನು ಸಿರನಾಳ - ಔಜ್‌ ಬ್ಯಾರೇಜ್‌ನಲ್ಲಿ ಸಂಗ್ರಹಿಸಲಾಗಿದೆ. ಈ ಜಲಾಶಯದ ಗೇಟ್‌ ತೆರೆದು, ಭೀಮಾ ನದಿಗೆ ನೀರು ಬಿಡುವ ಸಂಬಂಧ ಮಹಾರಾಷ್ಟ್ರ ಸಚಿವ ಆನಂದರಾವ್‌ ದೇವಕತೆ ಅವರು ಶನಿವಾರ ಬೆಳಗ್ಗೆ 11 ಗಂಟೆಗೆ ಸೊಲ್ಲಾಪುರದಲ್ಲಿ ಅಧಿಕಾರಿಗಳ ಸಭೆ ಕರೆದಿದ್ದು, ಜಲಾಶಯದಿಂದ ಎಷ್ಟು ನೀರು ಹೊರಬಿಡಬೇಕು ಎಂಬ ಬಗ್ಗೆ ಚರ್ಚೆ ನಡೆಸಲಿದ್ದಾರೆ.

ನೀರಿಲ್ಲದೆ, ಭೀಮಾ ನದಿ ತೀರದ ಜನ - ಜಾನುವಾರುಗಳು ಪಡುತ್ತಿರುವ ಸಂಕಟವನ್ನು ನಿವಾರಿಸಲು, ಮಾನವೀಯ ದೃಷ್ಟಿಯಿಂದ ನೀರು ಬಿಡಲು ಒಪ್ಪಿರುವ ಮಹಾರಾಷ್ಟ್ರ ಸರಕಾರ ಶನಿವಾರ ಮಧ್ಯಾಹ್ನ 1 ಗಂಟೆ ಹೊತ್ತಿಗೆ ಜಲಾಶಯದ ಗೇಟ್‌ ತೆರೆದು ರಾಜ್ಯಕ್ಕೆ ನೀರು ಹರಿಸಲಿದೆ. ಈ ಸಂಬಂಧ ಆನಂದರಾವ್‌ ದೇವಕತೆ ಹಾಗೂ ಕಾಶಪ್ಪನವರ್‌ ಶುಕ್ರವಾರ ಸಮಾಲೋಚನೆ ನಡೆಸಿದ್ದಾರೆ.

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...