ಬೆಂಗಳೂರಿನಲ್ಲಿ ಅಂಗವಿಕಲರಿಗೆ ಕಾನೂನು ಮಾರ್ಗದರ್ಶಿ ಘಟಕ

ಬೆಂಗಳೂರು : ಅಂಗವಿಕಲರಿಗೆ ಅಗತ್ಯವಾದ ಕಾನೂನು ನೆರವು ಹಾಗೂ ಮಾರ್ಗದರ್ಶನ ನೀಡುವ ಕಾನೂನು ಘಟಕ ಶನಿವಾರದಿಂದ ನಗರದಲ್ಲಿ ಕಾರ್ಯಾರಂಭ ಮಾಡಲಿದೆ.

ಆಯುಕ್ತರ ಕಚೇರಿ ಅಂಗವಿಕಲರ ಅಧಿನಿಯಮವು ಪರ್ಯಾಯ ಕಾನೂನು ವೇದಿಕೆ ಸಹಕಾರದೊಂದಿಗೆ ನೂತನ ಘಟಕವು ಕಾರ್ಯ ನಿರ್ವಹಿಸಲಿದ್ದು, ಪ್ರಸ್ತುತ ಜಾರಿಯಲ್ಲಿರುವ ಅಂಗವಿಕಲರ ಅಧಿನಿಯಮದಂತೆ ಸಮಾನ ಅವಕಾಶ, ಹಕ್ಕುಗಳ ಸಂರಕ್ಷಣೆ ಮತ್ತು ಪೂರ್ಣ ಭಾಗವಹಿಸುವಿಕೆ ನಿಟ್ಟಿನಲ್ಲಿ ಕಾರ್ಯ ನಿರ್ವಹಿಸಲಿದೆ. ಆಯುಕ್ತರ ಕಚೇರಿ ಅಂಗವಿಕಲರ ಅಧಿನಿಯಮದ ಸಹಾಯಕ ಪ್ರದೀಪ್‌ ಕುಮಾರ್‌ ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ಈ ವಿಷಯವನ್ನು ತಿಳಿಸಿದರು.

ಪ್ರತಿ ಶನಿವಾರ ಮಧ್ಯಾಹ್ನ 2 ರಿಂದ 5 ರವರೆಗೆ ಕಾಕ್ಸ್‌ಟೌನ್‌ನಲ್ಲಿರುವ ಆಯುಕ್ತ ರ ಕಚೇರಿಯಿಂದ ಅಂಗವಿಕಲರು ಯಾವುದೇ ರೀತಿಯ ಕಾನೂನು ನೆರವನ್ನು ಪಡೆಯಬಗಹುದಾಗಿದೆ. ಅಂಗವಿಕಲ ಸಮುದಾಯಕ್ಕೆ ಸಾರ್ವಜನಿಕ ಸೇವೆಗಳು ವಿಳಂಬವಿಲ್ಲದಂತೆ ತಲುಪುವಲ್ಲಿ ಘಟಕ ನಿಗಾ ವಹಿಸುವುದೆಂದು ಅವರು ಹೇಳಿದರು. ಕಾನೂನು ಸಲಹೆ ನೀಡಲು ಘಟಕ ಯಾವುದೇ ಶುಲ್ಕ ಪಡೆಯುವುದಿಲ್ಲ .

1991 ರ ಜನಗಣತಿಯಂತೆ ರಾಜ್ಯದಲ್ಲಿ 3 ಲಕ್ಷ 57 ಸಾವಿರ ಅಂಗವಿಕಲರಿದ್ದು , ಪ್ರಸ್ತುತ ಅವರ ಸಂಖ್ಯೆ ಇನ್ನಷ್ಟು ಹೆಚ್ಚಾಗಿದೆ. ಪ್ರಾರಂಭದಲ್ಲಿ ಬೆಂಗಳೂರಿನಲ್ಲಿ ಮಾತ್ರ ಸ್ಥಾಪಿಸಲಾಗಿರುವ ಘಟಕವನ್ನು ನಂತರದ ದಿನಗಳಲ್ಲಿ ಜಿಲ್ಲಾ , ತಾಲ್ಲೂಕು ಕೇಂದ್ರಗಳಿಗೂ ವಿಸ್ತರಿಸಲು ಉದ್ದೇಶಿಸಲಾಗಿದೆ ಎಂದು ಪ್ರದೀಪ್‌ ಕುಮಾರ್‌ ಹೇಳಿದರು. ಹೆಚ್ಚಿನ ಮಾಹಿತಿ ಅಥವಾ ನೆರವು ಪಡೆಯಲು ಬಯಸುವವರು 080-5482639, 080-5482641 ದೂರವಾಣಿ ಸಂಖ್ಯೆಗಳನ್ನು ಸಂಪರ್ಕಿಸಬಹುದು.

(ಇನ್ಫೋ ವಾರ್ತೆ)