ಬೆಂಗಳೂರು : ಬೈವಾಟರ್‌ನಿಂದ ನೀರುಯೋಜನೆಗೆ ಮರುಜೀವ

ಬೆಂಗಳೂರು : ಪ್ರತಿದಿನ ನಗರಕ್ಕೆ 500 ಮಿಲಿಯನ್‌ ಲೀಟರ್‌ ಕಾವೇರಿ ನೀರು ಪೂರೈಸುವ 250 ದಶಲಕ್ಷ ಡಾಲರ್‌ಗಳ ಬೃಹತ್‌ ಯೋಜನೆಯ ಪ್ರಸ್ತಾವನೆಯನ್ನು ಗುರುವಾರ ರಾಜ್ಯ ಸರ್ಕಾರಕ್ಕೆ ಬೈ ವಾಟರ್‌ ಸಂಸ್ಥೆ ಸಲ್ಲಿಸಿದೆ.

ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಅವರನ್ನು ಗುರುವಾರ ಭೇಟಿ ಮಾಡಿದ ಬೈ ವಾಟರ್‌ ಸಂಸ್ಥೆಯ ಮುಖ್ಯಸ್ಥರು ಯೋಜನೆಗೆ ಸಂಬಂಧಿಸಿದ ಪರಿಷ್ಕೃತ ಪ್ರಸ್ತಾವನೆಯನ್ನು ರಾಜ್ಯ ಸರ್ಕಾರದ ಮುಂದಿಟ್ಟರು. ಈ ಸಂದರ್ಭದಲ್ಲಿ ಸಂಪುಟದ ಹಿರಿಯ ಸಚಿವರು ಹಾಜರಿದ್ದರು. ವಾಣಿಜ್ಯೋದ್ದೇಶಕ್ಕಾಗಿ ಕೈಗಾರಿಕೆಗಳು ಬಳಸುವ ನೀರಿನ ದರ ಹಾಗೂ ನಾಗರಿಕರು ಬಳಸುವ ನೀರಿನ ದರಕ್ಕೆ ವ್ಯತ್ಯಾಸವನ್ನು ಹೊಸ ಪ್ರಸ್ತಾವನೆ ಒಳಗೊಂಡಿದೆ.

ಪ್ರಸ್ತಾವನೆ ಸಲ್ಲಿಕೆಯ ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದ ಬೈ ವಾಟರ್‌ ಸಂಸ್ಥೆಯ ಅಧ್ಯಕ್ಷ ಎಡ್ರಿಯನ್‌-ಇ- ವೈಟ್‌ ಹೊಸ ಪ್ರಸ್ತಾವನೆ ಹೆಚ್ಚು ಪಾರದರ್ಶಕ ಹಾಗೂ ಜನತೆಗೆ ಅನುಕೂಲಕರವಾಗಿದೆ ಎಂದರು. ಸಂಸ್ಥೆಯು ಸರ್ಕಾರಕ್ಕೆ ಯಾವುದೇ ನಿಬಂಧನೆಗಳನ್ನು ವಿಧಿಸಿಲ್ಲ . ಸರ್ಕಾರ ಈ ಯೋಜನೆಗೆ ಒಪ್ಪಿದಲ್ಲಿ 90 ದಿನಗಳೊಳಗಾಗಿ ಕಾಮಗಾರಿ ಕೈಗೆತ್ತಿಕೊಳ್ಳುವುದಾಗಿ ಅವರು ಹೇಳಿದರು.

(ಇನ್ಫೋ ವಾರ್ತೆ)