ತಪ್ಪಿಸಿಕೊಂಡ ಮಕ್ಕಳ ಪತ್ತೆಗೆ ರೋಟರಿ ಕ್ಲಬ್‌ ವೆಬ್‌ಸೈಟ್‌ ನೆರವು

ಬೆಂಗಳೂರು : ಆಕಾಶವಾಣಿ ಹಾಗೂ ದೂರದರ್ಶನಗಳು ಸಂಜೆಯ ವೇಳೆ ಕಾಣೆಯಾದವರ ಬಗ್ಗೆ ಪ್ರಕಟಣೆ ನೀಡುವುದನ್ನು ನೀವು ಕೇಳಿದ್ದೀರಿ, ನೋಡಿದ್ದೀರಿ. ತಂದೆ ತಾಯಿಗಳು ಸ್ಪಲ್ಪ ಬೈದರೂ ಸಾಕು ಸೂಕ್ಷ್ಮ ಮನಸ್ಸಿನ ಕೆಲವು ಮಕ್ಕಳು ಮನೆ ಬಿಟ್ಟು ಹೋಗಿಬಿಡುತ್ತಾರೆ. ಹೆತ್ತವರು ಪರಿತಪಿಸುತ್ತಾರೆ.

ಇನ್ನು ಕೆಲವು ಬಾರಿ ಹಣದಾಸೆಗೆ ದುಷ್ಕರ್ಮಿಗಳು ಮಕ್ಕಳನ್ನು ಅಪಹರಿಸುತ್ತಾರೆ. ಹೀಗೆ ಕಾಣೆಯಾದ ನೂರಾರು ಮಕ್ಕಳನ್ನು ತಾಯಿಯ ಮಡಿಲಿಗೆ ಸೇರಿಸಿರುವ ಸಂಸ್ಥೆ ಇಂದೋರ್‌ ಮೂಲದ ನ್ಯಾಷನಲ್‌ ಸೆಂಟರ್‌ ಫಾರ್‌ ಮಿಸ್ಸಿಂಗ್‌ ಚಿಲ್ಡ್ರನ್ಸ್‌ (ಎನ್‌ಸಿಎಂಸಿ) . ಈ ಸಂಸ್ಥೆ http://www.missingindianchildren.com/ ಎಂಬ ವೆಬ್‌ಸೈಟನ್ನೂ ಹೊಂದಿದೆ.

ಕಾಣೆಯಾದ ಮಕ್ಕಳ ಭಾವಚಿತ್ರ, ಚಹರೆ, ವಿವರಗಳು ಈ ಸೈಟಿನಲ್ಲಿರುತ್ತದೆ. ಮಗು ಕಾಣೆಯಾದಾಗ ಪಾಲಕರು ಮಗುವಿನ ಭಾವಚಿತ್ರ ಹಾಗೂ ವಿವರಗಳನ್ನು ಈ ಸೈಟ್‌ನಲ್ಲಿ ಉಚಿತವಾಗಿ ನೋಂದಾಯಿಸಬಹುದಾಗಿದೆ. ಸೈಟಿಗೆ ಭೇಟಿ ನೀಡುವ ಸ್ವಯಂಸೇವಕರು ಹಾಗೂ ಸಾರ್ವಜನಿಕರು ಮಕ್ಕಳ ಪತ್ತೆಗೆ ನೆರವಾಗುತ್ತಾರೆ. ಇತ್ತೀಚೆಗೆ ಭಾರಿ ಸುದ್ದಿ ಮಾಡಿದ ಮಕ್ಕಳ ಮಾರಾಟ ಜಾಲದ ಪ್ರಸಂಗದಲ್ಲೂ ಈ ಸಂಸ್ಥೆ ನೆರವಿಗೆ ಬಂದಿತ್ತು.

ಈಗ ಬೆಂಗಳೂರು ರೋಟರಿ ಸಂಸ್ಥೆ ಕೂಡ ಬೆಂಗಳೂರು ಪೊಲೀಸ್‌ ಕಮೀಷನರ್‌ ಕಚೇರಿ ಮತ್ತು ಮಕ್ಕಳ ಸಹಾಯವಾಣಿಯ ನೆರವು ಪಡೆದು ಇಂತಹದೇ ಒಂದು ವೆಬ್‌ಸೈಟನ್ನು ಆರಂಭಿಸಿದೆ. http://www.missingkidsindia.org/ ಮೇ 7ರಂದು ಈ ವೆಬ್‌ಸೈಟನ್ನು ಉದ್ಘಾಟಿಸಲಾಯಿತು. ಮಕ್ಕಳ ಮನೆ ಬಿಟ್ಟು ಹೋಗಲು ಕಾರಣಗಳೇನು? ಎಂಬ ಬಗ್ಗೆ ಲೇಖನಗಳೂ ಈ ವೆಬ್‌ಸೈಟ್‌ನಲ್ಲಿದೆ. ತಪ್ಪಿಸಿಕೊಂಡಿರುವ ಮಕ್ಕಳು ಅಕಸ್ಮಾತ್‌ ನಿಮಗೆ ಸಿಕ್ಕರೆ, ಆ ಮಕ್ಕಳ ವಿವರಗಳನ್ನು ಈ ಸೈಟ್‌ನಲ್ಲಿ ದಾಖಲಿಸಿ, ಮಗುವಿನ ಪಾಲಕರ ಪತ್ತೆಗೂ ನೆರವು ಪಡೆಯಬಹುದಾಗಿದೆ. ತಪ್ಪಿಸಿಕೊಂಡ ಹತ್ತಾರು ಮಕ್ಕಳ ವಿವರ ಈ ಹೊತ್ತು ಈ ವೆಬ್‌ಸೈಟಲ್ಲಿದೆ.