ಎಚ್‌ಡಿಎಫ್‌ಸಿಯಿಂದ ಒಂದೇ ಕಂತು ಪಾವತಿಸುವ ಜೀವವಿಮೆ

ಬೆಂಗಳೂರು : ಎಚ್‌.ಡಿ.ಎಫ್‌.ಸಿ. ಸ್ಟಾಂಡರ್ಡ್‌ ಜೀವ ವಿಮಾ ಸಂಸ್ಥೆಯು ಜೀವ ವಿಮೇತರ ವಿಮಾ ಕ್ಷೇತ್ರಕ್ಕೆ ಪ್ರವೇಶಿಸುವ ಬಗ್ಗೆ ಮುಂದಿನ ಮೂರು ಅಥವಾ ನಾಲ್ಕು ತಿಂಗಳ ಅವಧಿಯಲ್ಲಿ ನಿರ್ಧಾರ ಪ್ರಕಟಿಸಲಿದೆ.

ಈ ವಿಷಯವನ್ನು ಸಂಸ್ಥೆಯ ಅಧ್ಯಕ್ಷ ದೀಪಕ್‌ ಪಾರೇಖ್‌ ಬುಧವಾರ ಬೆಂಗಳೂರಿನಲ್ಲಿ ಮಾಧ್ಯಮ ಪ್ರತಿನಿಧಿಗಳಿಗೆ ತಿಳಿಸಿದರು. ಈ ಸಂಬಂಧ ಸಹ ಭಾಗಿತ್ವಕ್ಕಾಗಿ ತಮ್ಮ ಸಂಸ್ಥೆಯು ಅಮೆರಿಕಾ ಹಾಗೂ ಏಷ್ಯಾದ ಎರಡು ವಿದೇಶೀ ಕಂಪನಿಗಳೊಂದಿಗೆ ಮಾತುಕತೆ ನಡೆಸಿದೆ ಎಂದೂ ಅವರು ಹೇಳಿದರು. ಜೀವ ವಿಮಾ ಕ್ಷೇತ್ರದಲ್ಲಿರುವ ಅವಕಾಶಗಳನ್ನು ಬಳಸಿಕೊಳ್ಳಲು ಎಚ್‌ಡಿಎಫ್‌ಸಿ ಪ್ರಥಮ ಆದ್ಯತೆ ನೀಡಲಿದೆ ಎಂದರು.

ಬೆಂಗಳೂರಿನಲ್ಲಿ ಬುಧವಾರ ಕಂಪನಿಯು ಕಾರ್ಯಾರಂಭ ಮಾಡಿದ ಸಂದರ್ಭದಲ್ಲಿ ಜೀವಿತಾವಧಿಗೆ ಒಂದೇ ಕಂತಿನ ಪ್ರೀಮಿಯಂ ಪಾವತಿಸುವ ಕಂಪನಿಯ 15ನೇ ಹೊಸ ಯೋಜನೆಗಳನ್ನು ಪಾರೇಖ್‌ ಪ್ರಕಟಿಸಿದರು. ಕಂಪನಿ ಗ್ರಾಹಕರಿಗೆ ನೀಡುತ್ತಿರುವ ಫ್ಲೆಕ್ಸಿಬಲ್‌ ಯೋಜನೆಗಳಲ್ಲಿ ಇದೂ ಒಂದಾಗಿದ್ದು, ದೀರ್ಘಾವಧಿವರೆಗೆ 25 ಸಾವಿರ ರುಪಾಯಿಗಳಿಂದ 5 ಲಕ್ಷ ರುಪಾಯಿಗಳ ಮೊತ್ತದವರೆಗೆ ಜೀವವಿಮೆ ಮಾಡಿಸಲು ಈ ಯೋಜನೆಯಲ್ಲಿ ಅವಕಾಶ ಇದೆ.

ಸಂಸ್ಥೆಯು ಒಟ್ಟಾರೆ 160 ಕೋಟಿ ರುಪಾಯಿಗಳ ಈಕ್ವಿಟಿ ಹೊಂದಿದ್ದು, ಅದರಲ್ಲಿ ಕಂಪನಿಯ ವಿದೇಶೀ ಪಾಲುದಾರ ಸಂಸ್ಥೆಯಾದ ಸಾಂಡರ್ಡ್‌ ಲೈಫ್‌ನ ಪಾಲು 30 ಕೋಟಿ ರುಪಾಯಿಗಳಾಗಿವೆ.

(ಯು.ಎನ್‌.ಐ)