ಎಣ್ಣೆ ಹೊಳೆನೀರು ಕಲುಷಿತಗೊಂಡು ಲಕ್ಷಕ್ಕೂಹೆಚ್ಚು ಮೀನು ಸಾವು

ಮೈಸೂರು : ಮಂಡಕಳ್ಳಿ ಸಮೀಪದ ಎಣ್ಣೆ ಹೊಳೆ ಕೆರೆಯಲ್ಲಿನ ನೀರು ಕಲುಷಿತಗೊಂಡು ಸುಮಾರು ಒಂದು ಲಕ್ಷಕ್ಕೂ ಹೆಚ್ಚು ಮೀನುಗಳು ಸತ್ತಿವೆ.

ಮೈಸೂರು ನಗರದಲ್ಲಿ ಕಳೆದೆರಡು ದಿನಗಳಿಂದ ಬಿದ್ದ ಭಾರೀ ಮಳೆಯಿಂದಾಗಿ ಚರಂಡಿಯ ಕೊಳಚೆ ನೀರು, ಕೆರೆಯನ್ನು ಸೇರಿರುವುದರಿಂದ ಸುಮಾರು 30 ಲಕ್ಷಕ್ಕೂ ಹೆಚ್ಚು ಮೌಲ್ಯದ ಮೀನುಗಳು ಸತ್ತಿವೆ. ನಗರದಿಂದ 12 ಕಿಲೋ ಮೀಟರ್‌ ದೂರದಲ್ಲಿರುವ ಈ ಕೆರೆಯನ್ನು ಮೈಸೂರು ತಾಲ್ಲೂಕು ಮೀನು ಉತ್ಪಾದಕರ, ಮಾರಾಟಗಾರರ ಸಹಕಾರ ಸಂಘಕ್ಕೆ ಗುತ್ತಿಗೆ ನೀಡಲಾಗಿತ್ತು. ಈ ದುರಂತದಿಂದ ಸಂಘದ ಆಶ್ರಯದಲ್ಲಿ ಮೀನು ವೃತ್ತಿಯನ್ನು ಕೈಗೊಂಡಿದ್ದ 200ಕ್ಕೂ ಹೆಚ್ಚು ಕುಟುಂಬಗಳು ಬೀದಿಪಾಲಾಗಿವೆ.

ಚರಂಡಿ ನೀರು ಕೆರೆಯನ್ನು ಸೇರಿದ್ದರಿಂದ, ನೀರಿನಲ್ಲಿ ಉಸಿರಾಡಲು ಆಮ್ಲಜನಕದ ಕೊರತೆಯಿಂದಾಗಿ ಈ ದುರಂತ ಸಂಭವಿಸಿದೆ ಎಂದು ಕರ್ನಾಟಕ ಸಹಕಾರಿ ಮೀನುಗಾರಿಕೆ ಮಹಾಮಂಡಳಿಯ ಜಂಟಿ ನಿರ್ದೇಶಕ ಬಿ.ಕೆ. ಯದುನಾಥನ್‌ ಹೇಳಿದ್ದಾರೆ.

ಎಣ್ಣೆ ಹೊಳೆ ನಗರ ಪಾಲಿಕೆ ವ್ಯಾಪ್ತಿಯಿಂದ ಹೊರಗಿರುವುದರಿಂದ ಈ ಘಟನೆಗೂ ತನಗೂ ಯಾವುದೇ ಸಂಬಂಧವಿಲ್ಲ ಎಂದು ಮೈಸೂರು ಮಹಾನಗರ ಪಾಲಿಕೆ ಹೇಳಿದೆ.

(ಇನ್ಫೋ ವಾರ್ತೆ)