ದೀನ್‌ದಾರ್‌ ಸಂಘಟನೆ ಕಚೇರಿಗಳಿಗೆ ಪೊಲೀಸರಿಂದ ಬೀಗ

ಹೈದರಾಬಾದ್‌ : ಕರ್ನಾಟಕ, ಆಂಧ್ರಪ್ರದೇಶ ಹಾಗೂ ಗೋವಾದಲ್ಲಿ ಕಳೆದ ವರ್ಷ ನಡೆದ ಸರಣಿ ಬಾಂಬ್‌ ಸ್ಫೋಟ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೇಂದ್ರ ಸರಕಾರ ದೀನ್‌ದಾರ್‌ ಅಂಜುಮನ್‌ ಸಂಸ್ಥೆಯನ್ನು ನಿಷೇಧಿಸಿರುವ ಹಿನ್ನೆಲೆಯಲ್ಲಿ ಆಂಧ್ರ ಪ್ರದೇಶ ಪೊಲೀಸರು ದೀನ್‌ದಾರ್‌ ಸಂಘಟನೆಗಳ ಕಚೇರಿಗಳಿಗೆ ಬೀಗಮುದ್ರೆ ಹಾಕುತ್ತಿದ್ದಾರೆ.

ಆಂಧ್ರಪ್ರದೇಶದಲ್ಲೇ ಹೆಚ್ಚಾಗಿ ಕಾರ್ಯಚಟುವಟಿಕೆ ಹೊಂದಿರುವ ದೀನ್‌ದಾರ್‌ ಅಂಜುಮನ್‌ ಸಂಘಟನೆ ಹೈದರಾಬಾದ್‌ನಲ್ಲಿ ಹೊಂದಿರುವ ಎಲ್ಲ ಕಚೇರಿಗಳಿಗೆ ಪೊಲೀಸರು ಸೋಮವಾರ ಬೀಗ ಹಾಕಿ, ಸೀಲ್‌ ಮಾಡಿದರು. ದೀನ್‌ದಾರ್‌ ಸಂಘಟನೆಗೆ ನಿಷೇಧ ಹೇರಿರುವ ಕಾರಣ ಇನ್ನು ಮುಂದೆ ರಾಜ್ಯದಲ್ಲಿ ಯಾವುದೇ ರೀತಿಯ ಚಟುವಟಿಕೆ ನಡೆಸಲು ಅವಕಾಶ ನೀಡುವುದಿಲ್ಲ ಎಂದು ಅಸಿಸ್ಟೆಂಟ್‌ ಪೊಲೀಸ್‌ ಕಮೀಷನರ್‌ ಎನ್‌. ಶ್ರೀನಿವಾಸ್‌ ತಿಳಿಸಿದ್ದಾರೆ.

ಹೈದರಾಬಾದ್‌ನ ಆಸೀಫ್‌ ನಗರದಲ್ಲಿ ಸುಮಾರು 3 ಎಕರೆ ಪ್ರದೇಶದಲ್ಲಿ ದೀನ್‌ದಾರ್‌ ಹೊಂದಿರುವ ಕಟ್ಟಡ, ಗ್ರಂಥಾಲಯ ಹಾಗೂ ಕಚೇರಿಗೆ ಬೀಗಮುದ್ರೆ ಹಾಕಲಾಗಿದೆ ಎಂದೂ ಅವರು ತಿಳಿಸಿದರು. ಆದರೆ, ಈ 3 ಎಕರೆ ಪ್ರದೇಶದಲ್ಲಿರುವ ಮನೆಗಳಲ್ಲಿ ಸಂಘಟನೆಗೆ ಸೇರಿದ ಕೆಲವರು ವಾಸ ಮಾಡುತ್ತಿದ್ದು, ಮನೆಗಳಿಗೆ ಬೀಗ ಹಾಕಲಾಗಿಲ್ಲ ಎಂದೂ ಅವರು ಸುದ್ದಿಗಾರರಿಗೆ ತಿಳಿಸಿದರು.

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...