ತೆಹಲ್ಕಾ ಸಂಪಾದಕರ ಕೊಲೆ ಯತ್ನ, ಆರು ಮಂದಿಯ ಬಂಧನ

ನವದೆಹಲಿ : ರಕ್ಷಣಾ ವ್ಯವಹಾರ ಹಗರಣವನ್ನು ಬಯಲು ಮಾಡಿದ ತೆಹಲ್ಕಾ ಡಾಟ್‌ ಕಾಮ್‌ನ ಪ್ರಧಾನ ಸಂಪಾದಕ ತರುಣ್‌ ತೇಜಪಾಲ್‌ ಅವರನ್ನು ಹತ್ಯೆ ಮಾಡುವ ಐಎಸ್‌ಐ ಪ್ರಯತ್ನವನ್ನು ದೆಹಲಿ ಪೊಲೀಸರು ವಿಫಲಗೊಳಿಸಿದ್ದು, ಕೊಲೆಗೆ ಯತ್ನಿಸಿದ ಆರು ಮಂದಿಯನ್ನು ಬಂಧಿಸಲಾಗಿದೆ.

ಬಂಧಿತರು ಪಾಕಿಸ್ಥಾನದ ಐಎಸ್‌ಐ ಬೇಹುಗಾರಿಕಾ ಸಂಸ್ಥೆಯ ಬಾಡಿಗೆ ಹಂತಕರೆಂದು ಗುರುತಿಸಲಾಗಿದೆ. ಎರಡು ಎಕೆ- 47 ರೈಫಲ್‌, ಪಿಸ್ತೂಲು ಮತ್ತಿತರ ಶಸ್ತ್ರಾಸ್ತ್ರಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಇನ್‌ಸ್ಪೆಕ್ಟರ್‌ ಮೋಹನ್‌ ಚಂದ್‌ ಶರ್ಮಾ ನೇತೃತ್ವದ ಪೊಲೀಸ್‌ ತಂಡಕ್ಕೆ ಕೊಲೆ ಸಂಚಿನ ಬಗ್ಗೆ ಸುಳಿವು ಸಿಕ್ಕಿತ್ತು. ನೇಪಾಳದಿಂದ ಟಾಟಾ ಸಫಾರಿ ವಾಹನದಲ್ಲಿ ಬಂದ ದುಷ್ಕರ್ಮಿಗಳ ತಂಡವನ್ನು ಜಹಾಂಗೀರ್‌ ಪುರಿ ಪ್ರದೇಶದಲ್ಲಿ ಬಂಧಿಸಲಾಯಿತು ಎಂದು ಗುಪ್ತಚರ ವಿಭಾಗದ ಪೊಲೀಸ್‌ ಆಯುಕ್ತ ಎಸ್‌. ರಾಮಕೃಷ್ಣನ್‌ ಹೇಳಿದ್ದಾರೆ.

ರಕ್ಷಣಾ ವ್ಯವಹಾರ ಹಗರಣ ಬಯಲು ಮಾಡಿದ ಕೆಲ ದಿನಗಳಲ್ಲಿಯೇ ತೇಜಪಾಲ್‌ ಅವರಿಗೆ ಝಡ್‌ ಫಸ್ಟ್‌ ಸೆಕ್ಯುರಿಟಿ ಒದಗಿಸಲಾಗಿತ್ತು. ಪ್ರಸ್ತುತ ನಡೆದ ಕೊಲೆ ಯತ್ನ, ದೇಶದಲ್ಲಿ ರಾಜಕೀಯ ಅಸ್ತಿರತೆ ಹುಟ್ಟಿಸುವ ಮತ್ತು ಸರಕಾರದ ಘನತೆಗೆ ಕುಂದು ತರುವ ಉದ್ದೇಶವನ್ನೊಳಗೊಂಡಿತ್ತು ಎಂದು ದೆಹಲಿ ಪೊಲೀಸರು ಹೇಳಿದ್ದಾರೆ.

(ಇನ್ಫೋ ವಾರ್ತೆ)

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...