ಕೆನರಾಬ್ಯಾಂಕ್‌ನಲ್ಲಿ ಹಿರಿಯ ನಾಗರಿಕರಿಡುವಠೇವಣಿಗೆ ಹೆಚ್ಚಿನ ಬಡ್ಡಿ

ಬೆಂಗಳೂರು : ಸರಕಾರ ಹಿರಿಯ ನಾಗರಿಕರಿಗೆ ಹಲವು ಸೌಲಭ್ಯಗಳನ್ನು ಕಲ್ಪಿಸಿದೆ. ಈಗ ರಾಷ್ಟ್ರೀಕೃತ ಕೆನರಾಬ್ಯಾಂಕ್‌ ಕೂಡ ವೃದ್ಧರಿಗಾಗಿಯೇ ತತ್‌ಕ್ಷಣದಿಂದಲೇ ಜಾರಿಗೆ ಬರುವ ಆಶಾದಾಯಕವಾದ ಹೊಸ ಯೋಜನೆಯಾಂದನ್ನು ಆರಂಭಿಸಿದೆ.

ತನ್ನ ಬ್ಯಾಂಕ್‌ನ ಯಾವುದೇ ಶಾಖೆಯಲ್ಲಿ ಇನ್ನು ಮುಂದೆ ವೃದ್ಧರು ಇಡುವ ಠೇವಣಿಗೆ ನಿಗದಿತ ಬಡ್ಡಿದರಕ್ಕಿಂತಲೂ ಅರ್ಧ % ಹೆಚ್ಚುವರಿ ಬಡ್ಡಿ ನೀಡುತ್ತದೆ. ಈ ಸೌಲಭ್ಯ 60 ವರ್ಷ ಮೇಲ್ಪಟ್ಟ ವೃದ್ಧರಿಡುವ ಠೇವಣಿಗೆ ಮಾತ್ರ ಅನ್ವಯಿಸುತ್ತದೆ.

15 ದಿನಗಳ ಅವಧಿಯ ಠೇವಣಿಗೆ ಶೇ. 5.25ರಷ್ಟು ಹಾಗೂ ಮೂರು ವರ್ಷದ ಅವಧಿಯ ಠೇವಣಿಗೆ ಶೇ. 9.50ರಷ್ಟು ಬಡ್ಡಿ ನೀಡಲಾಗುವುದು ಎಂದು ಬ್ಯಾಂಕ್‌ನ ಪ್ರಕಟಣೆ ತಿಳಿಸಿದೆ. ವೃದ್ಧರು ಇಡುವ ಠೇವಣಿಯನ್ನು ಸಹ ಇತರ ಠೇವಣಿಗಳಂತೆಯೇ ಪರಿಗಣಿಸಲಾಗುವುದು. ಒಂದು ವೇಳೆ ವೃದ್ಧರು ಇತರರ ಜತೆಗೂಡಿ ಇಡುವ ಠೇವಣಿಗೂ ಕೂಡ ಈ ಹೆಚ್ಚುವರಿ ಬಡ್ಡಿ ದರ ಅನ್ವಯಿಸಲಿದೆ.

ಆದರೆ, ವೃದ್ಧರು ಪ್ರಮುಖ ಠೇವಣಿದಾರರರಾಗಿರಬೇಕು. ಹೆಚ್ಚಿನ ಬಡ್ಡಿ ಪಡೆಯಲಿಚ್ಛಿಸುವ ಠೇವಣಿದಾರರು ತಮ್ಮ ವಯಸ್ಸಿನ ದಾಖಲೆ ಪತ್ರದ ಸಹಿತ ಬ್ಯಾಂಕಿಯ ಯಾವುದೇ ಶಾಖೆಯನ್ನಾದರೂ ಸಂಪರ್ಕಿಸಬಹುದು. ಪಿಂಚಣಿ ಆದೇಶ, ಪಾಸ್‌ಪೋರ್ಟ್‌, ಎಲ್‌.ಐ.ಸಿ ಪಾಲಿಸಿ, ರೇಷನ್‌ಕಾರ್ಡ್‌ಗಳನ್ನು ವಯಸ್ಸಿನ ದಾಖಲೆಗೆ ಪರಿಗಣಿಸಲಾಗುವುದು ಎಂದು ಬ್ಯಾಂಕ್‌ ಪ್ರಕಟಣೆ ತಿಳಿಸಿದೆ.