ತಣ್ಣೀರುಬಾವಿ ಬಾರ್ಜ್‌ ಮೌಂಟೆಡ್‌ ಸ್ಥಾವರದಲ್ಲಿ ತೈಲ ಸೋರಿಕೆ

ಮಂಗಳೂರು : ಮಂಗಳೂರು ಸಮೀಪ ತಣ್ಣೀರು ಬಾವಿಯಲ್ಲಿ ಅಸ್ತಿತ್ವಕ್ಕೆ ಬಂದಿರುವ ರಾಜ್ಯದ ಮೊತ್ತ ಮೊದಲ ಬಾರ್ಜ್‌ ಮೌಂಟೆಡ್‌ ವಿದ್ಯುತ್‌ ಸ್ಥಾವರದಲ್ಲಿ ಗುರುವಾರ ಪೈಪ್‌ ಒಡೆದು ಸಾವಿರಾರು ಲೀಟರ್‌ ತೈಲ ನದಿ ಸೇರಿದ್ದು , ತೀವ್ರ ಜಲಮಾಲಿನ್ಯವುಂಟಾಗಿದೆ.

ಕರಾವಳಿ ನಿಯಂತ್ರಣ ಕಾಯ್ದೆಯನ್ನು ಪೂರ್ಣವಾಗಿ ಉಲ್ಲಂಘಿಸಿ, ಸ್ಥಳೀಯರ ಪ್ರತಿಭಟನೆಯನ್ನು ಗಮನಿಸಿ, ತಣ್ಣೀರು ಬಾವಿಯ ಸುಂದರ ಬೀಚನ್ನು ನಿರ್ನಾಮ ಮಾಡಿ ಅಸ್ತಿತ್ವಕ್ಕೆ ಬಂದಿರುವ ಬಾರ್ಜ್‌ ಮೌಂಟೆಡ್‌ ಉತ್ಪಾದನೆ ಆರಂಭಕ್ಕೆ ಮೊದಲೇ ಜಲ ಮಾಲಿನ್ಯ ಉಂಟುಮಾಡಿರುವುದು ಮೀನುಗಾರರ ಕಂಗೆಡಿಸಿದೆ.

ತಣ್ಣೀರು ಬಾವಿ ಪ್ರದೇಶದಲ್ಲಿ ಗುರುವಾರ ಗುರುಪುರ ನದಿಯಲ್ಲಿ ತೈಲ ತೇಲುತ್ತಿರುವುದು ಪತ್ತೆಯಾಗಿತ್ತು. ನ್ಯಾಫ್ತಾದಿಂದ ವಿದ್ಯುತ್‌ ಉತ್ಪಾದಿಸಲಾಗುವುದು ಎಂದು ಯೋಜನಾ ವರದಿಯಲ್ಲಿ ತಿಳಿಸಿರುವ ಬಾರ್ಜ್‌ ಮೌಂಟೆಡ್‌ ವಿದ್ಯುತ್‌ ಸ್ಥಾವರ , ಆರಂಭದ ಕೆಲ ಕಾಲ ಡೀಸೆಲ್‌ ಬಳಸಿ ವಿದ್ಯುತ್‌ ಉತ್ಪಾದನೆ ಮಾಡಲು ಯೋಚಿಸುತ್ತಿದೆ. ಇದರಿಂದಾಗಿ ಎಚ್‌. ಪಿ. ಸಿ. ಎಲ್‌. ಟ್ಯಾಂಕರ್‌ನಿಂದ ಬಾರ್ಜ್‌ಗೆ ತೈಲ ಸಾಗಿಸುವಾಗ ಪೈಪ್‌ ಒಡೆದು ಸೋರಿಕೆ ಉಂಟಾಗಿದೆ. ಈ ಬಗ್ಗೆ ಕಂಪೆನಿಯಿಂದ ಯಾವುದೇ ಪ್ರತಿಕ್ರಿಯೆ ವ್ಯಕ್ತವಾಗಿಲ್ಲ.

(ಮಂಗಳೂರು ಪ್ರತಿನಿಧಿಯಿಂದ)