ಐಸಿಐಸಿಐಗೆ ಆಘಾತ, ಲಾಭಾಂಶದಲ್ಲಿ ಪ್ರತಿಶತ 55 ರಷ್ಟು ಕುಸಿತ

ಮುಂಬಯಿ : ಮಾರ್ಚ್‌ 31 ಕ್ಕೆ ಕೊನೆಗೊಂಡ ಆರ್ಥಿಕ ವರ್ಷದಲ್ಲಿ ದೇಶದ ಹಿರಿಯ ಹಣಕಾಸು ಸಂಸ್ಥೆಗಳಲ್ಲೊಂದಾದ ಐಸಿಐಸಿಐ ಬ್ಯಾಂಕ್‌ ತನ್ನ ನಿವ್ವಳ ಆದಾಯದಲ್ಲಿ ಭಾರೀ ಕುಸಿತ ಕಾಣುವುದರೊಂದಿಗೆ ಆಘಾತ ಅನುಭವಿಸಿದೆ. ಕಳೆದ ಸಾಲಿನಲ್ಲಿ 1206 ಕೋಟಿ ರುಪಾಯಿ ಲಾಭ ದಾಖಲಿಸಿದ್ದ ಐಸಿಐಸಿಐ ಈ ಸಾಲಿನಲ್ಲಿ 537 ಕೋಟಿ ರು. ಲಾಭ ಗಳಿಸುವುದರೊಂದಿಗೆ ಲಾಭಾಂಶದಲ್ಲಿ ಶೇ. 55 ರಷ್ಟು ಕುಸಿತ ಕಂಡಿದೆ.

ಐಸಿಐಸಿಐ ಆಡಳಿತ ಸಂಸ್ಥೆಯ ನಿರ್ದೇಶಕ ಹಾಗೂ ಸಿಇಓ ಕೆ.ವಿ. ಕಾಮತ್‌ ಸುದ್ದಿಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದ್ದಾರೆ. ಭಾರತೀಯ ರಿಸರ್ವ್‌ ಬ್ಯಾಂಕ್‌ನ ಹೊಸ ಮಾರ್ಗದರ್ಶಿ ಸೂತ್ರಗಳು, ಒಟ್ಟು ಅರ್ಥವ್ಯವಸ್ಥೆಯಲ್ಲಿನ ಕುಸಿತ ಹಾಗೂ ವಿದೇಶಿ ವಿನಿಮಯ ಮಾರುಕಟ್ಟೆಯಲ್ಲಾದ ವ್ಯತ್ಯಯ ಸೇರಿದಂತೆ ವಿವಿಧ ಕಾರಣಗಳಿಂದಾಗಿ ಈ ಕುಸಿತ ಉಂಟಾಗಿದೆ ಎಂದು ಕಾಮತ್‌ ಹೇಳಿದರು.

2000-01 ನೇ ಹಣಕಾಸು ವರ್ಷದ ನಾಲ್ಕನೆಯ ಭಾಗದಲ್ಲಿ ಐಸಿಐಸಿಐ ಒಟ್ಟು 257 ಕೋಟಿ ರುಪಾಯಿ ನಷ್ಟ ಅನುಭವಿಸಿದ್ದು , ಕಳೆದ ವರ್ಷ ಈ ಭಾಗದಲ್ಲಿ ಬ್ಯಾಂಕ್‌ 395 ಕೋಟಿ ರುಪಾಯಿ ಲಾಭ ಗಳಿಸಿತ್ತು .

(ಇನ್ಫೋ ವಾರ್ತೆ)