ಬೀಡಿ ಉದ್ಯಮಕ್ಕೆ ಬೆಂಕಿ ತಗುಲಿಸಿದಸರ್ಕಾರದ ತೆರಿಗೆ ನೀತಿ

ಮಂಗಳೂರು : ರಾಜ್ಯದಲ್ಲಿ ಬೀಡಿಯ ಮೇಲೆ ಶೇ 2ರಷ್ಟು ಪ್ರವೇಶ ತೆರಿಗೆ ವಿಧಿಸಲು ರಾಜ್ಯ ಸರಕಾರ ನಿರ್ಧರಿಸಿದ್ದು, ಇದರಿಂದಾಗಿ ಈಗಾಗಲೇ ಸಂಕಷ್ಟದಲ್ಲಿರುವ ಬೀಡಿ ಉದ್ಯಮ ಅವಸಾನದತ್ತ ತಳ್ಳಲ್ಪಟ್ಟಿದೆ.

ಸರಕಾರ ಬೀಡಿ ಉದ್ಯಮದ ಮೇಲೆ ತೆರಿಗೆ ವಿಧಿಸುವ ನಿರ್ಧಾರವನ್ನು ಹಿಂತೆಗೆದುಕೊಳ್ಳದೇ ಇದ್ದರೆ, ಬೀಡಿ ಉದ್ಯಮಗಳನ್ನೆಲ್ಲ ಮುಚ್ಚಬೇಕಾಗುತ್ತದೆ. ಅಥವಾ ಹೊರರಾಜ್ಯಕ್ಕೆ ವಲಸೆ ಹೋಗಬೇಕಾಗುತ್ತದೆ ಎಂದು ಕರ್ನಾಟಕ ಬೀಡಿ ಕೈಗಾರಿಕೆಗಳ ಸಂಘದ ಗಣಪತಿ ಪೈ ಅಭಿಪ್ರಾಯಪಟ್ಟಿದ್ದಾರೆ.

ಪ್ರವೇಶ ತೆರಿಗೆಯನ್ನು ಹಿಂತೆಗೆದುಕೊಳ್ಳುವಂತೆ ಸರಕಾರಕ್ಕೆ ಈಗಾಗಲೇ ಮನವಿ ಮಾಡಿಕೊಳ್ಳಲಾಗಿದೆ. ಪ್ರವೇಶ ತೆರಿಗೆಯಿಂದ ಬೀಡಿಯ ಮಾರಾಟ ದರವನ್ನು ಹೆಚ್ಚಿಸಬೇಕಾಗುತ್ತದೆ. ಆದರೆ ಹೊರ ರಾಜ್ಯಗಳಲ್ಲಿ, ರಾಜ್ಯಸರಕಾರದ ತೆರಿಗೆ ಇಲ್ಲದೇ ಇರುವುದರಿಂದ ಅಲ್ಲಿ ಕಡಿಮೆ ವೆಚ್ಚದಲ್ಲಿ ಬೀಡಿ ತಯಾರಾಗಿ, ಕಡಿಮೆ ಬೆಲೆಯಲ್ಲಿ ಮಾರುಕಟ್ಟೆಯಲ್ಲಿ ಲಭ್ಯವಿರುತ್ತದೆ. ಹೆಚ್ಚು ಬೆಲೆ ಕೊಟ್ಟು ಕರ್ನಾಟಕದ ಬೀಡಿಯನ್ನು ಯಾರೂ ಕೊಳ್ಳುವುದಿಲ್ಲ ಎಂದು ಪೈ ಹೇಳಿದರು.

ಸರಕಾರ ತನ್ನ ಪ್ರವೇಶ ತೆರಿಗೆ ಹಿಂದೆ ಪಡೆಯದೇ ಇದ್ದರೆ 6 ಲಕ್ಷ ಮಂದಿ ಬೀಡಿ ಕಾರ್ಮಿಕರು ನಿರುದ್ಯೋಗಿಗಳಾಗುತ್ತಾರೆ. ಈ ಅಪಾಯದ ಬಗ್ಗೆ ರಾಜ್ಯ ಸರಕಾರಕ್ಕೆ ಮನವಿ ಮಾಡಿಕೊಡಲು ತೆರಿಗೆ ಸುಧಾರಣಾ ಆಯೋಗದ ಅಧ್ಯಕ್ಷ ವೀರಪ್ಪ ಮೊಯಿಲಿ ಅವರಿಗೆ ಮನವರಿಕೆ ಮಾಡಿಕೊಡಲಾಗಿದೆ ಎಂದು ಗಣಪತಿ ಪೈ ಹೇಳಿದರು.

(ಇನ್ಫೋ ವಾರ್ತೆ)