ಏಷ್ಯಾದ ಅತಿ ದೊಡ್ಡ ಬಡಾವಣೆಯಲ್ಲಿ ವಿಶೇಷ ಸಂಗೀತೋತ್ಸವ

ಬೆಂಗಳೂರು : ಮೇ 13ನೇ ತಾರೀಖು ಜಯನಗರದ ಜೆ. ಎಸ್‌. ಎಸ್‌. ಸಭಾಂಗಣದಲ್ಲೊಂದು ವಿಶೇಷ ಸಂಗೀತ ಉತ್ಸವ. ಐವರು ಶಾಸ್ತ್ರೀಯ ಸಂಗೀತಗಾರರ ಕಲೋತ್ಸವ ಅದು. ಅಲ್ಲಿ ಪಕ್ಕ ವಾದ್ಯ ಕಲಾವಿದರಿರುವುದಿಲ್ಲ. ಆದರೂ ಶಾಸ್ತ್ರೀಯ ಸಂಗೀತಕ್ಕೆ ಅಗತ್ಯವಾದ ವಾದನಗಳ ದನಿ ಕೇಳಲಿದೆ.

ಇದು ಮ್ಯಾಜಿಕ್‌ ಅಲ್ಲ . ರಾಡೆಲ್‌ ವಿದ್ಯುನ್ಮಾನ ಸಂಗೀತ ಉಪಕರಣ ತಯಾರಿಕಾ ಸಂಸ್ಥೆ ತಯಾರಿಸಿರುವ ವಿದ್ಯುನ್ಮಾನ ಸಂಗೀತ ಉಪಕರಣಗಳ ಶೃತಿಪೆಟ್ಟಿಗೆಯನ್ನು ಉಪಯೋಗಿಸಿ, ಸಂಗೀತ ಹೊಮ್ಮಿಸುವರು ಕಲಾವಿದರು. ಸಂಗೀತ ಕಲಾನಿಧಿ ಆರ್‌.ಕೆ.ಶ್ರೀಕಂಠನ್‌ ಸಂಗೀತೋತ್ಸವ ಉದ್ಘಾಟಿಸುವರು. ಕರ್ನಾಟಕದ ಎಂ. ಕೋದಂಡರಾಮ, ಕೇರಳದ ಶಂಕರನ್‌ ನಂಬೂದಿರಿ, ತಮಿಳುನಾಡಿನ ವೀಣೈ ಆರ್‌.ಜಯಂತಿ ಹಾಗೂ ಹೈದರಾಬಾದ್‌ ಸಹೋದರರಾದ ಶೇಷಾಚಾರಿ ಮತ್ತು ರಾಘವಾಚಾರಿ ಉತ್ಸವದಲ್ಲಿ ಹಾಡಲಿರುವ ಸಂಗೀತ ವಿದ್ವಾಂಸರು.

ಪ್ರತಿ ರಾಜ್ಯದ ಕಲಾವಿದರೂ ತಲಾ ಒಂದು ತಾಸು ಸಂಗೀತದ ಸವಿ ಉಣಿಸಲಿದ್ದಾರೆ. ಪಂಡಿತ್‌ ರವಿಶಂಕರ್‌, ಡಾ.ಬಾಲಮುರಳಿ ಕೃಷ್ಣ ಮೊದಲಾದವರು ವಿದ್ಯುನ್ಮಾನ ಸಂಗೀತ ಉಪಕರಣಗಳನ್ನು ಬಳಸಿ ಹಾಡಿದ್ದಾರೆ. ಈ ಶೃತಿಪೆಟ್ಟಿಗೆ ಪಕ್ಕವಾದ್ಯ ಕಲಾವಿದರ ಕೊರತೆಯನ್ನು ತುಂಬುವುದರ ಜೊತೆಗೆ ಶೃತಿಯಲ್ಲಿ ಸಂಗೀತವನ್ನು ಕೆಡಿಸದಂತೆ ರೂಪುಗೊಂಡಿದೆ. ಕಲಾವಿದ ಬಯಸುವ ಯಾವುದೇ ಶೃತಿ ಇದರಲ್ಲಿ ಲಭ್ಯ ಎಂದು ಸಂಸ್ಥೆಯ ವ್ಯವಸ್ಥಾಪಕ ದಂಪತಿಗಳಾದ ಜಿ.ರಾಜ್‌ ನಾರಾಯಣ್‌ ಮತ್ತು ರಾಧಿಕಾ ತಿಳಿಸಿದ್ದಾರೆ.

(ಇನ್ಫೋ ವಾರ್ತೆ)