ಭಾರತದ ವಿರುದ್ಧ ದಿಗ್ಬಂಧನ ವಾಪಸ್ಸಿಗೆ ಕಾತರಿಸುತ್ತಿರುವ ಅಮೆರಿಕ

*ಅಜೀಜ್‌ ಹನೀಫಾವಾಷಿಂಗ್ಟನ್‌ : ಭಾರತದ ವಿರುದ್ಧ ಹೇರಲಾಗಿರುವ ಎಲ್ಲ ವಿಧದ ದಿಗ್ಭಂಧನಗಳನ್ನು ಶೀಘ್ರವೇ ತೆರವುಗೊಳಿಸುವ ಸೂಚನೆಗಳನ್ನು ಅಮೆರಿಕದ ಟ್ರೆಜರಿ ಕಾರ್ಯದರ್ಶಿ ಪಾಲ್‌ ಓ ನೀಲ್‌ ನೀಡಿದ್ದಾರೆಂದು ಭಾರತದ ಹಣಕಾಸು ಸಚಿವ ಯಶವಂತ ಸಿನ್ಹಾ ಹೇಳಿದ್ದಾರೆ.

ವಾಷಿಂಗ್ಟನ್‌ನಲ್ಲಿರುವ ಸಿನ್ಹಾ , ಅಂತರರಾಷ್ಟ್ರೀಯ ಆರ್ಥಿಕ ನಿಧಿ ಮತ್ತು ವಿಶ್ವಬ್ಯಾಂಕ್‌ನ ಸಭೆಗಳಲ್ಲಿ ಭಾಗವಹಿಸಿ ಮಾತನಾಡುತ್ತಿದ್ದರು. ನಮ್ಮ ನಿಲುವು ಅತ್ಯಂತ ಸ್ಪಷ್ಟವಾಗಿದೆ. ಭಾರತದ ವಿರುದ್ಧ ವಿಧಿಸಲಾಗುವ ದಿಗ್ಬಂಧನಗಳು, ಭಾರತಕ್ಕಿಂತ ಹೆಚ್ಚಾಗಿ ಅಮೆರಿಕದ ಹಿತಾಸಕ್ತಿಗೇ ಮಾರಕವಾಗಿರುತ್ತವೆ ಎನ್ನುವುದನ್ನು ಪ್ರಾರಂಭದಿಂದಲೂ ಹೇಳುತ್ತಾ ಬಂದಿದ್ದೇವೆ ಎಂದು ಸಿನ್ಹಾ ಭಾರತದ ನಿಲುವನ್ನು ಬಲವಾಗಿ ಪ್ರತಿಪಾದಿಸಿದರು.

ವಾಸ್ತವವಾಗಿ ದಿಗ್ಭಂಧನವನ್ನು ಸಾಧ್ಯವಾದಷ್ಟು ಬೇಗನೇ ತೆರವು ಮಾಡುವ ಬಗೆಗೆ ಅವರೇ ಆಸಕ್ತಿ ತೋರಿಸಿದ್ದಾರೆ ಎಂದು ಸಿನ್ಹಾ ಹೇಳಿದರು. ಏಪ್ರಿಲ್‌ 6 ರಂದು ಭಾರತದ ವಿದೇಶಾಂಗ ಸಚಿವ ಜಸ್ವಂತ್‌ ಸಿಂಗ್‌ ಅವರೊಂದಿಗಿನ ಸಭೆಯಲ್ಲಿ ಸೆಕ್ರಟರಿ ಆಫ್‌ ದ ಸ್ಟೇಟ್‌ ಕೊಲಿನ್‌ ಪೊವೆಲ್‌ ಅವರು ಕೂಡ ದಿಗ್ಬಂಧನ ತೆರವು ಮಾಡುವ ವಿಷಯವನ್ನು ಪ್ರಸ್ತಾಪಿಸಿದ್ದರು.

ಭಾರತೀಯ ರಾಯಭಾರ ಕಚೇರಿಯಲ್ಲಿ ಸೋಮವಾರ ಸುದ್ದಿಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ಸಿನ್ಹಾ , ಭಾರತದ ವಿರುದ್ಧ ದಿಗ್ಬಂಧನ ತೆರವು ಮಾಡುವ ವಿಷಯವನ್ನು ಪಾಲ್‌ ಓ ನೀಲ್‌ ಅವರೊಂದಿಗೆ ತಾವಾಗಿಯೇ ಪ್ರಸ್ತಾಪಿಸಲಿಲ್ಲ . ಆದರೆ, ಅವರ ಅಭಿಪ್ರಾಯವನ್ನು ಕೇಳಿದ ನಂತರ, ದಿಗ್ಬಂಧನ ತೆರವು ಮಾಡುವುದರಿಂದ ಉಭಯ ದೇಶಗಳ ಹಿತಾಸಕ್ತಿಗೆ ಒಳಿತಾಗುತ್ತದೆಂದು ತಿಳಿಸಿದ್ದೇನೆ ಎಂದರು. ದಿಗ್ಬಂಧನಗಳನ್ನು ತೆರವುಗೊಳಿಸುವ ಕುರಿತು ಅಮೆರಿಕ ತಳೆದಿರುವು ನಿಲುವು, ಅಲ್ಲಿನ ನೂತನ ಆಡಳಿತ ಭಾರತ ಪರ ತಾಳಿರುವ ಮನೋಭಾವವನ್ನು ತೋರಿಸುತ್ತದೆ ಎಂದು ಸಿನ್ಹಾ ಬಣ್ಣಿಸಿದರು.

(ಐಎಎನ್‌ಎಸ್‌)