ಕೇಂದ್ರ ಸರ್ಕಾರದಿಂದ ರಾಜ್ಯದಲ್ಲಿ ಉಡುಪುಗಳ ರಫ್ತು ಪಾರ್ಕ್‌

ಬೆಂಗಳೂರು : ಉಡುಪುಗಳ ರಫ್ತು ಪಾರ್ಕೊಂದನ್ನು ರಾಜ್ಯದಲ್ಲಿ ಸ್ಥಾಪಿಸಲು ಕೇಂದ್ರ ಸರ್ಕಾರ ಉದ್ದೇಶಿಸಿದ್ದು , ಈ ಸಂಬಂಧ ರಾಜ್ಯ ಸರ್ಕಾರದ ಅಧಿಕೃತ ಕೋರಿಕೆಗಾಗಿ ಕಾಯುತ್ತಿದೆ ಎಂದು ಕೇಂದ್ರ ಜವಳಿ ಖಾತೆ ರಾಜ್ಯ ಸಚಿವ ವಿ. ಧನಂಜಯ ಕುಮಾರ್‌ ತಿಳಿಸಿದ್ದಾರೆ.

ಸೋಮವಾರ ನಗರದಲ್ಲಿ ಜರುಗಿದ ನೂತನ ಮಾದರಿಯ ಉಡುಪುಗಳ ಪ್ರದರ್ಶನ ಡಿಸೈನ್‌ ಕಲೆಕ್ಷನ್‌- 2001 ಕಾರ್ಯಕ್ರಮದಲ್ಲಿ ಧನಂಜಯ್‌ಕುಮಾರ್‌ ಮಾತನಾಡುತ್ತಿದ್ದರು. ಎನ್‌ಐಎಫ್‌ಟಿ (ರಾಷ್ಟ್ರೀಯ ವಸ್ತ್ರ ವಿನ್ಯಾಸ ಸಂಸ್ಥೆ ) ಯಲ್ಲಿ ಪದವಿ ಪೂರೈಸಿರುವ ವಿದ್ಯಾರ್ಥಿಗಳು ಈ ಉಡುಪುಗಳನ್ನು ರೂಪಿಸಿದ್ದಾರೆ.

ಮೂಲ ವಿನ್ಯಾಸಗಳ ಮೇಲಿನ ಗಮನವನ್ನು ನಾವೀಗ ನವೀನ ವಿನ್ಯಾಸಗಳ ಉಡುಪು ತಯಾರಿಕೆಯತ್ತ ತಿರುಗಿಸಬೇಕಾಗಿದೆ. 2000-01 ನೇ ಸಾಲಿನಲ್ಲಿ ರಾಷ್ಟ್ರದ ಉಡುಪು ರಫ್ತು ಉದ್ಯಮದ ವಹಿವಾಟು ಶೇ. 17 ರಷ್ಟು ಹೆಚ್ಚಿದ್ದು , ಈ ಪ್ರಮಾಣ ಮುಂದಿನ ದಿನಗಳಲ್ಲಿ ಮತ್ತಷ್ಟು ಹೆಚ್ಚುವ ನಿರೀಕ್ಷೆಯಿದೆ ಎಂದು ಧನಂಜಯ ಕುಮಾರ್‌ ಹೇಳಿದರು.

48 ಗಂಟೆಗಳಲ್ಲಿ ಕೋರಿಕೆ ಸಲ್ಲಿಕೆ

ಡಿಸೈನ್‌ ಕಲೆಕ್ಷನ್‌- 2001 ರಲ್ಲಿ ಹಾಜರಿದ್ದ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ , ಧನಂಜಯ ಕುಮಾರ್‌ ಅವರ ಮಾತುಗಳಿಗೆ ತಕ್ಷಣವೇ ಸ್ಪಂದಿಸಿದರು. ಉಡುಪು ರಫ್ತು ಪಾರ್ಕ್‌ನ ಸ್ಥಾಪನೆಗೆ ರಾಜ್ಯ ಸರ್ಕಾರ ಆಸಕ್ತಿ ಹೊಂದಿರುವುದನ್ನು ಸ್ಪಷ್ಟಪಡಿಸಿದ ಅವರು, ಇನ್ನು 48 ಗಂಟೆಗಳಲ್ಲಿ ಕೇಂದ್ರ ಸರ್ಕಾರಕ್ಕೆ ಉಡುಪುಗಳ ಪಾರ್ಕ್‌ ಸ್ಥಾಪನೆ ಸಂಬಂಧ ಅಧಿಕೃತ ಕೋರಿಕೆ ಸಲ್ಲಿಸಲಿದೆ ಎಂದರು.

(ಇನ್ಫೋ ವಾರ್ತೆ)