ಹೈದರಾಬಾದ್‌ : ಅಕ್ರಮ ದತ್ತು ಕೇಂದ್ರದಿಂದ 3 ಹೆಣ್ಣು ಶಿಶುಗಳ ವಶ

ಹೈದರಾಬಾದ್‌ : ಬಾಲ ರಕ್ಷಣಾ ಸಮಿತಿ ಎಂಬ ಪರವಾನಗಿ ಇಲ್ಲದ ಸಂಸ್ಥೆಯಿಂದ 3 ರಿಂದ 6 ವರ್ಷ ವಯೋಮಿತಿಯ 3 ಹೆಣ್ಣು ಮಕ್ಕಳನ್ನು ಮಕ್ಕಳ ಕಲ್ಯಾಣ ಇಲಾಖೆ ಸೋಮವಾರ ಪಾರು ಮಾಡಿದೆ.

ಸಂಸ್ಥೆಯ ಶಿಶು ವಿಹಾರದಲ್ಲಿ ಇದ್ದ ಈ ಮಕ್ಕಳನ್ನು ಇಲಾಖೆ, ಸಂಸ್ಥೆಯಿಂದ ಹೊರ ತಂದಿರುವ ಮೂಲಕ ಕಳೆದೊಂದು ವಾರದಲ್ಲಿ 7 ಅಕ್ರಮ ದತ್ತು ಕೇಂದ್ರಗಳಿಂದ 188 ಮಕ್ಕಳನ್ನು ಬಚಾವು ಮಾಡಿದಂತಾಗಿದೆ. 3 ಮಕ್ಕಳ ಪೈಕಿ ಇಬ್ಬರ ಮಕ್ಕಳ ಕಣ್ಣಿನ ಕಾರ್ನಿಯಾವನ್ನು ಸಂಸ್ಥೆಯವರೇ ತೆಗೆಸಿದ್ದಾರೆ ಎಂದು ಕೆಲವು ಮಾಧ್ಯಮಗಳು ಪ್ರಕಟಿಸಿದ್ದು, ಅದು ಹುರುಳಿಲ್ಲದ್ದು ಎಂಬುದು ಗೊತ್ತಾಗಿದೆ.

ಸರೋಜಿನಿ ದೇವಿ ಕಣ್ಣಿನ ಆಸ್ಪತ್ರೆಯಲ್ಲಿ ಮಕ್ಕಳ ಕಣ್ಣು ಪರೀಕ್ಷೆ ಮಾಡಿಸಿದಾಗ, ಒಂದು ಹುಡುಗಿಗೆ ಹುಟ್ಟಿನಿಂದ ಕಣ್ಣು ಗುಡ್ಡೆ ಇಲ್ಲ ಹಾಗೂ ಇನ್ನೊಂದು ಹುಡುಗಿಗೆ ಹುಟ್ಟಿನಿಂದ ಕಾರ್ನಿಯಾ ಇಲ್ಲ ಎಂಬುದು ಬೆಳಕಿಗೆ ಬಂದಿದೆ. ಪ್ರಸ್ತುತ ಇಬ್ಬರೂ ಹೆಣ್ಣು ಮಕ್ಕಳು ಬೇರೆ ಬೇರೆ ಆಸ್ಪತ್ರೆಯಲ್ಲಿ ಆರೋಗ್ಯದ ತಪಾಸಣೆಗೆ ಒಳಗಾಗಿದ್ದಾರೆ ಎಂದು ಇಲಾಖೆಯ ಮೂಲಗಳು ತಿಳಿಸಿವೆ.

ಅಂತರರಾಜ್ಯ ಮಕ್ಕಳ ಮಾರಾಟ ಜಾಲದ ತಲಾಷಿನಲ್ಲಿ ಕರ್ನಾಟಕ ಹಾಗೂ ಆಂಧ್ರಪ್ರದೇಶ ಪೊಲೀಸರು ತೊಡಗಿರುವುದನ್ನು ಇಲ್ಲಿ ಸ್ಮರಿಸಬಹುದು.

(ಯುಎನ್‌ಐ)

ಮುಖಪುಟ / ಇವತ್ತು... ಈ ಹೊತ್ತು...