ಮೈಸೂರಲ್ಲಿ ಚಲನಚಿತ್ರ ತಾರೆಯರ ಪ್ರಚಾರದ ರಂಗು

ಮೈಸೂರು : ಮೇ ಮೂರರಂದು ನಡೆಯಲಿರುವ ಸ್ಥಳೀಯ ಸಂಸ್ಥೆಗಳ ಚುನಾವಣೆಯ ಬಹಿರಂಗ ಪ್ರಚಾರ ಕೊನೆಗೊಳ್ಳಲು ಇನ್ನು 48 ಗಂಟೆಗಳು ಮಾತ್ರ ಉಳಿದಿವೆ. ಏರುತ್ತಿರುವ ಪ್ರಚಾರದ ಅಬ್ಬರದಲ್ಲಿ ಸೇರುತ್ತಿರುವ ಚಲನಚಿತ್ರ ತಾರೆಯರು ಚುನಾವಣೆ ಪ್ರಚಾರಕ್ಕೆ ಮತ್ತಷ್ಟು ಕಾವು ಮೂಡಿಸಿದ್ದಾರೆ.

ಉರಿವ ಬಿಸಿಲನ್ನೂ ಲೆಕ್ಕಿಸದೆ, ತಮ್ಮ ಅಭ್ಯರ್ಥಿಗಳ ಪರ ಪ್ರಚಾರದಲ್ಲಿ ತೊಡಗಿದ್ದಾರೆ. ಮೈಸೂರು ನಗರದ 60ನೇ ವಾರ್ಡ್‌ನಿಂದ ಸ್ಪರ್ಧಿಸಿರುವ ಕಾಂಗ್ರೆಸ್‌ ಅಭ್ಯರ್ಥಿ ಸತೀಶ್‌ ಪರವಾಗಿ ಚಿತ್ರನಟಿ ಶ್ರುತಿ ಹಾಗೂ ಅವರ ಪತಿ ನಟ ಕಂ ನಿರ್ದೇಶಕ ಮಹೇಂದರ್‌ ಪ್ರಚಾರದಲ್ಲಿ ತೊಡಗಿದ್ದಾರೆ.

ಕಾಂಗ್ರೆಸ್‌ ಅಭ್ಯರ್ಥಿ ಸತೀಶ್‌ ಅವರು ಚಿತ್ರ ನಿರ್ಮಾಪಕ ಸಂದೇಶ್‌ ನಾಗರಾಜ್‌ ಅವರ ಸೋದರ. ಇವರ ಪರ ಶ್ರುತಿ - ಮಹೇಂದರ್‌ ತಾರಾ ದಂಪತಿಗಳು ಪ್ರಚಾರಕ್ಕೆ ಇಳಿದಿದ್ದು, ಚುನಾವಣೆ ಪ್ರಚಾರದ ಅಬ್ಬರಕ್ಕೆ ರಂಗು ಮೂಡಿದೆ. ಇನ್ನು 40 ನೇ ವಾರ್ಡ್‌ನಲ್ಲಿ ಸ್ಪರ್ಧಿಸಿರುವ ಆರ್‌. ಸುನಂದ್‌ ಕುಮಾರ್‌ ಪರ ಹಾಸ್ಯನಟ ಟೆನಿಸ್‌ ಕೃಷ್ಣ ಪ್ರಚಾರ ಮಾಡುತ್ತಿದ್ದಾರೆ.

29ವಾರ್ಡ್‌ನಲ್ಲಿ ಸ್ಪರ್ಧಿಸಿರುವ ಅಭ್ಯರ್ಥಿ ರಂಗ ಕಲಾವಿದ ವಾಸುದೇವ್‌ ಅವರು ಶ್ರೀಕೃಷ್ಣ, ರಾಮ, ಸೀತೆ, ಹನುಮನೇ ಮೊದಲಾದ ಪುರಾಣಪುರುಷರ ವೇಷತೊಟ್ಟ ತಮ್ಮ ರಂಗ ಬಳಗದೊಂದಿಗೆ ಮತಯಾಚನೆಯಲ್ಲಿ ನಿರತರಾಗಿದ್ದಾರೆ.

ಇನ್ನು ವಿವಿಧ ರಾಜಕೀಯ ಪಕ್ಷಗಳ ನಾಯಕರು, ಸಚಿವರು, ಶಾಸಕರು, ಸಂಸದರು, ವರಿಷ್ಠರು ತಮ್ಮ ತಮ್ಮ ಪಕ್ಷದ ಅಭ್ಯರ್ಥಿಗಳ ಪರ ಪ್ರಚಾರ ಮಾಡುತ್ತಿದ್ದಾರೆ. ಸಚಿವರಾದ ಶಿವಣ್ಣ, ಎಚ್‌. ವಿಶ್ವನಾಥ್‌, ಮೈಸೂರು ರಾಜಮನೆತನದ ಶ್ರೀಕಂಠದತ್ತ ನರಸಿಂಹರಾಜ ಒಡೆಯರ್‌, ಹಿರಿಯ ರಾಜಕಾರಣಿಗಳಾದ ಬಿ.ಬಿ. ಶಿವಪ್ಪ, ಸಿದ್ಧರಾಮಯ್ಯ ಮೈಸೂರಿನಲ್ಲಿ ಪಾದಯಾತ್ರೆ ನಡೆಸಿ ಮತಯಾಚಿಸಿದರು.

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...