ತೆಹಲ್ಕಾ : ಉರುಳಿದ ಮತ್ತೊಂದು ವಿಕೆಟ್‌,ಎನ್‌.ಕೆ. ಸಿಂಗ್‌ ಎತ್ತಂಗಡಿ

ನವದೆಹಲಿ : ಸಂಘ ಪರಿವಾರಗಳ ಒತ್ತಡಕ್ಕೆ ಕೊನೆಗೂ ಮಣಿದಿರುವ ಪ್ರಧಾನಿ, ರಕ್ಷಣಾ ಅವ್ಯವಹಾರಗಳಲ್ಲಿ ತೆಹಲ್ಕಾ ಬೆಟ್ಟು ಮಾಡಿದ್ದ ವಿಶೇಷ ಕರ್ತವ್ಯಾಧಿಕಾರಿ ಎನ್‌.ಕೆ. ಸಿಂಗ್‌ ಅವರನ್ನು ತಮ್ಮ ಕಾರ್ಯಾಲಯದಿಂದ ಎತ್ತಂಗಡಿ ಮಾಡಲು ಒಪ್ಪಿಕೊಂಡಿದ್ದಾರೆ.

ಪ್ರಧಾನಿ ಕಾರ್ಯಾಲಯದಿಂದ ಸಿಂಗ್‌ ಅವರನ್ನು ಯೋಜನಾ ಆಯೋಗದ ಸದಸ್ಯರನ್ನಾಗಿ ಶುಕ್ರವಾರ ವರ್ಗಾಯಿಸಲಾಗಿದೆ. ಮೋಂಟೆಕ್‌ ಸಿಂಗ್‌ ಅಹ್ಲುವಾಲಿಯಾ ನಿವೃತ್ತಿಯಿಂದ ತೆರವಾಗಿದ್ದ ಹುದ್ದೆಯನ್ನು ಸಿಂಗ್‌ ಅವರಿಗೆ ಸೂಚಿಸಲಾಗಿದೆ. 1964 ರ ಐಎಎಸ್‌ ತಂಡದ ಸಿಂಗ್‌ ಅವರು ಕಳೆದ ಜನವರಿ 31 ರಂದೇ ನಿವೃತ್ತರಾಗಿದ್ದರೂ, ಆರ್ಥಿಕ ವ್ಯವಹಾರಗಳನ್ನು ನೋಡಿಕೊಳ್ಳುವ ವಿಶೇಷ ಕರ್ತವ್ಯಾಧಿಕಾರಿಯನ್ನಾಗಿ ಅವರನ್ನು ಪ್ರಧಾನಿ ನೇಮಿಸಿಕೊಂಡಿದ್ದರು.

ಎರಡೂವರೆ ವರ್ಷಗಳ ಕಾಲ ದೇಶದ ಆರ್ಥಿಕ ನೀತಿಗಳನ್ನು ರೂಪಿಸುವಲ್ಲಿ ಸಿಂಗ್‌ ಮಹತ್ತರ ಪಾತ್ರ ವಹಿಸಿದ್ದರು. ಪ್ರಧಾನಿಗಳ ಆಪ್ತ ಬಳಗದಲ್ಲಿ ಗುರ್ತಿಸಿಕೊಂಡಿದ್ದ ಸಿಂಗ್‌ ಅವರನ್ನು ಹುದ್ದೆಯಿಂದ ಎತ್ತಂಗಡಿ ಮಾಡಬೇಕೆಂದು ತೆಹಲ್ಕಾ ಪ್ರಕರಣದ ಹಿನ್ನೆಲೆಯಲ್ಲಿ ಸಂಘ ಪರಿವಾರ ಹಾಗೂ ವಿರೋಧ ಪಕ್ಷಗಳು ವಾಜಪೇಯಿ ಅವರನ್ನು ಒತ್ತಾಯಿಸಿದ್ದವು. ಕೆಲವು ಮಿತ್ರಪಕ್ಷಗಳು ಕೂಡ ಸಿಂಗ್‌ ಅವರನ್ನು ಕೈ ಬಿಡುವಂತೆ ಪ್ರಧಾನಿ ಅವರನ್ನು ಒತ್ತಾಯಿಸಿದ್ದವು.

(ಇನ್ಫೋ ವಾರ್ತೆ)