ಶನಿವಾರದಿಂದ ಅನಿಲ್‌ ಕುಂಬ್ಳೆ ತಮ್ಮ ಬಲಗೈ ತಿರುಗಿಸುತ್ತಾರೆ

ಬೆಂಗಳೂರು : ಇವತ್ತು (ಏಪ್ರಿಲ್‌ 28) ಅನಿಲ್‌ ಕುಂಬ್ಳೆ ತಮ್ಮ ಬಲಗೈಯನ್ನು ತಿರುಗಿಸುತ್ತಾರೆ.

ಫ್ಲಿಪ್ಪರ್‌ ಮಾಂತ್ರಿಕ ಕುಂಬ್ಳೆ ಕೈತಿರುಗಿಸಿ ಚಿನ್ನದ ಚೆಂಡುಗಳ ಎಸೆದಿರುವಾಗ ಕೈ ತಿರುಗಿಸುವುದರಲ್ಲಿ ಏನು ವಿಶೇಷ ಅಂದುಕೊಳ್ಳಬೇಡಿ. ಕಳೆದ ಜನವರಿಯಲ್ಲಿ ಬಲಭುಜದ ಶಸ್ತ್ರ ಚಿಕಿತ್ಸೆಯಾದ ನಂತರ ಅವರು ಇದೇ ಮೊದಲು ಕೈ ತಿರುಗಿಸುತ್ತಿರುವುದು. ಜೋಹಾನ್ಸ್‌ಬರ್ಗ್‌ನ ಆಂಗ್ಲ ಪತ್ರಿಕೆಯಾಂದು ಈ ಬಗ್ಗೆ ಬರೆದಿದೆ.

ಕಳೆದ ಕೆಲ ವಾರಗಳಿಗೆ ಹೋಲಿಸಿದಲ್ಲಿ ನನ್ನ ಬಲ ಭುಜ ಸಾಕಷ್ಟು ಸುಧಾರಿಸಿದೆ. ಡಾ.ಫರ್ಗ್ಯೂಸನ್‌ ಕೂಡ ಸುಧಾರಣೆ ಆಗಿರುವುದನ್ನು ತಿಳಿಸಿದರು. ಶನಿವಾರದಿಂದ ಕೈ ತಿರುಗಿಸಲು ಪ್ರಾರಂಭಿಸುವೆ. ಫರ್ಗ್ಯೂಸನ್‌ ಸೂಚಿಸಿರುವ ರೀತಿಯಲ್ಲಿ ನಿಧಾನಗತಿಯಲ್ಲಿ ತಾಲೀಮು ನಡೆಸಿ, ಆದಷ್ಟು ಬೇಗ ಕ್ರಿಕೆಟಿಗೆ ಮರಳುತ್ತೇನೆ ಎಂಬ ವಿಶ್ವಾಸ ನನ್ನದು ಎನ್ನುತ್ತಾರೆ ಕುಂಬ್ಳೆ.

ಏಪ್ರಿಲ್‌ 10ರಂದು ಡಾ. ಫರ್ಗ್ಯೂಸನ್‌ ಅವರನ್ನು ಕಾಣಲು ದಕ್ಷಿಣ ಆಫ್ರಿಕಕ್ಕೆ ತೆರಳಿರುವ ಕುಂಬ್ಳೆ , ಮೇ ಮೊದಲ ವಾರದಲ್ಲಿ ಇಲ್ಲಿಗೆ ಆಗಮಿಸಲಿದ್ದಾರೆ. ಬರುವ ಅಕ್ಟೋಬರ್‌ನಲ್ಲಿ ದಕ್ಷಿಣ ಆಫ್ರಿಕ ವಿರುದ್ಧ ನಿಗದಿಯಾಗಿರುವ ಕ್ರಿಕೆಟ್‌ ಸರಣಿಯಲ್ಲಿ ಕುಂಬ್ಳೆ ಆಡುವುದು ಬಹುತೇಕ ಖಚಿತವಾಗಿದೆ.

(ಇನ್ಫೋ ವಾರ್ತೆ)

ಮುಖಪುಟ / ಇವತ್ತು... ಈ ಹೊತ್ತು...