5 ರಾಜ್ಯಗಳ ಚುನಾವಣೆಗೆ ಬಿ.ಇ.ಎಲ್‌ನ 66,900 ಮತಯಂತ್ರ

ಬೆಂಗಳೂರು : ಸಾರ್ವಜನಿಕ ವಲಯದ ಉದ್ದಿಮೆ ಬಿ.ಇ.ಎಲ್‌. (ಭಾರತ್‌ ಎಲೆಕ್ಟ್ರಾನಿಕ್ಸ್‌ ಲಿಮಿಟೆಡ್‌) 2000-01ನೇ ಸಾಲಿನಲ್ಲಿ 1715 ಕೋಟಿ ರುಪಾಯಿಗಳ ದಾಖಲೆ ವಹಿವಾಟು ನಡೆಸಿದೆ. ಈ ವಿಷಯವನ್ನು ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಡಾ. ವಿ.ಕೆ. ಕೋಶಿ ಅವರು ಸುದ್ದಿಗೋಷ್ಠಿಯಲ್ಲಿ ಪ್ರಕಟಿಸಿದ್ದಾರೆ.

ಕಂಪನಿಯು ತೆರಿಗೆ ಪಾವತಿಗೆ ಮುನ್ನ 199.89 ಕೋಟಿ ರುಪಾಯಿ ಲಾಭ ಗಳಿಸಿದೆ. ಹಿಂದಿನ ವರ್ಷಕ್ಕೆ ಹೋಲಿಸಿದರೆ, ಇದು ಶೇ. 24.4ರಷ್ಟು ಪ್ರಗತಿ ಸಾಧಿಸಿದೆ. ಮುಂದಿನ ಆರ್ಥಿಕ ವರ್ಷಕ್ಕೆ ಅಂದರೆ, 2001-02ರ ಸಾಲಿಗೆ 1800 ಕೋಟಿ ರುಪಾಯಿ ವಹಿವಾಟಿನ ಗುರಿಹೊಂದಲಾಗಿದೆ.

ಮತಯಂತ್ರ : ಮೇ ತಿಂಗಳಿನಲ್ಲಿ 5 ರಾಜ್ಯಗಳಲ್ಲಿ ನಡೆಯುತ್ತಿರುವ ವಿಧಾನಸಭಾ ಚುನಾವಣೆಯ ಬಳಕೆಗಾಗಿ ಬಿ.ಇ.ಎಲ್‌. 66,900 ಎಲೆಕ್ಟ್ರಾನಿಕ್‌ ಮತಯಂತ್ರಗಳನ್ನು ಒದಗಿಸಿದೆ. ಕೇವಲ ಮೂರೇ ತಿಂಗಳ ಅವಧಿಯಲ್ಲಿ ಇಷ್ಟು ಎಲೆಕ್ಟ್ರಾನಿಕ್‌ ಮತಯಂತ್ರ ಪೂರೈಸಿದ ಖ್ಯಾತಿಯೂ ಸಂಸ್ಥೆಯದಾಗಿದೆ ಎಂದು ಕೋಶಿ ತಿಳಿಸಿದ್ದಾರೆ.

ವಾಹನಗಳ ಸಂಚಾರದ ಜಾಡು ಹಿಡಿಯುವ ರಾಷ್ಟ್ರಮಟ್ಟದ ನಿಯಂತ್ರಣ ವ್ಯವಸ್ಥೆಯಾಂದನ್ನು ಸಹ ಸಂಸ್ಥೆ ಅಭಿವೃದ್ಧಿಪಡಿಸುತ್ತಿದೆ. ಕರ್ನಾಟಕ ಹಾಗೂ ಆಂಧ್ರಪ್ರದೇಶ ಸಂಚಾರಿ ಪೊಲೀಸರು ಈ ವ್ಯವಸ್ಥೆಯ ಲಾಭ ಪಡೆಯಲು ಮುಂದಾಗಿದ್ದಾರೆ. ಮಾನವ ರಹಿತ ರೈಲ್ವೆ ಲೆವೆಲ್‌ ಕ್ರಾಸಿಂಗ್‌ಗಳಲ್ಲಿ ರೈಲು ಬರುವ ಸೂಚನೆ ನೀಡುವ ಯಂತ್ರ, ವಾಯುನೆಲೆ ರಕ್ಷಣಾ ಶಸ್ತ್ರಾಸ್ತ್ರ ನಿಯಂತ್ರಣ ರೆಡಾರ್‌, ಕರಾವಳಿ ನಿಗಾ ವ್ಯವಸ್ಥೆ, ರಾತ್ರಿ ವೇಳೆಯಲ್ಲೂ ಶತ್ರುಗಳ ಶಸ್ತ್ರಾಸ್ತ್ರ ಹಾಗೂ ಉಪಕರಣ ಪತ್ತೆ ಹಕ್ಷಿಚ್ಚುವ ನೈಟ್‌ ವೆಪನ್‌ ಸೈಟ್‌ ಮತ್ತು ಕುಗ್ರಾಮಗಳಲ್ಲೂ ಖಾಸಗಿ ಎಫ್‌.ಎಂ. ರೇಡಿಯೋ ಕೇಂದ್ರ ಸ್ಥಾಪನೆಗೆ ಅನುವಾಗುವ ಟ್ರಾನ್ಸ್‌ಮೀಟರ್‌ ಅಭಿವೃದ್ಧಿಯೇ ಮೊದಲಾದ ಹತ್ತು ಹಲವು ಹೊಸ ಯೋಜನೆಗಳನ್ನು ಬಿ.ಇ.ಎಲ್‌. ಕೈಗೊಂಡಿದೆ.