ಶಿಶು ಕೊಳ್ಳುವಿಕೆಗೂ, ನನಗೂಸಂಬಂಧವಿಲ್ಲ- ಅಮಲಾ ಸ್ಪಷ್ಟನೆ
ಹೈದರಾಬಾದ್ : ಮಾಧ್ಯಮಗಳಲ್ಲಿ ವರದಿಯಾಗಿರುವ ಶಿಶು ದತ್ತು ಅವ್ಯವಹಾರ ಪ್ರಕರಣಗಳಲ್ಲಿ ತಾನು ಭಾಗಿಯಾಗಿದ್ದೇನೆ ಎಂಬುದು ಹುರುಳಿಲ್ಲದ್ದು ಎಂದು ಚಿತ್ರ ನಟಿ ಅಮಲಾ ಅಕ್ಕಿನೇನಿ ಪ್ರತಿಕ್ರಿಯಿಸಿದ್ದಾರೆ.
ಗುಲ್ಬರ್ಗಾದ ಲಂಬಾಣಿ ತಾಂಡಾದಿಂದ ಹೆಣ್ಣು ಮಕ್ಕಳ ಕೊಂಡುಕೊಂಡಿದೆ ಎಂಬ ಆರೋಪ ಹೊತ್ತಿರುವ ಸೇಂಟ್ ಥೆರೆಸಾ ಅನಾಥಾಲಯದ ಅಧ್ಯಕ್ಷ ಅಥವಾ ನಿರ್ದೇಶಕ ಹುದ್ದೆಯಲ್ಲಿ ನಾನಿಲ್ಲ. ಸಲಹಾ ಮಂಡಳಿಯ 9 ಗೌರವ ಸದಸ್ಯರಲ್ಲಿ ನಾನೂ ಒಬ್ಬಳಷ್ಟೆ . ನಡೆದಿದೆ ಎನ್ನಲಾಗಿರುವ ತಪ್ಪನ್ನು ಪತ್ತೆ ಹಚ್ಚುವ ಕೆಲಸ ಆಗಬೇಕು. ಕರ್ನಾಟಕ ಪೊಲೀಸರು ಯಾವುದೇ ಸಾಕ್ಷ್ಯಗಳಿಲ್ಲದಿದ್ದರೂ ಇಬ್ಬರು ಹೆಣ್ಣು ಶಿಶುಗಳ ಕೊಂಡುಕೊಳ್ಳುವಿಕೆಯಲ್ಲಿ ನಾನೂ ಭಾಗಿ ಎಂದು ಹುಯಿಲೆಬ್ಬಿಸಿರುವುದು ಸರಿಯಲ್ಲ. ಯಾರೊಬ್ಬರ ಚಾರಿತ್ರ್ಯದ ಮೇಲೆ ಮಸಿ ಬಳಿಯುವ ಕೆಲಸ ಮಾಡುವುದು ತರವಲ್ಲ ಎಂದು ಅಮಲಾ ಟೀಕಿಸಿದ್ದಾರೆ.
ಮಾಧ್ಯಮಗಳಿಗೆ ಮತ್ತೊಂದು ಪ್ರತ್ಯೇಕ ಹೇಳಿಕೆ ಬಿಡುಗಡೆ ಮಾಡಿರುವ ಸಲಹಾ ಸಮಿತಿ ಸದಸ್ಯೆ ಸಿಸ್ಟರ್ ಜೋಸೆಫೈನ್ ಗೋಪು, ಅನಾಥಾಲಯವನ್ನು ಸ್ಥಾಪಿಸಿ, ನಡೆಸಿಕೊಂಡು ಬರುತ್ತಿರುವುದು ಜೀಸಸ್ ಮೇರಿ ಜೋಸೆಫ್ ಸೊಸೈಟಿ. ಇದು ಕೇರಾದಿಂದ ಮಾನ್ಯತೆ ಪಡೆದಿದೆ. ಗುಲ್ಬರ್ಗಾದ ಲಂಬಾಣಿ ತಾಂಡಾಗಳಿಂದ ಯಾವುದೇ ಹೆಣ್ಣು ಶಿಶುಗಳನ್ನು ಸಂಸ್ಥೆ ಕೊಂಡುಕೊಂಡಿಲ್ಲ. ನ್ಯಾಯಯುತವಾದ ತನಿಖೆಗೆ ಒಳಗಾಗಲು ಸಂಸ್ಥೆ ಸಿದ್ಧವಿದೆ ಎಂದು ತಿಳಿಸಿದ್ದಾರೆ.
(ಯುಎನ್ಐ)
ಮುಖಪುಟ / ಇವತ್ತು... ಈ ಹೊತ್ತು...