ರಾಯಚೂರು ವಿದ್ಯುತ್‌ ಕೇಂದ್ರದತ್ತ ಹೊರಟ ಹೊಸ ಟ್ರಾನ್ಸ್‌ಫಾರ್ಮರ್‌

ಬೆಂಗಳೂರು : ಕಳೆದ ತಿಂಗಳು ಸಂಭವಿಸಿದ ಅಗ್ನಿ ದುರಂತದಿಂದಾಗಿ ಉತ್ಪಾದನೆ ನಿಲ್ಲಿಸಿರುವ ರಾಯಚೂರು ಶಾಖೋತ್ಪನ್ನ ವಿದ್ಯುತ್‌ ಕೇಂದ್ರದ ಐದನೇ ಘಟಕದ ದುರಸ್ತಿ ಕಾರ್ಯ ಸಮರೋಪಾದಿಯಲ್ಲಿ ನಡೆಯುತ್ತಿದೆ. ಬೇಸಿಗೆಯ ಬೇಗೆಯ ಜತೆಗೆ ವಿದ್ಯುತ್‌ ಕ್ಷಾಮವೂ ತಲೆದೋರದಂತೆ ಈ ಎಚ್ಚರ ವಹಿಸಲಾಗಿದೆ.

ಈ ಘಟಕ ಕೈಕೊಟ್ಟ ಹಿನ್ನೆಲೆಯಲ್ಲಿ ದಿನನಿತ್ಯದ ವಿದ್ಯುತ್‌ ಉತ್ಪಾದನೆಯಲ್ಲಿ 4 ದಶಲಕ್ಷ ಯುನಿಟ್‌ ವಿದ್ಯುತ್‌ ಕೊರತೆ ಉಂಟಾಗಿತ್ತು. ಈಗ ರಾಯಚೂರು ಥರ್ಮಲ್‌ ಕೇಂದ್ರದ ಐದನೇ ಘಟಕಕ್ಕೆ ಹೊಸ ಜನರೇಟರ್‌ ಟ್ರಾನ್ಸ್‌ಫಾರ್ಮರ್‌ ಅಳವಡಿಸುಲಾಗಿತ್ತಿದೆ. ಇದಕ್ಕಾಗೇ ಕೇರಳದ ಅಂಗಾಮಲಿಯ ಟೆಲ್ಕ್‌ (ಟಿಇಎಲ್‌ಕೆ) ಸಂಸ್ಥೆಯಿಂದ ಕರ್ನಾಟಕ ವಿದ್ಯುತ್‌ ನಿಗಮ 5.5 ಕೋಟಿ ರುಪಾಯಿ ನೀಡಿ ಖರೀದಿಸಲಾಗಿರುವ 180 ಟನ್‌ನ ಬೃಹತ್‌ ಜನರೇಟರ್‌ ಟ್ರಾನ್ಸ್‌ಫಾರ್ಮರ್‌ 900 ಕಿ.ಮೀಟರ್‌ ದೂರದ ರಾಯಚೂರಿಗೆ ವಿಶೇಷ ವಾಹನದಲ್ಲಿ ಪ್ರಯಾಣ ಬೆಳೆಸಿದೆ.

ಮೇ.2ರ ಬುಧವಾರದ ಹೊತ್ತಿಗೆ ಬೆಂಗಳೂರು ಮಾರ್ಗವಾಗಿ ಟ್ರಾನ್ಸ್‌ಫಾರ್ಮರ್‌ ರಾಯಚೂರು ಘಟಕ ತಲುಪಲಿದೆ. ಈ ಟ್ರಾನ್ಸ್‌ಫಾರ್ಮರ್‌ ನಿರ್ಮಾಣಕ್ಕೆ ಕನಿಷ್ಠ 10 ತಿಂಗಳಾದರೂ ಬೇಕು. ಆದರೆ, ರಾಜ್ಯದ ಮುಖ್ಯಮಂತ್ರಿ ಕೃಷ್ಣ ಅವರ ಒತ್ತಾಯಕ್ಕೆ ಮಣಿದ ಟೆಲ್ಕ್‌ ಕಂಪನಿ ಒಂದು ತಿಂಗಳ ಅವಧಿಯಲ್ಲಿ ಈ ಜನರೇಟರ್‌ ಟ್ರಾನ್ಸ್‌ಫಾರ್ಮರ್‌ ಒದಗಿಸಿದೆ. ಕಳೆದ ತಿಂಗಳು ಸಂಭವಿಸಿದ ಅಗ್ನಿ ಅನಾಹುತದಲ್ಲಿ 5ನೇ ಘಟಕದ ಟ್ರಾನ್ಸ್‌ಫಾರ್ಮರ್‌ ಸುಟ್ಟುಹೋಗಿತ್ತು.

ಹೊಸ ಟ್ರಾನ್ಸ್‌ಫಾರ್ಮರ್‌ ಅಳವಡಿಸಿದ ಬಳಿಕ ಮತ್ತೆ ಒಂದು ವರ್ಷದವರೆಗೆ ಯಾವುದೇ ಅಡೆತಡೆ ಇಲ್ಲದೆ ವಿದ್ಯುತ್‌ ಉತ್ಪಾದಿಸಲು ಘಟಕ ಸಜ್ಜಾಗಿದ್ದು, ರಾಯಚೂರು ಶಾಖೋತ್ಪನ್ನ ವಿದ್ಯುತ್‌ ಕೇಂದ್ರದಲ್ಲಿ ಟ್ರಾನ್ಸ್‌ಫಾರ್ಮರ್‌ ಅಳವಡಿಸಲು ಭದ್ರವಾದ ಬುನಾದಿ ನಿರ್ಮಿಸುವ ಕಾರ್ಯವೂ ಭರದಿಂದ ಸಾಗಿದೆ.

ಮುಖಪುಟ / ಇವತ್ತು... ಈ ಹೊತ್ತು...