ಶುಕ್ರವಾರದಿಂದ ಅನಿರ್ದಿಷ್ಟ ಕಾಲದವರೆಗೆ ಸಂಸತ್‌ಅಧಿವೇಶನ ಮುಂದೂಡಿಕೆ

ನವದೆಹಲಿ : ಶುಕ್ರವಾರದಿಂದ ಲೋಕಸಭಾ ಅಧಿವೇಶನವನ್ನ್ನು ಅನಿರ್ದಿಷ್ಟ ಕಾಲದವರೆಗೆ ಮುಂದೂಡಲಾಗಿದೆ ಎಂದು ಸಭಾಪತಿ ಜಿಎಂಸಿ ಬಾಲಯೋಗಿ ಗುರುವಾರ ಘೋಷಿಸಿದ್ದಾರೆ.

ಬುಧವಾರ ನಡೆದ ಸರ್ವ ಪಕ್ಷಗಳ ಸಭೆಯಲ್ಲಿ ಸಂಸತ್ತಿನ ಕಲಾಪಗಳನ್ನು ಶುಕ್ರವಾರ (ಏಪ್ರಿಲ್‌ 27) ದಿಂದ ಅನಿರ್ದಿಷ್ಟ ಕಾಲದವರೆಗೆ ಮುಂದೂಡಬೇಕೆಂದು ತೀರ್ಮಾನಿಸಲಾಗಿದೆ. ತೆಹಲ್ಕಾ ಪ್ರಕರಣ ಕುರಿತ ಪ್ರತಿಭಟನೆಯಲ್ಲಿ ಪ್ರಸ್ತುತ ಅಧಿವೇಶನದಲ್ಲಿ ಪೋಲಾಗಿರುವ ಕಲಾಪದ ಸಮಯವನ್ನು ಬರುವ ಚಳಿಗಾಲದ ಅಧಿವೇಶನದಲ್ಲಿ ದೀರ್ಘಾವಧಿ ಕಲಾಪ ನಡೆಸುವುದರ ಮೂಲಕ ತುಂಬಿಕೊಡಬೇಕೆಂದೂ ಸಭೆ ತೀರ್ಮಾನಿಸಿತು ಎಂದು ಬಾಲಯೋಗಿ ಹೇಳಿದರು.

ಶುಕ್ರವಾರದಿಂದ ಅನಿರ್ದಿಷ್ಟ ಕಾಲದವರೆಗೆ ಸಂಸತ್‌ ಅಧಿವೇಶನ ಮುಂದೂಡಿ, ಬರುವ ಮೇ 14ರಿಂದ 18ರವರೆಗೆ 5 ದಿನಗಳ ಕಲಾಪ ನಡೆಸಲು ಸರ್ವ ಪಕ್ಷಗಳ ಸಭೆ ತೀರ್ಮಾನಿಸಿದ್ದು , ಅದನ್ನು ತಾವು ವಿರೋಧಿಸುವುದಾಗಿ ಆರ್‌ಜೆಡಿ ಪಕ್ಷದ ಸದಸ್ಯ ರಘುವಂಶ್‌ ಪ್ರಸಾದ್‌ ಸಿಂಗ್‌ ಸಭೆಯಲ್ಲಿ ಹೇಳಿದರು. ಆದರೆ ಅಧಿವೇಶನವನ್ನು ಶುಕ್ರವಾರದಿಂದ ಅನಿರ್ದಿಷ್ಟ ಕಾಲದವರೆಗೆ ಮುಂದೂಡಬೇಕೆಂದು ಮಾತ್ರ ಸಭೆ ನಿರ್ಧರಿಸಿದೆ ಎಂದು ಸಭಾಪತಿ ತಿಳಿಸಿದರು.

(ಇನ್ಫೋ ವಾರ್ತೆ)