ಮೈಸೂರು ಅರಮನೆ ಪ್ರವೇಶ ಶುಲ್ಕದಲ್ಲಿ ಭಾರಿ ಹೆಚ್ಚಳ
ಬೆಂಗಳೂರು : ಬೇಸಿಗೆ ರಜೆ ಪ್ರಾರಂಭವಾಗಿದೆ. ಮೈಸೂರಿಗೆ ಬರುವ ಪ್ರವಾಸಿಗರ ಸಂಖ್ಯೆಯೂ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ವಿಶ್ವವಿಖ್ಯಾತ ಅರಮನೆಗಳ ನಗರಿ ಮೈಸೂರಿನ ಅರಮನೆಗಳ ಸೊಬಗನ್ನು ಕಾಣಲು ನೂರಾರು ಪ್ರವಾಸಿಗರು ದಿನನಿತ್ಯವೂ ಬರುತ್ತಿರುವ ಈ ಹೊತ್ತಿನಲ್ಲಿ ಅರಮನೆ ವೀಕ್ಷಣೆಯ ಪ್ರವೇಶ ಶುಲ್ಕ ಹಾಗೂ ವಾಹನ ನಿಲುಗಡೆ ಶುಲ್ಕವನ್ನು ಏರಿಸಲಾಗಿದೆ.
ಹೊಸ ದರಗಳು ಮೇ 1ರಿಂದ ಜಾರಿಗೆ ಬರಲಿವೆ. ಹೊಸ ದರದ ರೀತ್ಯ ಅರಮನೆ ಪ್ರವೇಶ ಶುಲ್ಕ ಈಗಿರುವ 10 ರುಪಾಯಿಯ ಬದಲು 15 ರುಪಾಯಿ ಆಗಲಿದೆ.
ಅರಮನೆ ಮಂಡಳಿ ಸಭೆಯಲ್ಲಿ ಈ ತೀರ್ಮಾನ ಕೈಗೊಳ್ಳಲಾಗಿದೆ. ಇದಲ್ಲದೆ ಅರಮನೆ ಆವರಣಕ್ಕೆ ಬರುವ ಖಾಸಗಿ ಪ್ರವಾಸಿ ಬಸ್ಗಳ ಹಾಗೂ ಇನ್ನಿತರ ವಾಹನಗಳ ನಿಲುಗಡೆ ಶುಲ್ಕವನ್ನೂ ಏರಿಸಲು ನಿರ್ಧರಿಸಲಾಗಿದೆ. ಈಗ ಬಸ್ ನಿಲುಗಡೆಗೆ 8 ರುಪಾಯಿ ಇದ್ದು ಅದು ಹೆಚ್ಚೂಕಡಿಮೆ ಮೂರು ಪಟ್ಟು ಏರಲಿದೆ. ಅಂದರೆ ಬಸ್ ಪಾರ್ಕಿಂಗ್ ಶುಲ್ಕ 20 ರುಪಾಯಿ ಆಗಲಿದೆ.
ಮೆಟಡಾರ್ ವ್ಯಾನುಗಳ ನಿಲುಗಡೆ ಶುಲ್ಕ 5 ರುಪಾಯಿಯಿಂದ 15 ರುಪಾಯಿ, ಕಾರುಗಳ ನಿಲುಗಡೆ ಶುಲ್ಕ 3 ರಿಂದ 10 ರುಪಾಯಿಗೆ ಏರಲಿದೆ. ಆಡಳಿತಾತ್ಮಕ ವೆಚ್ಚ ಭರಿಸಲು ಈ ಏರಿಕೆ ಅನಿವಾರ್ಯವಾಗಿದೆ ಎಂದೂ ಅರಮನೆ ಆಡಳಿತ ಮಂಡಲಿ ಮೂಲಗಳು ತಿಳಿಸಿವೆ.
(ಮೈಸೂರು ಪ್ರತಿನಿಧಿಯಿಂದ)