‘ನಿಗದಿತ ಕಕ್ಷೆ ಸೇರದ ಜಿಸ್ಯಾಟ್‌-1 ಕಡಿಮೆ ಕೆಲಸ ಮಾಡುತ್ತದಷ್ಟೆ’

ಬೆಂಗಳೂರು : ಇಂಧನ ಕೊರತೆಯಿಂದಾಗಿ ನಿಗದಿತ ಕಕ್ಷೆಗಿಂತ ಒಂದು ಸಾವಿರ ಕಿಲೋ ಮೀಟರ್‌ ಹಿಂದೆಯೇ ನಿಂತು ಕೆಲಸ ಆರಂಭಿಸಲಿರುವ ಜಿಸಾಟ್‌- 1, ಮೂರು ವರ್ಷಗಳ ಅವಧಿಯಲ್ಲಿ ಯಾವುದೇ ಕೆಲಸ ಮಾಡುವುದಿಲ್ಲ ಎಂದೇನಿಲ್ಲ ಎಂದು ಇಸ್ರೋ ಮೂಲಗಳು ಹೇಳಿವೆ.

ಕೆಲಸಗಳೆಲ್ಲವೂ ಸ್ಥಗಿತವಾಗುವುದಿಲ್ಲ. ಬದಲಾಗಿ ಪೂರೈಸಬೇಕಿದ್ದ ಜವಾಬ್ದಾರಿಗಳಲ್ಲಿ ಕೆಲವನ್ನು ಮಾತ್ರವಷ್ಟೇ ಉಪಗ್ರಹ ನಿರ್ವಹಿಸಲಿದೆ ಎಂದು ಇಸ್ರೋದ ಅಧಿಕಾರಿಗಳು ಮಂಗಳವಾರ ಹೇಳಿದ್ದಾರೆ.

ಇಂಧನ ಕೊರತೆಯಿಂದ ಆಗಿರುವ ತೊಂದರೆಯನ್ನು ಸಾಧ್ಯವಾದಷ್ಟು ಸರಿಪಡಿಸಲಾಗಿದೆ. ಪ್ರಸ್ತುತ ಜಿಸಾಟ್‌- 1 ಭೂಮಿಯಿಂದ 35,665 ಕಿಲೋ ಮೀಟರ್‌ ಎತ್ತರದಲ್ಲಿದೆ. ಭೂಮಿ ಸುತ್ತುವ ಆರ್ಬಿಟಲ್‌ ರೇಟ್‌ 24 ಗಂಟೆಗೆ ಬದಲಾಗಿ 23 ಗಂಟೆ 2 ನಿಮಿಷಗಳಾಗಿರುತ್ತವೆ ಎಂದು ಇಸ್ರೋ ಅಧ್ಯಕ್ಷ ಡಾ. ಕೆ. ಕಸ್ತೂರಿ ರಂಗನ್‌ ಹೇಳಿದ್ದಾರೆ.

ಹಾಸನದಲ್ಲಿರುವ ಇಸ್ರೋದ ಮಾಸ್ಟರ್‌ ಕಂಟ್ರೋಲ್‌ ಕೇಂದ್ರದಿಂದ ಉಪಗ್ರಹವನ್ನು ತಿಂಗಳಲ್ಲಿ ಹತ್ತು ದಿನ ವೀಕ್ಷಿಸಲಾಗುವುದು. ಅಲ್ಲದೆ ಭವಿಷ್ಯದಲ್ಲಿನ ಉಡ್ಡಯನಕ್ಕೆ ಅಗತ್ಯ ಮಾಹಿತಿಯನ್ನು ಸಂಗ್ರಹಿಸಲಾಗುವುದು ಎಂದೂ ಕಸ್ತೂರಿ ರಂಗನ್‌ ವಿವರಿಸಿದರು.

(ಇನ್ಫೋ ವಾರ್ತೆ)