ಚಾರ್ಮಾಡಿಯಲ್ಲಿ ಒಂಟಿ ಸಲಗನ ಕಾಟ : ಸರಕಾರಕ್ಕೆ ಮೊರೆ

ಮಂಗಳೂರು : ಬೆಳ್ತಂಗಡಿ ಸಮೀಪದ ಚಾರ್ಮಾಡಿ ಗ್ರಾಮದಲ್ಲಿ ಒಂಟಿ ಸಲಗದ ಮತ್ತೆ ಹಾವಳಿ ಮಾಡುತ್ತಿದ್ದು, ಬಾಳೆಯ ತೋಟಗಳನ್ನು ನಾಶ ಮಾಡುತ್ತಿದೆ. ಆನೆಯ ಕಾಟದಿಂದ ಕಂಗೆಟ್ಟಿರುವ ಗ್ರಾಮಸ್ಥರು ಅಪಾಯದಿಂದ ಪಾರುಮಾಡುವಂತೆ ಸರಕಾರದ ಮೊರೆ ಹೊಕ್ಕಿದ್ದಾರೆ.

ರಾತ್ರಿಯ ವೇಳೆ ಅರಣ್ಯ ಪ್ರದೇಶದಿಂದ ಊರಿಗೆ ನುಗ್ಗುತ್ತಿರುವ ಈ ಒಂಟಿ ಸಲಗ, ಎದೆನಡುಗುವಂತೆ ಗೀಳು ಹಾಕುತ್ತಾ, ಚಾರ್ಮಾಡಿ ಘಾಟ್‌ ಅಂಚಿನಲ್ಲಿರುವ ಗ್ರಾಮಗಳಲ್ಲಿ ರಾಜಾರೋಷವಾಗಿ ಓಡಾಡುತ್ತಿದೆ. ಹಲಸಿನ ಮರಗಳನ್ನು, ತೆಂಗಿನ ಮರಗಳನ್ನು ಹಾಗೂ ಬಾಳೆಯ ತೋಟಗಳನ್ನು ನೆಲಸಮ ಮಾಡುತ್ತಿದೆ.

ಡೋೕಲು, ತಮಟೆ, ಕೊಂಬು, ಕಹಳೆಯ ಶಬ್ದಕ್ಕೂ ಜಗ್ಗದ ಈ ಆನೆಯನ್ನು ಓಡಿಸುವುದೇ ಗ್ರಾಮಸ್ಥರಿಗೆ ಒಂದು ತಲೆನೋವಾಗಿ ಪರಿಣಮಿಸಿದೆ.

ಶಬ್ದಕ್ಕೆ ಹೆದರಿ ಕೆಲಕಾಲ ಮರೆಯಾಗುವ ಆನೆ, ಮತ್ತೆ ತೋಟಗಳಿಗೆ ದಾಳಿ ಇಡುತ್ತಿದೆ. ಬೆಳ್ತಂಗಡಿ ವಿಭಾಗದ ಅರಣ್ಯಾಧಿಕಾರಿಗಳು ಆನೆಯ ಉಪಟಳದಿಂದ ಗ್ರಾಮಸ್ಥರನ್ನು ಪಾರು ಮಾಡುವ ಭರವಸೆ ನೀಡಿದ್ದಾರೆ. ಗ್ರಾಮಸ್ಥರ ದೂರಿನ ಮೇರೆಗೆ ತಹಶೀಲ್ದಾರರು ಗ್ರಾಮಕ್ಕೆ ಬಂದು, ಆನೆಯಿಂದ ಆಗಿರುವ ಹಾನಿಯ ಪರಿಶೀಲನೆ ನಡೆಸಿದರು. ಆನೆ ಓಡಿಸಲು ಅರಣ್ಯ ಇಲಾಖೆಯು ಗ್ರಾಮದಲ್ಲಿ ಸಿಬ್ಬಂದಿಯನ್ನು ನಿಯೋಜಿಸಿದೆ.