ಸಚಿನ್‌ ಹುಟ್ಟುಹಬ್ಬಕ್ಕೆ ಮಾರ್ಕ್‌ ವಾ ವಿಶೇಷ ಉಡುಗೊರೆ

ಮೆಲ್ಬೋರ್ನ್‌ : ಸಚಿನ್‌ ತೆಂಡೂಲ್ಕರ್‌ಗೆ ತನ್ನ 28ನೇ ಹುಟ್ಟು ಹಬ್ಬಕ್ಕೆ ವಿಶೇಷ ಉಡುಗೊರೆಯಾಂದು ಸಿಕ್ಕಿದೆ. ಕೊಟ್ಟಿರುವವರು ಆಸ್ಟ್ರೇಲಿಯಾದ ಬ್ಯಾಟ್ಸ್‌ಮನ್‌ ಮಾರ್ಕ್‌ ವಾ.

ನನ್ನ ಪ್ರಕಾರ ಸಚಿನ್‌ ಜಗತ್ತಿನ ಬೆಸ್ಟ್‌ ಬ್ಯಾಟ್ಸ್‌ಮನ್‌- ಎಂದು ಮಂಗಳವಾರ ಪತ್ರಿಕೆಯ ಅಂಕಣವೊಂದರಲ್ಲಿ ಮಾರ್ಕ್‌ ವಾ ಬರೆದಿದ್ದಾರೆ. ಅವರ ಬರೆಹದ ಸಂಕ್ಷಿಪ್ತ ವಿವರ ಇಂತಿದೆ...

1990ರ ದಶಕದಲ್ಲಿ ಬ್ರಿಯಾನ್‌ ಲಾರಾ, ಇಂಜಮಾಮ್‌ ಉಲ್‌ ಹಕ್‌, ಜನ ಹೇಳಿದಂತೆ ನಾನು ಹಾಗೂ ತೆಂಡೂಲ್ಕರ್‌ ಉತ್ತಮ ಬ್ಯಾಟ್ಸ್‌ಮನ್‌ ಯಾದಿಯಲ್ಲಿ ಇದ್ದೆವು. ಈ ಪೈಕಿ ಸಚಿನ್‌ಗೇ ನನ್ನ ಹೆಚ್ಚು ಮಾರ್ಕ್ಸ್‌. ತಾಂತ್ರಿಕವಾಗಿ ಆತ ಶ್ರೇಷ್ಠ. ಹೊತ್ತಗೆಯ ಎಲ್ಲಾ ಪ್ರಕಾರದ ಹೊಡೆತಗಳನ್ನೂ ಹೊಮ್ಮಿಸಬಲ್ಲ ಚತುರಮತಿ. ಮೇಲಾಗಿ ಕನ್ಸಿಸ್ಟೆಂಟ್‌. ಸ್ಲಿಪ್‌ನಲ್ಲಿ ನಿಂತು, ಆತ ಔಟ್‌ ಆದರೆ ಸಾಕಪ್ಪಾ ಅಂತ ಕಾಯುವ ನಾನು ಆತನ ಆಟದ ಪ್ರೇಕ್ಷಕನೂ ಹೌದು. ಸಚಿನ್‌ ಹೊಡೆತಗಳು ಮುದಕೊಡುವ ಒಂದು ಟ್ರೀಟ್‌ ಇದ್ದಂತೆ.

ನನ್ನ ಅಂದಾಜಿನ ಪ್ರಕಾರ ಸಚಿನ್‌ ಇನ್ನೂ 8- 10 ವರ್ಷ ಕ್ರಿಕೆಟ್‌ ಆಡುತ್ತಾರೆ. ರನ್‌ ಗಳಿಕೆಯ ಅವರ ದಾಹ ನೋಡಿದರೆ, 40ಕ್ಕೂ ಹೆಚ್ಚು ಶತಕ ದಾಖಲಿಸೋದು ಗ್ಯಾರಂಟಿ. ಆತ ಜನರ ರಂಜಿಸಲು, ತಂಡ ಉಳಿಸಲು ಬ್ಯಾಟ್‌ ಮಾಡುತ್ತಾರೆ. ತಂಡಕ್ಕೆ ಅಗತ್ಯ ಬಿದ್ದಾಗ ಒತ್ತಡದಲ್ಲೂ ಬಚಾವು ಮಾಡಿರುವ ಆತ ನಿಜವಾಗಿಯೂ ಅತ್ಯುತ್ತಮ ತಂತ್ರಜ್ಞ. 1998ರಲ್ಲಿ ಶಾರ್ಜಾದಲ್ಲಿ ನಮ್ಮ ತಂಡದ ವಿರುದ್ಧ 143 ರನ್‌ ಸಿಡಿಸಿ ಭಾರತ ಫೈನಲ್ಸ್‌ ತಲುಪಲು ಕಾರಣರಾಗಿದ್ದರು. ತಮ್ಮ 25ನೇ ಹುಟ್ಟುಹಬ್ಬದ ದಿನ ತಂಡವನ್ನು ಗೆಲ್ಲಿಸಲು ಶತಕದ ಕಾಣಿಕೆ ಕೊಟ್ಟರು. ದಕ್ಷಿಣ ಆಫ್ರಿಕದಲ್ಲಿ 1996ರಲ್ಲಿ ನಡೆದ ತ್ರಿಕೋನ ಸರಣಿಯಲ್ಲಿ ಜಿಂಬಾಬ್ವೆಯನ್ನು ಹೊರಗೋಡಿಸಲು ಕೇವಲ 97 ಎಸೆತಗಳಲ್ಲಿ 104 ರನ್‌ ಸಿಡಿಸಿದರು. ಇವೆಲ್ಲಾ ಸಚಿನ್‌ ಆಪದ್ಬಾಂಧವ ಅನ್ನೋದಕ್ಕೆ ನಿದರ್ಶನಗಳು.

(ಇನ್ಫೋ ವಾರ್ತೆ)

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...