ತೆಹೆಲ್ಕಾ ತನಿಖೆಗೆ ಒಪ್ಪಿದ ಅಟಲ್‌, ಕಲಾಪಕ್ಕೆ ಅಡ್ಡಿಯಿಲ್ಲ ಸೋನಿಯಾ

ನವದೆಹಲಿ : ತೆಹಲ್ಕಾ ಹಗರಣದ ಬಗ್ಗೆ ಜಂಟಿ ಸಂಸದೀಯ ಸಮಿತಿ (ಜೆಪಿಸಿ) ತನಿಖೆ ನಡೆಸಲು ಸರಕಾರ ಮುಕ್ತ ಮನಸ್ಸಿನಿಂದ ಇದೆ ಎಂದು ಪ್ರಧಾನಿ ಹೇಳಿರುವುದಕ್ಕೆ ಪ್ರತಿಯಾಗಿ ವಿರೋಧ ಪಕ್ಷದ ನಾಯಕಿ ಸೋನಿಯಾ ಗಾಂಧಿ, ಮಂಗಳವಾರ ಬಜೆಟ್‌ ಕುರಿತ ಚರ್ಚೆ ನಡೆಸಲು ಒಪ್ಪಿಕೊಂಡಿದ್ದಾರೆ.

ಸೋಮವಾರ ರಾತ್ರಿ ಲೋಕಸಭಾಧ್ಯಕ್ಷ ಜಿಎಂಸಿ. ಬಾಲಯೋಗಿ ಅವರ ಸಮಕ್ಷಮದಲ್ಲಿ ಪ್ರಧಾನಿ ವಾಜಪೇಯಿ ಮತ್ತು ಸೋನಿಯಾ ಗಾಂಧಿ ನಡುವೆ ನಡೆದ ಮಾತುಕತೆಯಲ್ಲಿ ಈ ಒಪ್ಪಂದಕ್ಕೆ ಬರಲಾಗಿದೆ. ಗುರುವಾರದಂದು ಹಣಕಾಸು ಮಸೂದೆ ಅಂಗೀಕಾರವಾದ ಬಳಿಕ ತೆಹಲ್ಕಾ ಹಗರಣದ ಬಗ್ಗೆ ಜೆಪಿಸಿ ತನಿಖೆ ಆಗಬೇಕೆಂಬ ಕಾಂಗ್ರೆಸ್‌ನ ಬೇಡಿಕೆ ಬಗ್ಗೆ ಚರ್ಚೆ ನಡೆಸಿ ಅಂತಿಮ ನಿರ್ಧಾರಕ್ಕೆ ಬರುವುದಾಗಿ ವಾಜಪೇಯಿ ಭರವಸೆಯಿತ್ತಿದ್ದಾರೆ.

ಈ ತತ್ಕಾಲದ ಕದನ ವಿರಾಮವನ್ನು ಒಪ್ಪಿಕೊಂಡಿರುವ ಮಾತ್ರಕ್ಕೆ ಕಾಂಗ್ರೆಸ್‌ ತನ್ನ ನಿಲುವನ್ನು ಸಡಿಲಿಸಿದೆ ಎಂದೇನಲ್ಲ. ಹಣಕಾಸು ಮಸೂದೆ ಅಂಗೀಕಾರವಾದ ನಂತರ ಸರಕಾರ ಕೊಟ್ಟ ಮಾತನ್ನು ಉಳಿಸಿಕೊಳ್ಳದಿದ್ದಲ್ಲಿ ಕಾಂಗ್ರೆಸ್‌ ಮತ್ತೆ ಚಳವಳಿ ನಡೆಸುತ್ತದೆ. ರಾಷ್ಟ್ರದ ಹಿತ ದೃಷ್ಟಿಯಿಂದ ಬಜೆಟ್‌ ಅಂಗೀಕಾರಕ್ಕೆ ಅನುಮತಿ ನೀಡುತ್ತಿದ್ದೇವೆ. ಜೆಪಿಸಿ ತನಿಖೆಯಾಗಬೇಕು ಎಂಬ ನಿಲುವಿನಿಂದ ಕಾಂಗ್ರೆಸ್‌ ಹಿಂದೆ ಸರಿಯುವುದು ದುಸ್ಸಾಧ್ಯ ಎಂದು ಸೋನಿಯಾ ಹೇಳಿದ್ದಾರೆ.

(ಇನ್ಫೋ ವಾರ್ತೆ)

ಮುಖಪುಟ / ಇವತ್ತು... ಈ ಹೊತ್ತು...