ಕಾರ್ಖಾನೆಗೆ ನೀರು ನುಗ್ಗುವ ಭೀತಿ : ಕೆರೆಯನ್ನೇ ಒಡೆವ ಪ್ರಯತ್ನ

ಬೆಂಗಳೂರು : ಬೆಂಗಳೂರು ಹೊರವಲಯ ನೆಲಮಂಗಲ ಬಳಿ ಇರುವ ಪ್ರತಿಷ್ಠಿತ ಕಾರ್ಖಾನೆ ಹಾಗೂ ಅದರ ಆಸ್ಪತ್ರೆ ಕಟ್ಟಡಕ್ಕೆ ಕೆರೆಯ ನೀರು ನುಗ್ಗುವುದನ್ನು ತಪ್ಪಿಸಲು ಮಾದಾವರ ಕೆರೆಯನ್ನೇ ಒಡೆಯುವ ಪ್ರಯತ್ನದಲ್ಲಿದ್ದ ಎಂಟು ಮಂದಿ ದುಷ್ಕರ್ಮಿಗಳ ಪೈಕಿ ಮೂವರನ್ನು ಹಿಡಿದು ಪೊಲೀಸರಿಗೆ ಒಪ್ಪಿಸಿರುವ ಘಟನೆ ವರದಿಯಾಗಿದೆ.

ಬೆಂಗಳೂರು ಹಾಗೂ ಸುತ್ತಮುತ್ತಲ ಪ್ರದೇಶಗಳಲ್ಲಿ ಕಳೆದ ನಾಲ್ಕು ದಿನಗಳಿಂದಲೂ ಸತತವಾಗಿ ದಾಖಲೆಯ ಮಳೆ ಸುರಿಯುತ್ತಿದ್ದು, ಮಾದಾವರ ಕೆರೆ ತುಂಬಿದೆ. ಇನ್ನೂ ಹೆಚ್ಚು ಮಳೆಯಾದರೆ, ಕೆರೆಯ ನೀರು ಕಾರ್ಖಾನೆಗೆ ಹಾಗೂ ಕಾರ್ಖಾನೆ ನಡೆಸುತ್ತಿದ್ದ ಆಸ್ಪತ್ರೆ ಕಟ್ಟಡಕ್ಕೆ ನುಗ್ಗುವ ಸಾಧ್ಯತೆ ಇತ್ತು. ಇದನ್ನು ತಪ್ಪಿಸಲು 8 ಮಂದಿ ದುಷ್ಕರ್ಮಿಗಳ ತಂಡ ಕೆರೆ ಒಡೆಯುವ ಪ್ರಯತ್ನದಲ್ಲಿದ್ದಾಗ, ಕೆರೆ ಕಾವಲು ಪಡೆಯವರು ದುಷ್ಕರ್ಮಿಗಳ ಬೆನ್ನು ಹತ್ತಿ ಆಪೈಕಿ ಮೂವರನ್ನು ಹಿಡಿದು ನೆಲಮಂಗಲ ಪೊಲೀಸರಿಗೆ ಒಪ್ಪಿಸಿದರು.

ಆರೋಪಿಗಳನ್ನು ಬಂಧಿಸಿದ ಬಳಿಕ ಪೊಲೀಸರು ಕೆರೆ ಒಡೆಯಲು ದುಷ್ಕರ್ಮಿಗಳು ತಂದಿದ್ದ ಹಾರೆ, ಗುದ್ದಲಿ ಮೊದಲಾದ ಸಾಧನಗಳನ್ನು ವಶಪಡಿಸಿಕೊಂಡಿದ್ದಾರೆ. ಬಂಧಿತರಲ್ಲಿ ಒಬ್ಬನನ್ನು ಅರವಿಂದ ಎಂದು ಗುರುತಿಸಲಾಗಿದೆ. ಇತರ ಆರೋಪಿಗಳ ಶೋಧ ನಡೆದಿದ್ದು, ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ಕೋಡಿಪಾಳ್ಯ ಸಮೀಪದ ಈ ಮಾದಾವರ ಕೆರೆಯನ್ನು ಮೀನು ಸಾಕಾಣಿಕೆಗೆ ಬಳಸಲಾಗುತ್ತಿದೆ. ಮೀನುಗಾರಿಕೆಗಾಗಿ ಈ ಕೆರೆಯನ್ನು ಗುತ್ತಿಗೆ ನೀಡಲಾಗಿದೆ.

(ಇನ್ಫೋ ವಾರ್ತೆ)