ರಾಜ್ಯ ವೈದ್ಯಕೀಯ, ದಂತ ವೈದ್ಯಕೀಯಕಾಲೇಜು ಸೀಟುಗಳ ಹೆಚ್ಚಳ

ಬೆಂಗಳೂರು : ಶ್ರೀನಿವಾಸ ಟ್ರಸ್ಟ್‌ನ ವೈದೇಹಿ ವೈದ್ಯಕೀಯ ವಿಜ್ಞಾನಗಳ ಸಂಸ್ಥೆಗೆ ವೈಟ್‌ಫೀಲ್ಡ್‌ನಲ್ಲಿ ವೈದ್ಯಕೀಯ ಕಾಲೇಜು ಸ್ಥಾಪಿಸಲು ಸರ್ಕಾರ ಆಕ್ಷೇಪಣಾ ರಹಿತ ಪತ್ರ ನೀಡಿದೆ. ಇದರೊಂದಿಗೆ ನಗರದ ವೈದ್ಯಕೀಯ ಕಾಲೇಜುಗಳ ಪಟ್ಟಿಗೆ ಮತ್ತೊಂದು ಕಾಲೇಜು ಸೇರ್ಪಡೆಯಾದಂತಾಗಿದೆ. ಈ ಕಾಲೇಜು ಸ್ಥಾಪನೆಯಾದೊಡನೆ ಇನ್ನೂ 1 ಸಾವಿರ ವಿದ್ಯಾರ್ಥಿಗಳಿಗೆ ವೈದ್ಯಕೀಯ ಶಿಕ್ಷಣ ಕಲಿಕೆಗೆ ಅವಕಾಶ ಸಿಗಲಿದೆ.

ಗುರುವಾರ ಸುದ್ದಿಗಾರರೊಡನೆ ಮಾಡನಾಡುತ್ತಿದ್ದ ವಾರ್ತಾ ಮತ್ತು ಪ್ರಸಾರ ಖಾತೆ ಸಚಿವ ಪ್ರೊ.ಬಿ.ಕೆ.ಚಂದ್ರಶೇಖರ್‌, ಆರೋಗ್ಯ ಕ್ಷೇತ್ರಕ್ಕೆ ಸಂಬಂಧಿಸಿದಂತೆ ಸಚಿವ ಸಂಪುಟದ ಉಪ ಸಮಿತಿ ಕೊಟ್ಟಿರುವ ಎಲ್ಲಾ ಶಿಫಾರಸ್ಸುಗಳಿಗೂ ಸಂಪುಟ ಒಪ್ಪಿಗೆ ನೀಡಿದೆ ಎಂದರು. ಉಪ ಸಮಿತಿಯ ಶಿಫಾರಸ್ಸುಗಳು ಇಂತಿವೆ-

• ಯಾವುದೇ ಹೊಸ ಆಯುರ್ವೇದ ಕಾಲೇಜಿನ ಸ್ಥಾಪನೆಗೆ ಅನುಮತಿ ಕೊಡಕೂಡದೆಂಬ ಸರ್ಕಾರದ ಇತ್ತೀಚಿನ ನಿರ್ಧಾರಕ್ಕೆ ಬದ್ಧವಾಗಿ ಮಂಗಳೂರಿನಲ್ಲಿ ಹೊಸ ಆಯುರ್ವೇದ ಕಾಲೇಜು ಸ್ಥಾಪನೆಯ ಪ್ರಸ್ತಾವವನ್ನು ರದ್ದು ಮಾಡಬೇಕು. ಆದರೆ ಉಡುಪಿ ಆಯುರ್ವೇದ ಕಾಲೇಜಿನಲ್ಲಿ ಸೀಟುಗಳ ಸಂಖ್ಯೆಯನ್ನು ಹೆಚ್ಚಿಸಬೇಕು
• ರಾಜ್ಯದ ವಿವಿಧ ವೈದ್ಯಕೀಯ ಹಾಗೂ ದಂತ ವೈದ್ಯಕೀಯ ಕಾಲೇಜುಗಳಲ್ಲಿನ ಸೀಟುಗಳ ಸಂಖ್ಯೆಯನ್ನು ಏರಿಸಬೇಕು. ಕಿದ್ವಾಯಿ ಸ್ಮಾರಕ ಗ್ರಂಥಿ ಸಂಸ್ಥೆಯ ಅನಸ್ತೇಷಿಯಾ, ರೇಡಿಯಾಲಜಿ, ಪ್ಯಾಥಾಲಜಿ ಹಾಗೂ ಮೈಕ್ರೋಬಯಾಲಜಿ ಸ್ನಾತಕೋತ್ತರ ತರಗತಿಗಳಲ್ಲಿ ಸೀಟುಗಳ ಸಂಖ್ಯೆ ಹೆಚ್ಚಿಸಲಾಗಿದೆ. ಗುಲ್ಬರ್ಗಾದ ಎಂ.ಆರ್‌.ಮೆಡಿಕಲ್‌ ಕಾಲೇಜು, ದಾವಣಗೆರೆಯ ಜೆಜೆಎಂ ಮೆಡಿಕಲ್‌ ಕಾಲೇಜು ಹಾಗೂ ಬೆಂಗಳೂರು ಕಮ್ಯಾಂಡ್‌ ಹಾಸ್ಪಿಟಲ್‌ಗಳಲ್ಲೂ ಸೀಟುಗಳ ಸಂಖ್ಯೆ ಹೆಚ್ಚಿಸಲಾಗಿದೆ

ರಾಯಚೂರಲ್ಲಿ ಸೂಪರ್‌ ಸ್ಪೆಷಾಲಿಟಿ ಒಪೆಕ್‌ ಆಸ್ಪತ್ರೆ ನಡೆಸುವಂತೆ ಕೋರಿ ಹೈದರಾಬಾದ್‌ ಮೂಲದ ಅಪೊಲೋ ಗ್ರೂಪ್‌ ಆಫ್‌ ಹಾಸ್ಪಿಟಲ್‌ ಜೊತೆ ರಾಜ್ಯ ಸರ್ಕಾರ ಮಾತುಕತೆ ನಡೆಸಿದೆ ಎಂದು ವಾರ್ತಾ ಸಚಿವರು ತಿಳಿಸಿದರು. ಇಲ್ಲಿ ಆಸ್ಪತ್ರೆ ನಡೆಸಲು ಬೆಂಗಳೂರಿನ ಮಲ್ಯ ಸೇರಿದಂತೆ 7 ವೈದ.್ಯಕೀಯ ಸಂಸ್ಥೆಗಳು ಅರ್ಜಿ ಸಲ್ಲಿಸಿದ್ದವು. ಈ ಪೈಕಿ ಹೈದರಾಬಾದಿನ ಅಪೊಲೋ ಸೂಕ್ತವೆನಿಸಿದ ಕಾರಣ ಸರ್ಕಾರ ಈ ಹೆಜ್ಜೆ ಇಟ್ಟಿದೆ.

(ಇನ್ಫೋ ವಾರ್ತೆ)