ಸತ್ಯಸಾಯಿ ಹೈಟೆಕ್‌ ಆಸ್ಪತ್ರೆ ವಿದ್ಯುತ್‌ ಬಿಲ್‌ ಹೊರೆ ಹೊತ್ತ ಸರ್ಕಾರ

ಬೆಂಗಳೂರು : ಬಡವರು ಹಾಗೂ ದುಡಿಯುವ ವರ್ಗಕ್ಕೆ ಉಚಿತ ಚಿಕಿತ್ಸಾ ಸೌಲಭ್ಯ ಕಲ್ಪಿಸುತ್ತಿರುವ ಸತ್ಯ ಸಾಯಿಬಾಬಾ ಸೂಪರ್‌ ಸ್ಪೆಷಾಲಿಟಿ ಆಸ್ಪತ್ರೆಯ ವಾರ್ಷಿಕ ವಿದ್ಯುತ್‌ ವೆಚ್ಚವನ್ನು ಗರಿಷ್ಠ 2 ಕೋಟಿ ರುಪಾಯಿಗಳವರೆಗೆ ಭರಿಸಲು ರಾಜ್ಯ ಸರ್ಕಾರ ನಿರ್ಧರಿಸಿದೆ.

ಎರಡು ಕೋಟಿ ರುಪಾಯಿಗಿಂತ ಹೆಚ್ಚಾದ ವಿದ್ಯುತ್‌ ಬಿಲ್ಲನ್ನು ಆಸ್ಪತ್ರೆಯೇ ಭರಿಸುತ್ತದೆ. ಮುಖ್ಯಮಂತ್ರಿ ಕೃಷ್ಣ ನೇತೃತ್ವದಲ್ಲಿ ಗುರುವಾರ ಸೇರಿದ ಸಂಪುಟ ಸಭೆ ಈ ತೀರ್ಮಾನವನ್ನು ಕೈಗೊಂಡಿದೆ. ಸಂಪುಟ ಸಭೆಯ ನಂತರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ವಾರ್ತಾ ಸಚಿವ ಪ್ರೊ. ಬಿ.ಕೆ. ಚಂದ್ರಶೇಖರ್‌ ಈ ವಿಷಯವನ್ನು ಸುದ್ದಿಗಾರರಿಗೆ ತಿಳಿಸಿದರು.

ದುಬಾರಿ ಚಿಕಿತ್ಸೆ ಕೈಗೆಟುಕದ ಮಂದಿಗೆ ನೆರವಾಗುವ ಹಿನ್ನೆಲೆಯಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಸಾಯಿಬಾಬಾ ಹೈಟೆಕ್‌ ಆಸ್ಪತ್ರೆ, ವಿದ್ಯುತ್‌ ಬಿಲ್ಲನ್ನು ಭರಿಸುವಂತೆ ರಾಜ್ಯ ಸರ್ಕಾರವನ್ನು ಕೋರಿತ್ತು . ಈ ಹಿನ್ನೆಲೆಯಲ್ಲಿ ಸಂಪುಟ ಸಭೆ, 2 ಕೋಟಿ ರು.ಗಳವರೆಗೆ ವಿದ್ಯುತ್‌ ಬಿಲ್ಲನ್ನು ಭರಿಸಲು ನಿರ್ಧರಿಸಿದೆ. 120 ತುರ್ತು ಚಿಕಿತ್ಸಾ ಹಾಸಿಗೆಗಳು ಸೇರಿದಂತೆ 333 ಹಾಸಿಗೆಗಳನ್ನು ಹೊಂದಿರುವ ಆಸ್ಪತ್ರೆ, ಹೃದ್ರೋಗ ಸಂಬಂಧಿ ದುಬಾರಿ ಮೊತ್ತದ ಕಾಯಿಲೆಗಳಿಗೆ ಉಚಿತ ಹಾಗೂ ಹೈಟೆಕ್‌ ಚಿಕಿತ್ಸೆ ನೀಡುತ್ತಿದೆ.

(ಇನ್ಫೋ ವಾರ್ತೆ)