ದೂ.ದ. ಲಂಚ ಪ್ರಕರಣ : ಕಮಲಾ ಹೆಮ್ಮಿಗೆಗೆ 3 ವರ್ಷ ಜೈಲು

ಬೆಂಗಳೂರು : ದೂರದರ್ಶನ ಧಾರಾವಾಹಿ ಪ್ರಸಾರ ಸಂಬಂಧ ಲಂಚ ಪಡೆದಿದ್ದಾರೆ ಎನ್ನುವ ಆರೋಪವನ್ನು ಎದುರಿಸುತ್ತಿದ್ದ ಪ್ರಸಾರ ಭಾರತಿ ಕಾರ್ಯಕ್ರಮದ ಅಧಿಕಾರಿ ಕಮಲಾ ಹೆಮ್ಮಿಗೆ ಅವರಿಗೆ ಸಿಬಿಐ ನಿಯೋಜಿತ ನ್ಯಾಯಾಲಯ ಮೂರು ವರ್ಷಗಳ ಕಠಿಣ ಜೈಲು ಶಿಕ್ಷೆ ಹಾಗೂ 5 ಸಾವಿರ ರುಪಾಯಿಗಳ ದಂಡ ವಿಧಿಸಿ ಆದೇಶ ಹೊರಡಿಸಿದೆ.

ಹಣ ನೀಡಲು ವಿಫಲರಾದಲ್ಲಿ ಮತ್ತೆ ಮೂರು ತಿಂಗಳ ಕಾಲ ಆಪಾದಿತರು ಕಠಿಣ ಶಿಕ್ಷೆಯನ್ನು ಅನುಭವಿಸಬೇಕು ಎಂದು ತೀರ್ಮಾನ ನೀಡಿರುವ ನ್ಯಾಯಮೂರ್ತಿ ಜಿ.ಟಿ. ವೀರಭದ್ರಪ್ಪ ತಮ್ಮ ಆದೇಶದಲ್ಲಿ ತಿಳಿಸಿದ್ದಾರೆ. ಪೊಲೀಸ್‌ ಮುಖ್ಯಸ್ಥ ಕೆ.ವೈ. ಗುರುಪ್ರಸಾದ್‌ ಪ್ರಕರಣದ ವಿಚಾರಣೆ ನಡೆಸಿ, ಆರೋಪ ಪಟ್ಟಿ ಸಲ್ಲಿಸಿದ್ದರು.

1992 ರಲ್ಲಿ ಲಂಚ ಸ್ವೀಕರಿಸಿದ ಆರೋಪವನ್ನು ಕಮಲಾ ಹೆಮ್ಮಿಗೆ ಎದುರಿಸಿದ್ದರು. ಮೈಲಾರಿ ಸರಸ ಎನ್ನುವ ಧಾರಾವಾಹಿ ಪ್ರಸಾರ ಸಂಬಂಧಿಸಿದಂತೆ ಧಾರಾವಾಹಿಯ ನಿರ್ಮಾಪಕರಿಂದ ಲಂಚದ ಪ್ರಥಮ ಕಂತು 10 ಸಾವಿರ ರುಪಾಯಿ ಪಡೆಯುವಾಗ ಸಿಕ್ಕಿಬಿದ್ದಿದ್ದ ಹೆಮ್ಮಿಗೆ, ಧಾರಾವಾಹಿ ಪ್ರಸಾರಕ್ಕೆ 50 ಸಾವಿರ ರುಪಾಯಿ ಲಂಚ ಕೇಳಿದ್ದರು ಎನ್ನುವ ಆರೋಪ ಎದುರಿಸಿದ್ದರು.

(ಇನ್ಫೋ ವಾರ್ತೆ)