ಅಂತರಿಕ್ಷದಲ್ಲಿ ಜಿ ಸ್ಯಾಟ್‌1 ಕ್ಷೇಮ, ಉಭಯಕುಶಲೋಪರಿ ಸಾಂಪ್ರತ

ಬೆಂಗಳೂರು : ಶ್ರೀಹರಿಕೋಟಾದಿಂದ ಬುಧವಾರ ಗಗನಕ್ಕೆ ಚುಮ್ಮಿದ ಜಿ.ಎಸ್‌.ಎಲ್‌.ವಿ. ಉಪಗ್ರಹ ವಾಹನ ತಾನು ಹೊತ್ತೊಯ್ದ ಜಿ. ಸ್ಯಾಟ್‌ ಉಪಗ್ರಹವನ್ನು ನಿಗದಿತ ಕಕ್ಷೆ ತಲುಪಿಸುವಲ್ಲಿ ಯಶಸ್ವಿಯಾಗಿದೆ.

ತನ್ನ ಕಕ್ಷೆ ಸೇರಿದ ಉಪಗ್ರಹವು ಉತ್ತಮವಾಗಿ ಕಾರ್ಯ ನಿರ್ವಹಿಸುತ್ತಿದೆ. ಬುಧವಾರ ತನ್ನ ಕಕ್ಷೆ ಸೇರಿದ ಉಪಗ್ರಹವನ್ನು ಗುರುವಾರ ಬೆಳಗ್ಗೆ 5ಗಂಟೆ 5 ನಿಮಿಷಕ್ಕೆ ಭೂಸಮನ್ವಿತ ಕಕ್ಷೆಗೆ ತಲುಪಿಸುವಲ್ಲಿ ಹಾಸನದಲ್ಲಿರುವ ಇಸ್ರೋ ಕೇಂದ್ರದ ವಿಜ್ಞಾನಿಗಳು ಯಶಸ್ವಿಯಾಗಿದ್ದಾರೆ.

ನಾನೂರು ಟನ್‌ ತೂಕ ಹಾಗೂ 49.1 ಮೀಟರ್‌ ಉದ್ದದ ಜಿ.ಎಸ್‌.ಎಲ್‌.ವಿ. ಹೊತ್ತೊಯ್ದ 1540 ಕೆ.ಜಿ. ತೂಕದ ಪ್ರಾಯೋಗಿಕ ಸಂಪರ್ಕ ಉಪಗ್ರಹ ಜಿಸ್ಯಾಟ್‌ -1 ಹಾಲಿ 3000 ಕಿ.ಮೀಟರ್‌ ದೂರದಲ್ಲಿರುವ ಕಕ್ಷೆಯಲ್ಲಿದ್ದು, ಇದನ್ನು ಇನ್ನೂ ಎತ್ತರದ ಕಕ್ಷೆಗೆ ಸೇರಿಸುವ ಕಾರ್ಯ ಗುರುವಾರ ರಾತ್ರಿ 9.20ರ ನಂತರ ಆರಂಭವಾಗಲಿದೆ ಎಂದು ಮೂಲಗಳು ತಿಳಿಸಿವೆ.

ಪ್ರಶಂಸೆ : ಜಿ. ಸ್ಯಾಟ್‌ 1 ಉಪಗ್ರಹವು ಇಂಟರ್‌ನೆಟ್‌ ಸೇವೆಗೆ ಹೆಚ್ಚಿನ ಅನುಕೂಲ ಕಲ್ಪಿಸಲಿದೆ. ಭಾರತದ ವಿಜ್ಞಾನಿಗಳು ಮಾಡಿದ ಈ ಸಾಧನೆಯನ್ನು ಲೋಕಸಭೆ ಹಾಗೂ ರಾಜ್ಯಸಭೆಯಲ್ಲಿ ಮುಕ್ತಕಂಠದಿಂದ ಪ್ರಶಂಸಿಸಲಾಯಿತು.

ಪ್ರಧಾನಿ ಅಟಲ್‌ ಬಿಹಾರಿ ವಾಜಪೇಯಿ, ಕಾಂಗ್ರೆಸ್‌ ರಾಷ್ಟ್ರೀಯ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರು ಇಸ್ರೋ ವಿಜ್ಞಾನಿಗಳ ಈ ಸಾಧನೆಯನ್ನು ಕೊಂಡಾಡಿದರು.

ಕೃಷ್ಣ ಅಭಿನಂದನೆ : ಉಪಗ್ರಹವನ್ನು ಯಶಸ್ವಿಯಾಗಿ ಅಂತರಿಕ್ಷಕ್ಕೆ ಹಾರಿಸಿದ ಭಾರತೀಯ ಬಾಹ್ಯಾಕಾಶ ವಿಜ್ಞಾನಿಗಳನ್ನು ರಾಜ್ಯದ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಅಭಿನಂದಿಸಿದ್ದಾರೆ. ಭಾರತೀಯ ವಿಜ್ಞಾನಿಗಳ ಈ ಸ್ವಾವಲಂಬಿ ಸಾಧನೆ ಒಂದು ಐತಿಹಾಸಿಕ ಸಾಧನೆ ಎಂದು ಇಸ್ರೋ ಅಧ್ಯಕ್ಷ ಡಾ. ಕಸ್ತೂರಿ ರಂಗನ್‌ ಅವರಿಗೆ ಬರೆದಿರುವ ಅಭಿನಂದನಾ ಪತ್ರದಲ್ಲಿ ತಿಳಿಸಿದ್ದಾರೆ.
(ಇನ್‌ಫೋ ವಾರ್ತೆ)

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...