ಕರಾವಳಿ ಕ್ಲಿನಿಕ್‌ನ 5 ಕ್ರಿಕೆಟಿಗರು ಆಸ್ಟ್ರೇಲಿಯಾದಲ್ಲಿ ನಾಪತ್ತೆ

ಅಡಿಲೇಡ್‌ : ಕರ್ನಾಟಕದ ಕರಾವಳಿ ಕ್ರಿಕೆಟ್‌ ಕ್ಲಿನಿಕ್‌ನಿಂದ ಆಸ್ಟ್ರೇಲಿಯನ್‌ ಕ್ರಿಕೆಟ್‌ ಅಕಾಡೆಮಿಗೆ ತರಪೇತಿಗಾಗಿ ಕಳುಹಿಸಲಾಗಿರುವ ಐವರು ಕ್ರಿಕೆಟಿಗರು ನಾಪತ್ತೆಯಾಗಿದ್ದಾರೆ.

ಗುರುವಾರ ಅಕಾಡೆಮಿ ಈ ವಿಷಯವನ್ನು ತಿಳಿಸಿದೆ. ವಲಸೆ ಇಲಾಖೆ ಅಧಿಕಾರಿಗಳ ಪ್ರಕಾರ ಮಾರ್ಚ್‌ 25 ರಂದು ಮೂವರು ಮಧ್ಯಮ ವೇಗದ ಬೌಲರ್‌ಗಳು, ಒಬ್ಬ ಬ್ಯಾಟ್ಸ್‌ಮನ್‌ ಹಾಗೂ ಒಬ್ಬ ಕೀಪರ್‌ ಆಸ್ಟ್ರೇಲಿಯಾಕ್ಕೆ ಬಂದಿಳಿದಿದ್ದಾರೆ. ಆದರೆ ಅಕಾಡೆಮಿಯ ಮುಖ್ಯ ತರಪೇತುದಾರ ವೇಯ್ನೆ ಫಿಲಿಪ್ಸ್‌ ಪ್ರಕಾರ- ಏರ್‌ಪೋರ್ಟ್‌ಗೆ ಆಟಗಾರರನ್ನು ಕರೆತರಲು ತಾವೇ ಹೋಗಿದ್ದು, ಭಾರತದಿಂದ ಯಾವ ಆಟಗಾರರನ್ನೂ ತಾವು ನೋಡಲಿಲ್ಲ.

ಆಟಗಾರರಿಗೆ ಏನಾಗಿದೆ ? ಎಲ್ಲಿದ್ದಾರೆ? ಒಂದೂ ನನಗೆ ಗೊತ್ತಿಲ್ಲ. ಈ ಬಗ್ಗೆ ವಲಸೆ ಇಲಾಖೆ ಮತ್ತು ವಿದೇಶೀ ವ್ಯವಹಾರಗಳ ಇಲಾಖೆ ಹೇಳಬೇಕು. ನಮಗೆ ಆಟಗಾರರ ಸುರಕ್ಷತೆ ಬಹು ಮುಖ್ಯ. ಈ ಕಾರಣ ಇಲಾಖೆಗಳು ಆಟಗಾರರ ನಾಪತ್ತೆ ವಿಷಯವನ್ನು ಗಂಭೀರವಾಗಿ ಪರಿಗಣಿಸಬೇಕು. ಕರಾವಳಿ ಕ್ರಿಕೆಟ್‌ ಕ್ಲಿನಿಕ್ಕನ್ನೂ ನಾನು ಸಂಪರ್ಕಿಸಿದ್ದು, ಆಟಗಾರರೂ ಅಲ್ಲಿಗೂ ಸಂಪರ್ಕಿಸಿಲ್ಲ ಎನ್ನುತ್ತಾರೆ ಫಿಲಿಪ್ಸ್‌.

(ಎಎಫ್‌ಪಿ)