ಶಾರ್ಜಾದಲ್ಲಿ ಸಚಿನ್‌ ಇದ್ದಿದ್ದರೆ... ಜಿಯಾಗೂ ಹೀಗನ್ನಿಸುತ್ತಿರಬಹುದೆ?

ಶಾರ್ಜಾ : ಪ್ರಸ್ತುತ ಇಲ್ಲಿ ನಡೆಯುತ್ತಿರುವ ತ್ರಿಕೋನ ಸರಣಿ ನೀರಸ ಅನ್ನಿಸುತ್ತಿದೆ. ಏಕಮುಖವಾದ ಪಂದ್ಯಗಳಲ್ಲಿ ಸದ್ಯಕ್ಕೆ ಪಾಕಿಸ್ತಾನವೇ ದೊರೆ. ಪೋಟಿಯೇ ಇಲ್ಲದ ಪಂದ್ಯಗಳು ಮಜಾ ಕೊಡುತ್ತಿಲ್ಲ. ಅಲ್ಲಿ ತೆಂಡೂಲ್ಕರ್‌ ಇದ್ದಿದ್ದರೆ... ಎಂಬಂಥಾ ಮಾತುಗಳು ಸರ್ವೇ ಸಾಮಾನ್ಯ.

ಭಾರತದೊಟ್ಟಿಗೆ ಇನ್ನು ಮುಂದೆ ಪಾಕ್‌ ಎಲ್ಲೂ ಕ್ರಿಕೆಟ್ಟೇ ಆಡೋದಿಲ್ಲ ಅಂತ ಎದೆ ತಟ್ಟಿಕೊಂಡು ಹೇಳಿದ್ದ ಪಾಕಿಸ್ತಾನ ಕ್ರಿಕೆಟ್‌ ಮಂಡಳಿ (ಪಿಸಿಬಿ) ಅಧ್ಯಕ್ಷ ತಾಕ್ವಿರ್‌ ಜಿಯಾ ಕೂಡ ತಮ್ಮ ಪಟ್ಟು ಸಡಿಲಿಸಿದ್ದಾರೆ. ಭಾರತ- ಪಾಕ್‌ ಆಟದ ಮಜಾ ಅವರಿಗೂ ಬೇಕು ಅನ್ನೋದನ್ನ ಅವರ ಈ ಮಾತುಗಳು ಸ್ಪಷ್ಟಪಡಿಸುತ್ತವೆ-

• ನಮಗೇನೋ ಆಡಲು ಇಷ್ಟ . ಆದರೆ ಭಾರತದ ಕಥೆಯೇನು?
• 2 ವರ್ಷಗಳಿಂದ ಪಾಕ್‌ ವಿರುದ್ಧ ಭಾರತ ಕ್ರಿಕೆಟ್ಟಾಡದಿರುವುದು, ಬರುವ ಆಗಸ್ಟ್‌ನಲ್ಲಿ ನಡೆಯಲಿರುವ ಏಷ್ಯನ್‌ ಟೆಸ್ಟ್‌ ಚಾಂಪಿಯನ್‌ಷಿಪ್‌ನಲ್ಲೂ ಭಾರತ ಆಡುವುದರ ಬಗ್ಗೆ ಅತೀವ ಅನುಮಾನ ಹುಟ್ಟಿಸಿದೆ
• ಅನಿಯಮಿತ ಸ್ಥಳಗಳಲ್ಲಿ ನಡೆಯಬೇಕಿರುವ ಏಷ್ಯನ್‌ ಟೆಸ್ಟ್‌ ಚಾಂಪಿಯನ್‌ಷಿಪ್‌ ವಿಷಯದಲ್ಲಿ ಅಂತಿಮ ತೀರ್ಮಾನ ಕೈಗೊಳ್ಳಲು ಭಾರತ, ಪಾಕಿಸ್ತಾನ, ಶ್ರೀಲಂಕಾ ಹಾಗೂ ಬಾಂಗ್ಲಾದೇಶದ ಅಧಿಕಾರಿಗಳು ಈ ವಾರ ಸಭೆ ಸೇರಬೇಕಿತ್ತು. ಆದರೆ ನಿರ್ಣಯ ಕಾರ್ಯಗತವಾಗುವ ಕಿಂಚಿತ್ತೂ ನಿರೀಕ್ಷೆಯಿಲ್ಲದಿರುವ ಈ ಸಂದರ್ಭದಲ್ಲಿ ಸಭೆ ನಿರರ್ಥಕ
• ಭಾರತ ಕೂಡ ಈ ಚಾಂಪಿಯನ್‌ಷಿಪ್‌ ಬಗ್ಗೆ ಎಳ್ಳಷ್ಟೂ ಯೋಚಿಸದೆ ಈಗಾಗಲೇ ವಿವಿಧ ಪ್ರವಾಸಗಳಿಗೆ ಅಣಿಯಾಗಿಬಿಟ್ಟಿದೆ. ಮೇ- ಜೂನ್‌ನಲ್ಲಿ ಜಿಂಬಾಬ್ವೆ, ಜುಲೈ- ಆಗಸ್ಟ್‌ನಲ್ಲಿ ಶ್ರೀಲಂಕಾ ಪ್ರವಾಸಕ್ಕೆ ಭಾರತ ತಂಡ ಸಿದ್ಧವಾಗಿದೆ. ಮೆಲ್ಬೋರ್ನ್‌ನ ಕೊಲೋನಿಯಲ್‌ ಸ್ಟೇಡಿಯಂ ಹಾಗೂ ಬ್ರಿಸ್ಬೇನ್‌ನ ಒಳಾಂಗಣ ಕ್ರೀಡಾಕಣದಲ್ಲಿ ಬರುವ ಸೆಪ್ಟೆಂಬರ್‌ ತಿಂಗಳಲ್ಲಿ ಭಾರತ- ಆಸ್ಟ್ರೇಲಿಯಾ ಸೆಣಸು ನಡೆಯುವ ಸಾಧ್ಯತೆಗಳೂ ಇವೆ.
• ಬರುವ ವರ್ಷ ಭಾರತದಲ್ಲಿ ನಡೆಯಲಿರುವ ಐಸಿಸಿ ನಾಕ್‌ಔಟ್‌ ಟೂರ್ನಿಯಲ್ಲಿ ಪಾಕಿಸ್ತಾನ ಭಾಗವಹಿಸುವುದರ ಬಗೆಗೂ ಅನುಮಾನಗಳಿವೆ
• ನನ್ನ ಮೊದಲ ಪ್ರತಿಕ್ರಿಯೆ- ಭಾರತದಲ್ಲಿ ಆಡುವುದು ಬೇಡ ಎಂಬುದು. ಆದರೆ ಸರ್ಕಾರ ನಿರ್ದೇಶಿಸಿದಲ್ಲಿ ನಾವು ಆಡಲೇ ಬೇಕಾಗುತ್ತದೆ
• ಐಸಿಸಿ ಅಭಿವೃದ್ಧಿಗಾಗಿ ದೇಣಿಗೆ ಸಂಗ್ರಹಿಸಲು, ಪ್ರತಿ 2 ವರ್ಷಗಳಿಗೊಮ್ಮೆ 10 ಟೆಸ್ಟ್‌ ಕ್ರಿಕೆಟ್‌ ತಂಡಗಳು ಸೆಣಸುತ್ತವೆ. ಆದರೆ ಮುಂದೇನು? ನೆರೆದೇಶಗಳ ತಾಪತ್ರಯ, ಭಿನ್ನಾಭಿಪ್ರಾಯಗಳನ್ನು ಹೋಗಲಾಡಿಸಲು ಫುಟ್‌ಬಾಲ್‌ ಆಡಳಿತ ‘ಫಿಫಾ’ ಮಾದರಿಯಲ್ಲಿ ಐಸಿಸಿ ಕೂಡ ಸುಧಾರಣೆಗಳನ್ನು ತಂದುಕೊಳ್ಳಬೇಕು. ಫಿಫಾದ ಕೆಲವು ನಿರ್ದೇಶನ ಹಾಗೂ ತತ್ತ್ವಗಳನ್ನು ಐಸಿಸಿ ಅಳವಡಿಸಿಕೊಂಡಲ್ಲಿ ಸಮಸ್ಯೆಗಳನ್ನು ಬಗೆಹರಿಸಬಹುದು
• ಇನ್ನು 3 ವರ್ಷಗಳ ಕಾಲ ಶಾರ್ಜಾ, ಟೊರಾಂಟೋ ಮೊದಲಾದ ಅನಿಯಮಿತ ಸ್ಥಳಗಳಲ್ಲಿ ಕ್ರಿಕೆಟ್‌ ಆಡೆವು ಎಂಬ ಭಾರತದ ನಿರ್ಧಾರದ ಹಿಂದೆ ಪಾಕಿಸ್ತಾನದೊಟ್ಟಿಗೆ ಆಡಕೂಡದೆಂಬ ಛಾಯೆ ಇದೆ
• ಪಾಕ್‌ ಒಟ್ಟಿಗೆ ಕ್ರಿಕೆಟ್‌ ಆಡಕೂಡದೆಂಬುದೇ ಭಾರತದ ಮೊದಲ ಪಟ್ಟಾಗಿತ್ತು. ಆದರೆ ಐಸಿಸಿ ಅಧ್ಯಕ್ಷ ಮಾಲ್ಕಂ ಗ್ರೇ ಭಾರತಕ್ಕೆ ಭೆಟ್ಟಿ ಕೊಟ್ಟಾಗ, ಅದು ತನ್ನ ವರಸೆ ಬದಲಿಸಿ ಅನಿಯಮಿತ ಜಾಗೆಗಳಲ್ಲಿ ಆಡೆವು ಎಂದು ಠರಾವು ಹೊರಡಿಸಿತು

ಭಾರತ- ಪಾಕ್‌ ಕ್ರಿಕೆಟ್ಟಿನ ಮಜಾ ಅನುಭವಿಸಲು ಕ್ರಿಕೆಟ್‌ ಅಭಿಮಾ-ನಿಗಳು ಹಪಹಪಿಸುತ್ತಿರುವ ಈ ಹೊತ್ತಿನಲ್ಲಿ ಈ ವಿಷಯದ ಪರಿವೇ ತನಗಿಲ್ಲವೆಂಬಂತೆ ಕ್ರೀಡಾ ಸಚಿವೆ ಉಮಾ ಭಾರತಿ ಮುಗುಮ್ಮಾಗಿಬಿಟ್ಟಿದ್ದಾರೆ. ಬೆನ್ನುನೋವಿನ ಕಾರಣ, ತಾವು ಓಡಾಡಲು 9 ಲಕ್ಷ ರುಪಾಯಿ ಬೆಲೆಯ ಟಾಟಾ ಸಿಯೆರಾ ಕಾರು ಬೇಕೆಂದು ಪಟ್ಟು ಹಿಡಿದು, ಅದನ್ನು ಹೆಚ್ಚೂ ಕಡಿಮೆ ದಕ್ಕಿಸಿಕೊಂಡಿದ್ದಾರೆ. ಆದರೆ ಭಾರತ- ಪಾಕ್‌ ಇನ್ನೆಂದೂ ಸೆಣೆಸುವುದೇ ಇಲ್ಲವೇ ? ಕ್ರೀಡೆಗೆ ರಾಜಕೀಯದ ಲೇಪ ಬೇಕೆ ? ಜಿಜ್ಞಾಸೆಗಳಿಗೆ ನೀವೇ ಜೀವ ತುಂಬಿ.

(ಎಎಫ್‌ಪಿ)

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...