ಕೃಷ್ಣ ನಾಯಕತ್ವದಲ್ಲಿ ವಿಶ್ವಾಸ, ಕಾಂಗ್ರೆಸ್‌ಗೆ ಬಿ.ಬಿ. ಶಿವಪ್ಪ

ಬೆಂಗಳೂರು : ಕೆಪಿಸಿಸಿ ನೂತನ ಅಧ್ಯಕ್ಷರಾದ ತೋಟಗಾರಿಕೆ ಸಚಿವ ಅಲ್ಲಂ ವೀರಭದ್ರಪ್ಪ , ಅಧ್ಯಕ್ಷ ಗಾದಿಯನ್ನೇರುವ ಒಂದು ದಿನ ಮೊದಲು ಬಿಜೆಪಿಯಿಂದ ಉಚ್ಛಾಟಿತರಾಗಿರುವ ಸಕಲೇಶಪುರದ ಶಾಸಕ ಬಿ.ಬಿ. ಶಿವಪ್ಪ ಕಾಂಗ್ರೆಸ್‌ ಪಕ್ಷ ಸೇರಿದ್ದಾರೆ.

ನೂರಾರು ಮಂದಿ ಕಟ್ಟಾ ಅನುಯಾಯಿಗಳು ಹಾಗೂ ಅಭಿಮಾನಿಗಳೊಂದಿಗೆ ಶಿವಪ್ಪ ಭಾನುವಾರ ವಿಧ್ಯುಕ್ತವಾಗಿ ಕಾಂಗ್ರೆಸ್‌ ಪಕ್ಷ ಸೇರಿದರು. ಇದರೊಂದಿಗೆ ಬಿಜೆಪಿಯಿಂದ ಅಮಾನತ್ತುಗೊಂಡ ನಂತರ ಯಾವ ಪಕ್ಷಕ್ಕೂ ಸೇರದೆ ಗೊಂದಲದಲ್ಲಿದ್ದ ಶಿವಪ್ಪನವರ ಅಜ್ಞಾತವಾಸ ಕೊನೆಗೊಂಡಿದೆ.

ಶಿವಪ್ಪನವರು ಕಾಂಗ್ರೆಸ್‌ಗೆ ಸೇರ್ಪಡೆಗೊಳ್ಳುವ ಸಂದರ್ಭದಲ್ಲಿ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ , ಕೆಪಿಸಿಸಿ ಅಧ್ಯಕ್ಷ ಅಲ್ಲಂ ವೀರಭದ್ರಪ್ಪ ಮತ್ತಿತರ ಧುರೀಣರು ಹಾಜರಿದ್ದರು. ತಾವು ಯಾವುದೇ ಪ್ರತಿಫಲಾಪೇಕ್ಷೆಯಿಲ್ಲದೆ ಕಾಂಗ್ರೆಸ್‌ಗೆ ಸೇರ್ಪಡೆಗೊಳ್ಳುತ್ತಿರುವುದಾಗಿ ಶಿವಪ್ಪ ಈ ಮುನ್ನವೇ ಪ್ರಕಟಿಸಿದ್ದರೂ, ಶಿವಪ್ಪನವರಿಗೆ ಕಾಂಗ್ರೆಸ್‌ನಲ್ಲಿ ಗಣನೀಯ ಸ್ಥಾನ ನೀಡುವ ಸಂಭವವಿದೆ ಎನ್ನಲಾಗಿದೆ.

ಶನಿವಾರ ನಡೆದ ಸಭೆಯಾಂದರಲ್ಲಿ ಶಿವಪ್ಪನವರನ್ನು ಕಾಂಗ್ರೆಸ್‌ ಪಕ್ಷದ ಅಲ್ಲಂ ವೀರಭದ್ರಪ್ಪ ಅವರ ಅಧಿಕಾರ ಸ್ವೀಕಾರದ ಮುನ್ನಾದಿನ ಸಹಸದಸ್ಯನನ್ನಾಗಿ ಸೇರಿಕೊಳ್ಳಲು ನಿರ್ಧರಿಸಲಾಗಿತ್ತು . ಶಿವಪ್ಪನವರ ಅಮಾನತು ಆದೇಶವನ್ನು ಬಿಜೆಪಿ ವಾಪಸ್ಸು ಪಡೆಯಬಹುದೆನ್ನುವ ನಿರೀಕ್ಷೆಯಲ್ಲಿ ಈ ತರಾತುರಿ ತೀರ್ಮಾನವನ್ನು ಕೈಗೊಳ್ಳಲಾಗಿದೆ.

(ಇನ್ಫೋ ವಾರ್ತೆ)