ಜಯಲಲಿತಾ ಚುನಾವಣೆಯಲ್ಲಿ ಸ್ಪರ್ಧಿಸುವಂತಿಲ್ಲ - ಹೈಕೋರ್ಟ್‌

ಚೆನ್ನೈ : ಎಐಎಡಿಎಂಕೆ ನಾಯಕಿ ಹಾಗೂ ಮುಖ್ಯಮಂತ್ರಿ ಸ್ಥಾನಕ್ಕೆ ಕರುಣಾನಿಧಿಯವರ ಪ್ರಬಲ ಎದುರಾಳಿ ಜೆ. ಜಯಲಲಿತಾ ಅವರಿಗೆ ಮೇ. 10 ರಂದು ನಡೆಯುವ ತಮಿಳುನಾಡು ವಿಧಾನಸಭೆಯ ಚುನಾವಣೆಗಳಲ್ಲಿ ಸ್ಪರ್ಧಿಸುವ ಅವಕಾಶವನ್ನು ರಾಜ್ಯ ಹೈಕೋರ್ಟ್‌ ನಿರಾಕರಿಸಿದೆ.

ಚುನಾವಣೆಯಲ್ಲಿ ಸ್ಪರ್ಧಿಸುವ ಬಗ್ಗೆ ಬುಧವಾರ ಹೈಕೋರ್ಟ್‌ ನೀಡಿದ್ದ ತೀರ್ಮಾನ ಕಾನೂನು ಪರಿಣತರಲ್ಲಿ ಗೊಂದಲ ಮೂಡಿಸಿತ್ತು . ತಾನ್ಸಿ ಭೂಹಗರಣ ಸಂಬಂಧ ಚುನಾವಣೆಯಲ್ಲಿ ಸ್ಪರ್ಧಿಸಲು ತೊಡಕು ಉಂಟಾಗಿರುವುದರಿಂದ, ನ್ಯಾಯಾಲಯ ಚುನಾವಣೆಯಲ್ಲಿ ಸ್ಪರ್ಧಿಸಲು ಅನುವು ಮಾಡಿಕೊಬೇಕು ಎಂದು ಜಯಲಲಿತಾ ನ್ಯಾಯಾಲಯದ ಕಟ್ಟೆ ಹತ್ತಿದ್ದರು.

ಬುಧವಾರ, ಜಯಲಲಿತಾ ಅವರ ಅರ್ಜಿಯನ್ನು ಹೈಕೋರ್ಟ್‌ ರದ್ದು ಮಾಡಿ, ಚುನಾವಣೆಯಲ್ಲಿ ಸ್ಪರ್ಧಿಸುವ ಬಗೆಗೆ ಚುನಾವಣಾ ಆಯೋಗ ನಿರ್ಣಯ ಕೈಗೊಳ್ಳಬೇಕೆಂದು ಸೂಚಿಸಿತ್ತು . ಆದರೆ, ನ್ಯಾಯಾಲಯದ ಈ ನಿರ್ಣಯ ಕಾನೂನು ಪರಿಣತಿರಲ್ಲಿ ಗೊಂದಲ ಉಂಟುಮಾಡಿತ್ತು . ಗುರುವಾರ ಬೆಳಿಗ್ಗೆ ತನ್ನ ಆದೇಶವನ್ನು ಸ್ಪಷ್ಟಪಡಿಸಿದ ನ್ಯಾಯಾಲಯ, ಜಯ ಅವರಿಗೆ ಚುನಾವಣೆಯಲ್ಲಿ ಸ್ಪರ್ಧಿಸಲು ಅವಕಾಶವನ್ನು ನಿರಾಕರಿಸಿತು. ಇದರಿಂದಾಗಿ, ಜಯಲಲಿತಾ ಸುಪ್ರಿಂಕೋರ್ಟ್‌ ಮೆಟ್ಟಿಲನ್ನು ಹತ್ತುವ ಸಾಧ್ಯತೆಗಳಿವೆ.

(ಇನ್ಫೋ ವಾರ್ತೆ)