ವ್ಯಾಪಾರಿ ನೀತಿಯಲ್ಲಿ ಬದಲಾವಣೆ : ರೂಪುರೇಷೆಗೆ ಸಮಾಲೋಚನೆ

ಬೆಂಗಳೂರು : ರಾಜ್ಯವನ್ನು ಹೂಡಿಕೆ ಮಿತ್ರನನ್ನಾಗಿಸುವ ನಿಟ್ಟಿನಲ್ಲಿ ವ್ಯಾಪಾರಿ ನಿಯಂತ್ರಣ ನೀತಿಯಲ್ಲಿ ಬದಲಾವಣೆ ತರಲು ಕರ್ನಾಟಕ ಸರ್ಕಾರ ರೂಪುರೇಷೆ ಸಿದ್ಧಪಡಿಸುತ್ತಿದೆ.

ವಿವಿಧ ಇಲಾಖೆಗಳೊಂದಿಗೆ ಸಮಾಲೋಚಿಸಿ, ಕೈಗಾರಿಕಾ ಪ್ರಗತಿಗೆ ಅಗತ್ಯವಾದ ಸಲಹೆಗಳನ್ನು ಕಲೆಹಾಕಿ ಯೋಜನೆಯ ರೂಪುರೇಷೆ ಸಿದ್ಧಪಡಿಸಲಾಗುವುದು ಎಂದು ರಾಜ್ಯ ಭಾರೀ ಮತ್ತು ಮಧ್ಯಮ ಕೈಗಾರಿಕೆ ಸಚಿವ ಆರ್‌.ವಿ.ದೇಶಪಾಂಡೆ ಗುರುವಾರ ಸುದ್ದಿಗಾರರಿಗೆ ತಿಳಿಸಿದರು.

ಕೈಗಾರಿಕಾ ಹೂಡಿಕೆದಾರರ, ಅದರಲ್ಲೂ ರಫ್ತು ಉದ್ದಿಮೆಕಾರರ ಮಿತ್ರ ಕ್ಷೇತ್ರ ಹಾಸನವನ್ನು ವಿಶೇಷ ಆರ್ಥಿಕ ವಲಯ ಎಂದು ಘೋಷಿಸಬೇಕೆಂಬ ಪ್ರಸ್ತಾವನೆಯನ್ನು ಕೇಂದ್ರ ಸರ್ಕಾರಕ್ಕೆ ಸಲ್ಲಿಸಿದ್ದೇವೆ. ತಮಿಳುನಾಡು ಹಾಗೂ ಗುಜರಾತ್‌ ರಾಜ್ಯಗಳಲ್ಲಿ ಇಂಥ ವಲಯಗಳನ್ನು ಕಳೆದ ವರ್ಷದ ಬಜೆಟ್ಟಿನಲ್ಲೇ ಕೇಂದ್ರ ಸರ್ಕಾರ ಪರಿಚಯಿಸಿದೆ ಎಂದು ಸಚಿವರು ಹೇಳಿದರು.

ಏಪ್ರಿಲ್‌ 16 ಹಾಗೂ 17ರಂದು ವಿಶ್ವಬ್ಯಾಂಕ್‌ ಸಹಯೋಗದಲ್ಲಿ ಕರ್ನಾಟಕದ ಸರ್ವತೋಮುಖ ಪ್ರಗತಿಗೆ ವ್ಯಾಪಾರಿ ವಾತಾವರಣದ ಅಭಿವೃದ್ಧಿ ಎಂಬ ವಿಷಯ ಕುರಿತ ಕಮ್ಮಟವೊಂದನ್ನು ಕರ್ನಾಟಕ ಸರ್ಕಾರ ಆಯೋಜಿಸಿದೆ. ಸರ್ಕಾರದ ಪ್ರತಿನಿಧಿಗಳಲ್ಲದೆ ವಿವಿಧ ಕೈಗಾರಿಕಾ ತಜ್ಞರು ಕಮ್ಮಟದಲ್ಲಿ ತರಾವರಿ ವಿಷಯಗಳ ಬಗ್ಗೆ ಮಾತನಾಡಲಿದ್ದಾರೆ ಎಂದರು.

(ಯುಎನ್‌ಐ)