ಜಾಗತಿಕ ವಿಸ್ತರಣೆಯತ್ತ ಸ್ಥಳೀಯ ಸಾಫ್ಟ್ವೇರ್ ದೈತ್ಯ ವಿಪ್ರೋ
ಕೋಲ್ಕತಾ : ಜಾಗತಿಕ ವಿಸ್ತರಣೆಯ ಹಂಬಲದಲ್ಲಿರುವ ದೇಶೀಯ ಸಾಫ್ಟ್ವೇರ್ ದೈತ್ಯ ವಿಪ್ರೋ, ಬರುವ ಆರ್ಥಿಕ ವರ್ಷದಲ್ಲಿ ಅಮೆರಿಕದ ಸಾಫ್ಟ್ವೇರ್ ಕಂಪನಿಯಾಂದನ್ನು ತನ್ನ ತೆಕ್ಕೆಗೊಳಪಡಿಸಿಕೊಳ್ಳಲು ನಿರ್ಧರಿಸಿದೆ. ಈ ನಿಟ್ಟಿನಲ್ಲಿ ಈಗಾಗಲೇ ನಾಲ್ಕೈದು ಅಮೆರಿಕನ್ ಸಾಫ್ಟ್ವೇರ್ ಕಂಪನಿಗಳ ಪಟ್ಟಿಯನ್ನೂ ತಯಾರಿಸಿದೆ.
ಭಾರತೀಯ ಕೈಗಾರಿಕೆಗಳ ಒಕ್ಕೂಟ (ಸಿಐಐ) ಏರ್ಪಡಿಸಿದ್ದ ವಿಚಾರ ಸಂಕಿರಣದಲ್ಲಿ ಭಾಗವಹಿಸಿದ್ದ ವಿಪ್ರೋದ ಅಧ್ಯಕ್ಷ ಅಜೀಂ ಪ್ರೇಂಜಿ ವಿಪ್ರೋದ ಜಾಗತಿಕ ವಿಸ್ತರಣೆಯ ವಿಷಯವನ್ನು ತಿಳಿಸಿದರು. ನಾವು ಕೆಲವು ಯುಎಸ್ ಕಂಪನಿಗಳನ್ನು ಖರೀದಿಸಲು ಉದ್ದೇಶಿಸಿದ್ದೇವೆ. ಈ ಬಗ್ಗೆ ಇತ್ತೀಚಿನ ತಿಂಗಳುಗಳಲ್ಲಿ ಮಾತುಕತೆಗಳೂ ನಡೆದಿವೆ ಎಂದು ಪ್ರೇಂಜಿ ಹೇಳಿದರು.
ಇತ್ತೀಚಿನ ದಿನಗಳಲ್ಲಿ ಇತರ ಕಂಪನಿಗಳನ್ನು ಮತ್ತೊಂದು ಕಂಪನಿ ಸ್ವಾಧೀನಕ್ಕೆ ತೆಗೆದುಕೊಳ್ಳುವ ಪ್ರಕ್ರಿಯೆ ದುಬಾರಿಯಾಗಿ ಪರಿಣಮಿಸಿರುವುದರಿಂದ, ನಾವು ಸಾಕಷ್ಟು ಮುನ್ನೆಚ್ಚರಿಕೆ ಕ್ರಮಗಳನ್ನು ಅನುಸರಿಸುತ್ತಿದ್ದೇವೆ, ಹಂತಹಂತವಾಗಿ ಮುಂದುವರಿಯುತ್ತಿದ್ದೇವೆ ಎಂದರು. ನಾವು ಈಗಲೂ ಭಾರತೀಯ ಕಂಪನಿಯಾಗಿಯೇ ಉಳಿದಿದ್ದೇವೆ. ನಮ್ಮ ಹಾಗೂ ಅಮೆರಿಕದ ಸಾಂಸ್ಕೃತಿಕ ಹಿನ್ನೆಲೆಗಳು ಭಿನ್ನವಾಗಿರುವ ವಿಷಯವೂ ನಮ್ಮ ಮುಂದಿದೆ ಎಂದು ಹೇಳುವ ಮೂಲಕ ಜಾಗತಿಕ ವಿಸ್ತರಣೆಯ ವಿಷಯ ಸಾಕಷ್ಟು ಜಟಿಲವಾದುದು ಎನ್ನುವ ಇಂಗಿತವನ್ನು ಪ್ರೇಂಜಿ ವ್ಯಕ್ತಪಡಿಸಿದರು.
(ಇನ್ಫೋ ವಾರ್ತೆ)
ವಾರ್ತಾಸಂಚಯ
ಮುಖಪುಟ
/
ಕರ್ನಾಟಕ
ಸಿಲಿಕಾನ್
ಕಣಿವೆ