ಕಡುವೈರಿ ದೇವೇಗೌಡರ ಭೆಟ್ಟಿಯಾಗಲು ಒಪ್ಪಿದರಾಮಕೃಷ್ಣ ಹೆಗಡೆ

ಬೆಂಗಳೂರು : ಮತ್ತೊಂದು ಮಹತ್ತರ ರಾಜಕೀಯ ಬೆಳವಣಿಗೆಗೆ ರಾಜ್ಯ ಸಜ್ಜಾಗಿದ್ದು , ಕಡು ರಾಜಕೀಯ ಎದುರಾಳಿ ಹಾಗೂ ಮಾಜಿ ಪ್ರಧಾನಿ ದೇವೇಗೌಡರನ್ನು ಭೇಟಿ ಮಾಡಲು ಮಾಜಿ ಮುಖ್ಯಮಂತ್ರಿ ರಾಮಕೃಷ್ಣ ಹೆಗಡೆ ಒಪ್ಪಿದ್ದಾರೆ. ಇದರಿಂದಾಗಿ, ಜಾತ್ಯತೀತ ಹಾಗೂ ಸಂಯುಕ್ತ ಜನತಾದಳಗಳು ಏಕಛತ್ರಿಯಡಿ ಸೇರುವ ಸಾಧ್ಯತೆ ಹೆಚ್ಚಾಗಿದೆ.

ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತಿದ್ದ ಸಂಯುಕ್ತ ಜನತಾದಳದ ರಾಜ್ಯಾಧ್ಯಕ್ಷ ಸಿ. ಭೈರೇಗೌಡ ಈ ವಿಷಯವನ್ನು ತಿಳಿಸಿದರು. ಇತರ ಇಬ್ಬರು ನಾಯಕರೊಂದಿಗೆ ಸೋಮವಾರ ಹೆಗಡೆ ಅವರನ್ನು ಭೇಟಿ ಮಾಡಿದಾಗ, ಅವರು ದೇವೇಗೌಡರನ್ನು ಭೇಟಿ ಮಾಡುವ ಸೂಚನೆ ನೀಡಿದರು. ಆದರೆ ಮಾತುಕತೆ ನಡೆಯುವ ಸ್ಥಳ ಹಾಗೂ ದಿನಾಂಕದ ಬಗೆಗೆ ಅವರು ಏನನ್ನೂ ಸೂಚಿಸಲಿಲ್ಲ ಎಂದು ಭೈರೇಗೌಡ ಹೇಳಿದರು.

ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಸಂಯುಕ್ತ ಜನತಾದಳದೊಂದಿಗೆ ಸಹಕರಿಸುವಂತೆ ತಮ್ಮ ಪಕ್ಷದ ಕಾರ್ಯಕರ್ತರಿಗೆ ದೇವೇಗೌಡ ನೀಡಿರುವ ಕರೆಯನ್ನು ಸ್ವಾಗತಿಸಿದ ಭೈರೇಗೌಡ, ಚುನಾವಣೆಗಳಲ್ಲಿ ಗೆಲುವು ಸಾಧಿಸುವ ಬಗೆಗೆ ವಿಶ್ವಾಸ ವ್ಯಕ್ತ ಪಡಿಸಿದರು. ಆರು ತಿಂಗಳಿಂದ ರಾಜ್ಯದಲ್ಲಿ ಅಭಿವೃದ್ಧಿ ಕಾಮಗಾರಿಗಳು ಸ್ಥಗಿತಗೊಂಡಿವೆ. ಮೊದಲಿಗೆ ವೀರಪ್ಪನ್‌ನಿಂದ ರಾಜ್‌ ಅಪಹರಣ , ಆನಂತರ ಎಐಸಿಸಿ ಅಧಿವೇಶನ ಅಭಿವೃದ್ಧಿ ಕಾಮಗಾರಿಗಳನ್ನು ಸ್ಥಗಿತಗೊಳಿಸಿದವು ಎಂದು ಆಪಾದಿಸಿದ ಅವರು, ಕಳೆದ ವರ್ಷದ ಬಜೆಟ್‌ ಪ್ರಸ್ತಾವನೆಗಳ ಫಲಿತಾಂಶದ ಬಗೆಗೆ ಶ್ವೇತಪತ್ರ ಪ್ರಕಟಿಸುವಂತೆ ಸರ್ಕಾರವನ್ನು ಆಗ್ರಹಿಸಿದರು.

(ಯುಎನ್‌ಐ)