ಕರ್ನಾಟಕ ತೆಹಲ್ಕಾ ಕೌಜಲಗಿ ರಾಜೀನಾಮೆ

ಬೆಂಗಳೂರು : ಮೂರು ವರ್ಷಗಳ ಹಿಂದೆ ಬೆಳಗಾವಿ ಜಿಲ್ಲಾ ಪಂಚಾಯಿತಿಯ ಗುತ್ತಿಗೆ ಕೊಡಿಸುವ ಸಂಬಂಧ ತಮ್ಮ ಪ್ರಭಾವ ಬೀರುವ ಭರವಸೆ ನೀಡಿ ಲಂಚ ಸ್ವೀಕರಿಸಿದ್ದರು ಎಂಬ ಆರೋಪಕ್ಕೆ ಗುರಿಯಾಗಿರುವ ಅಂದಿನ ಶಾಸಕ ಹಾಗೂ ಹಾಲಿ ಕರ್ನಾಟಕ ಪ್ರದೇಶ ಕಾಂಗ್ರೆಸ್‌ ಸಮಿತಿ ಅಧ್ಯಕ್ಷ ವಿ.ಎಸ್‌. ಕೌಜಲಗಿ ತಮ್ಮ ಅಧ್ಯಕ್ಷಗಿರಿಗೆ ರಾಜೀನಾಮೆ ನೀಡಿದ್ದಾರೆ.

ಕರ್ನಾಟಕದ ತೆಹಲ್ಕಾ ಹಗರಣ ಎಂದೇ ಖ್ಯಾತವಾಗಿರುವ ಈ ಪ್ರಕರಣದಲ್ಲೂ ಕೂಡ ಕೌಜಲಗಿ ಅವರು ಲಂಚ ಹಣ ಪಡೆದಿರುವುದಕ್ಕೆ ವಿಡಿಯೋ ಟೆಪ್‌ ಮುಖ್ಯ ಸಾಕ್ಷಿಯಾಗಿತ್ತು. ಕಳೆದ ಕೆಲವು ದಿನಗಳಿಂದಲೂ ಹೊಗೆಯಾಡುತ್ತಿದ್ದ ಈ ಹಗರಣ ಸಂಬಂಧದ ವಿಡಿಯೋದಲ್ಲಿರುವ ಚಿತ್ರಗಳನ್ನು ಕನ್ನಡದ ಪ್ರಮುಖ ದಿನಪತ್ರಿಕೆಯಾಂದು ಶನಿವಾರ ಪ್ರಕಟಿಸಿದ ಹಿನ್ನೆಲೆಯಲ್ಲಿ ಪ್ರಕರಣಕ್ಕೆ ಹೊಸ ತಿರುವು ಬಂದಿತ್ತು.

ಇದಕ್ಕೂ ಮುನ್ನ ವರಿಷ್ಠರ ಸೂಚನೆಯ ಮೇರೆಗೆ ದೆಹಲಿಗೆ ತೆರಳಿ ವರಿಷ್ಠರನ್ನು ಕಂಡು ನಗರಕ್ಕೆ ವಾಪನಾಗಿದ್ದ ಕೌಜಲಗಿ ಅವರು ತಾವು ನಿರಪರಾಧಿ ಎಂದು ಪದೇ ಪದೇ ಹೇಳಿಕೆ ನೀಡಿದ್ದಲ್ಲದೆ, ತಾವು ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡುವುದಿಲ್ಲ ಎಂದು ಪಟ್ಟು ಹಿಡಿದಿದ್ದರೆ, ಪ್ರತಿಪಕ್ಷಗಳ ಒತ್ತಡ ಹಾಗೂ ಪಕ್ಷದ ಒಳಗೇ ಉಂಟಾದ ಗೊಂದಲಗಳಿಂದಾಗಿ ತಾವು ರಾಜ್ಯದ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಅವರು ಕೈಗೊಳ್ಳುವ ಯಾವುದೇ ನಿರ್ಧಾರಕ್ಕೆ ತಾವು ಬದ್ಧ ಎಂದೂ ಪ್ರಕಟಿಸಿದರು.

ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಅವರು ಪಕ್ಷದ ವರ್ಚಸ್ಸು ಕಾಪಾಡುವ ಹಿನ್ನೆಲೆಯಲ್ಲಿ ಪಕ್ಷದ ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡುವಂತೆ ಕೌಜಲಗಿ ಅವರಿಗೆ ಸಕ್ಷಿೂಚನೆ ನೀಡಿದರು. ಈ ಎಲ್ಲ ಬೆಳವಣಿಗೆಯ ನಂತರ ವಿ.ಎಸ್‌. ಕೌಜಲಗಿ ಅವರು ಶನಿವಾರ ಮಧ್ಯಾಹ್ನ ಕೆ.ಪಿ.ಸಿ.ಸಿ. ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ಸಲ್ಲಿಸಿದರು. ಈ ಪತ್ರವನ್ನು ವರಿಷ್ಠ ಮಂಡಳಿಗೆ ಸಲ್ಲಿಸಲಾಗಿದೆ.
(ನಮ್ಮ ರಾಜಕೀಯ ಪ್ರತಿನಿಧಿಯಿಂದ)

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...