ಏಪ್ರಿಲ್‌ 4ರಂದು ರಾಜ್ಯದಲ್ಲಿ ನೀವು ಜವಳಿ ಖರೀದಿಸುವಂತಿಲ್ಲ!

ಬೆಂಗಳೂರು : ರಾಜ್ಯ ಬಜೆಟ್‌ನಲ್ಲಿ ಪ್ರವೇಶ ತೆರಿಗೆಯನ್ನು ಶೇಕಡಾ ಒಂದರಿಂದ ಎರಡಕ್ಕೆ ಏರಿಸಿರುವುದನ್ನು ವಿರೋಧಿಸಿ, ಸುಮಾರು ಹತ್ತು ಸಾವಿರಕ್ಕೂ ಹೆಚ್ಚು ದೊಡ್ಡ ಮತ್ತು ಮಧ್ಯಮ ಜವಳಿ ಉದ್ಯಮಗಳು ಬುಧವಾರ ಬಂದ್‌ ಆಚರಿಸಲು ನಿರ್ಧರಿಸಿವೆ.

ಬೆಂಗಳೂರಿನ ರಖಂ ಜವಳಿ ಮಾರಾಟಗಾರರ ಸಂಘದ ಅಧ್ಯಕ್ಷ ಮಾನಂಡಿ ಎನ್‌. ಸುರೇಶ್‌ ಈ ವಿಷಯವನ್ನು ಮಂಗಳವಾರ ಸುದ್ದಿಗಾರರಿಗೆ ತಿಳಿಸಿದರು. ರಾಜ್ಯದ ಜವಳಿ ಉದ್ಯಮ ಗಂಭೀರ ಸ್ಥಿತಿಯಲ್ಲಿರುವುದರಿಂದ ಸರಕಾರ ಪ್ರವೇಶ ತೆರಿಗೆಯನ್ನು ತೆಗೆದು ಹಾಕಬಹುದು ಎಂಬ ನಿರೀಕ್ಷೆಯಲ್ಲಿ ಜವಳಿ ಉದ್ಯಮವಿತ್ತು . ಆದರೆ ಸರಕಾರ ನಿರೀಕ್ಷೆಗೆ ಪ್ರತಿಕೂಲವಾಗಿ ವರ್ತಿಸಿದೆ ಎಂದರು.

ನೆರೆ ರಾಜ್ಯಗಳಲ್ಲಿ ಜವಳಿ ಉದ್ಯಮಕ್ಕೆ ಪ್ರವೇಶ ತೆರಿಗೆ ಇಲ್ಲ. ಆದರೆ ಕರ್ನಾಟಕದಲ್ಲಿ ಮಾತ್ರ ಈಗಾಗಲೇ ಇದ್ದ ಪ್ರವೇಶ ತೆರಿಗೆಯನ್ನು ದುಪ್ಪಟ್ಟುಗೊಳಿಸಲಾಗಿದೆ. ಇದನ್ನು ವಿರೋಧಿಸಿ ಬುಧವಾರ ರಾಜ್ಯಾದ್ಯಂತ ಬಂದ್‌ ಆಚರಿಸಲಾಗುವುದು ಅಲ್ಲದೆ, ಮುಖ್ಯಮಂತ್ರಿ ಎಸ್‌. ಎಂ. ಕೃಷ್ಣರಿಗೆ ಸಂಘವು ಮನವಿ ಪತ್ರವನ್ನು ಸಲ್ಲಿಸುವುದು ಎಂದು ಸುರೇಶ್‌ ಹೇಳಿದರು.

(ಯುಎನ್‌ಐ)