ಏಪ್ರಿಲ್‌ 5 ರಂದು ಬೆಂಗಳೂರಿನ ಎನ್‌ಡಿಎರ್ಯಾಲಿಗೆ ವಾಜಪೇಯಿ

ನವದೆಹಲಿ : ತೆಹಲ್ಕಾ ಬಹಿರಂಗಪಡಿಸಿದ ರಕ್ಷಣಾ ಅವ್ಯವಹಾರ ಕುರಿತಂತೆ ವಿರೋಧ ಪಕ್ಷಗಳ ಟೀಕೆಗಳಿಗೆ ಪ್ರತಿಯಾಗಿ ಹದಿನೈದು ದಿನಗಳ ಅಭಿಯಾನವೊಂದನ್ನು ರಾಷ್ಟ್ರೀಯ ಪ್ರಜಾ ಸತ್ತಾತ್ಮಕ ಒಕ್ಕೂಟ ಹಮ್ಮಿಕೊಂಡಿದೆ. ಏಪ್ರಿಲ್‌ ಐದರಂದು ಬೆಂಗಳೂರಿಗೆ ಆಗಮಿಸುವ ಅಭಿಯಾನವನ್ನು ಪ್ರಧಾನಿ ವಾಜಪೇಯಿ ಉದ್ದೇಶಿಸಿ ಮಾತನಾಡುವರು.

ಗ್ರಾಮೀಣಾಭಿವೃದ್ಧಿ ಸಚಿವ ವೆಂಕಯ್ಯನಾಯ್ಡು ಈ ವಿಷಯವನ್ನು ಸುದ್ದಿಗಾರರಿಗೆ ತಿಳಿಸಿದ್ದಾರೆ. ಸತ್ಯವನ್ನು ಜನರ ಬಳಿಗೆ ಕೊಂಡೊಯ್ಯುವ ಸಲುವಾಗಿ ಈ ರ್ಯಾಲಿಯನ್ನು ಹಮ್ಮಿಕೊಳ್ಳಲಾಗಿದ್ದು , ರ್ಯಾಲಿಯು ಏಪ್ರಿಲ್‌ ಒಂದರಂದು ಕೊಚ್ಚಿಯಲ್ಲಿ ಆರಂಭವಾಗಲಿದೆ ಎಂದರು.

ಕೊಚ್ಚಿಯಲ್ಲಿ ಗೃಹಮಂತ್ರಿ ಎಲ್‌.ಕೆ. ಅಡ್ವಾಣಿ , ಮಾಜಿ ರಕ್ಷಣಾ ಸಚಿವ ಜಾರ್ಜ್‌ ಫರ್ನಾಂಡಿಸ್‌ ಮತ್ತು ಕೇರಳದ ಎನ್‌ಡಿಎ ಮುಖಂಡರು ರ್ಯಾಲಿಯನ್ನು ಉದ್ದೇಶಿಸಿ ಮಾತನಾಡುವರು. ರ್ಯಾಲಿಯು ಏಪ್ರಿಲ್‌ 2ರಂದು ತಿರುಚನಾಪಳ್ಳಿ ಪ್ರವೇಶಿಸಲಿದ್ದು, ಅಡ್ವಾಣಿ, ಜಾರ್ಜ್‌ಫರ್ನಾಂಡಿಸ್‌ ಮತ್ತು ಬಿಜೆಪಿಯ ರಾಷ್ಟ್ರೀಯ ಅಧ್ಯಕ್ಷ ಜನಾ ಕೃಷ್ಣ ಮೂರ್ತಿ ಭಾಷಣ ಮಾಡುವರು.

ಎರಡು ದಿನಗಳ ಬಳಿಕ ರ್ಯಾಲಿಯು ಹೈದರಾಬಾದಿನಲ್ಲಿ ನಡೆಯಲಿದ್ದು, ಅಡ್ವಾಣಿ ಮತ್ತು ಫರ್ನಾಂಡಿಸ್‌ ಜೊತೆಗೆ ಆಂಧ್ರಪ್ರದೇಶದ ಎನ್‌ಡಿಎ ಮುಖಂಡರು ತೆಹಲ್ಕಾ ಬಗ್ಗೆ ಮಾತನಾಡುವರು. ಎನ್‌ಡಿಎ ಸಂಯೋಜನಾ ಸಮಿತಿಯ ಸಂಯೋಜಕ ಜಾರ್ಜ್‌ ಫರ್ನಾಂಡಿಸ್‌ ರ್ಯಾಲಿಯ ರೂಪು ರೇಷೆಯನ್ನು ನಿರ್ಧರಿಸುತ್ತಾರೆ ಎಂದು ವೆಂಕಯ್ಯ ನಾಯ್ಡು ಹೇಳಿದರು.

(ಇನ್ಫೋ ವಾರ್ತೆ)