ಕುದುರಿಕೊಂಡ ಆರೋಗ್ಯ, ಮನೆಗೆಮರಳಿದ ರಾಷ್ಟ್ರಪತಿ

ನವದೆಹಲಿ : ಪ್ರತಿಷ್ಠಿತ ಗಂಗಾರಾಂ ಆಸ್ಪತ್ರೆಯಲ್ಲಿ ಮೂತ್ರಕೋಶದ ಕಲ್ಲಿನ ನಿವಾರಣೆಯ ಶಸ್ತ್ರಚಿಕಿತ್ಸೆಗೊಳಗಾಗಿದ್ದ ರಾಷ್ಟ್ರಪತಿ ಕೆ.ಆರ್‌. ನಾರಾಯಣ್‌ ಅವರನ್ನು ಮೂರು ದಿನಗಳ ವೈದ್ಯಕೀಯ ಉಪಚಾರಗಳ ನಂತರ ಶನಿವಾರ ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಯಿತು.

ಬುಧವಾರ ಸಂಜೆ ಆಸ್ಪತ್ರೆಗೆ ದಾಖಲಾಗಿದ್ದ ನಾರಾಯಣ್‌ ಅವರಿಗೆ ಡಾ. ಪ್ರದೀಪ್‌ ಚೌಬೆ ನೇತೃತ್ವದ ವೈದ್ಯರ ತಂಡ ಗುರುವಾರ ಬೆಳಿಗ್ಗೆ ಯಶಸ್ವಿ ಶಸ್ತ್ರ ಚಿಕಿತ್ಸೆ ನಡೆಸಿತ್ತು . ಚಿಕಿತ್ಸೆಗೆ ಉತ್ತಮವಾಗಿ ಸ್ಪಂದಿಸಿದ್ದ ರಾಷ್ಟ್ರಪತಿಗಳು ಶುಕ್ರವಾರ ಸ್ವಲ್ಪ ಮಟ್ಟಿಗೆ ವಾಕ್‌ ಮಾಡುವಷ್ಟು ಹಾಗೂ ಲಘು ಉಪಾಹಾರ ಸೇವಿಸುವಷ್ಟು ಚೇತರಿಸಿಕೊಂಡಿದ್ದರು. ಉಪರಾಷ್ಟ್ರಪತಿ ಕೃಷ್ಣಕಾಂತ್‌ ಹಾಗೂ ಪ್ರಧಾನಿ ವಾಜಪೇಯಿ ಅವರು ಪುಷ್ಪಗುಚ್ಛ ಕಳುಹಿಸಿ ಶೀಘ್ರ ಚೇತರಿಸಿಕೊಳ್ಳುವಂತೆ ಹಾರೈಸಿದ್ದರು.

ಪ್ರಸ್ತುತ ನಾರಾಯಣ್‌ ಅವರು ಸಂಪೂರ್ಣ ಚೇತರಿಸಿಕೊಂಡಿರುವುದರಿಂದ ಅವರನ್ನು ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಗಿದೆ ಎಂದು ಆಸ್ಪತ್ರೆಯ ಮೂಲಗಳು ತಿಳಿಸಿವೆ. ಮೈಕ್ರೋ ಲ್ಯಾಫ್ರೋಸ್ಕೋಪಿಕ್‌ ವಿಧಾನದ ಮೂಲಕ ಅವರ ಮೂತ್ರಕೋಶದಲ್ಲಿನ ಕಲ್ಲುಗಳನ್ನು ಹೊರ ತೆಗೆಯಲಾಗಿದೆ.

(ಯುಎನ್‌ಐ)