ನಟ ವಾದಿರಾಜ್‌, ಶಿವಮೊಗ್ಗ ಸುಬ್ಬಣ್ಣ ಅವರಿಗೆ ಭಾರ್ಗವ ಪ್ರಶಸ್ತಿ

ಬೆಂಗಳೂರು : ಖ್ಯಾತ ಚಿತ್ರ ನಟ, ನಿರ್ದೇಶಕ ಯು.ಎಸ್‌. ವಾದಿರಾಜ್‌, ಗಾಯಕ ಶಿವಮೊಗ್ಗ ಸುಬ್ಬಣ್ಣ, ಪತ್ರಕರ್ತ ಕೆ. ಶ್ರೀಧರ ಆಚಾರ್‌, ಲೇಖಕಿ ವೈದೇಹಿ, ಯಕ್ಷಗಾನ ಕಲಾವಿದ ಕೋಳ್ಯೂರು ರಾಮಚಂದ್ರರಾವ್‌ ಸೇರಿದಂತೆ ಹತ್ತು ಜನರನ್ನು ದಕ್ಷಿಣ ಕನ್ನಡ ಕನ್ನಡಿಗರ ವೇದಿಕೆ ನೀಡುವ ಭಾರ್ಗವ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿದೆ.

ಈ ವಿಷಯವನ್ನು ವೇದಿಕೆಯ ಅಧ್ಯಕ್ಷ ಪುಂಡಲೀಕ ಹಾಲಂಬಿ ಬುಧವಾರ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು. ಬೆಂಗಳೂರಿನಲ್ಲಿರುವ ದಕ್ಷಿಣ ಕನ್ನಡ ಕನ್ನಡಿಗರ ವೇದಿಕೆ, ರಾಜಧಾನಿಗೆ ಬಂದು ನೆಲೆಸಿ, ವಿವಿಧ ಕ್ಷೇತ್ರದಲ್ಲಿ ಗಣನೀಯ ಸೇವೆ ಸಲ್ಲಿಸಿದ ಗಣ್ಯರಿಗೆ ಭಾರ್ಗವ ಪ್ರಶಸ್ತಿ ನೀಡಿ ಗೌರವಿಸುತ್ತಾ ಬಂದಿದೆ ಎಂದೂ ಅವರು ತಿಳಿಸಿದರು.

ಪ್ರಶಸ್ತಿ ಪ್ರದಾನ ಸಮಾರಂಭ ಏಪ್ರಿಲ್‌ 1ರ ಭಾನುವಾರ ಸಂಜೆ 4 ಗಂಟೆಗೆ ರವೀಂದ್ರ ಕಲಾಕ್ಷೇತ್ರದಲ್ಲಿ ನಡೆಯಲಿದೆ. ನಾಡಿನ ಹಿರಿಯ ಸಾಹಿತಿ, ವಿಮರ್ಶಕ ಡಾ. ಜಿ.ಎಸ್‌. ಶಿವರುದ್ರಪ್ಪ ಪ್ರಶಸ್ತಿ ಪ್ರದಾನ ಮಾಡಲಿದ್ದಾರೆ. ಮಾಜಿ ಮುಖ್ಯಮಂತ್ರಿ ವೀರಪ್ಪ ಮೊಯ್ಲಿ, ಶಾಸಕ ಕೆ. ಜಯಪ್ರಕಾಶ್‌ ಹೆಗ್ಡೆ, ಸಾ.ರಾ. ಗೋವಿಂದು ಅವರು ಮುಖ್ಯ ಅತಿಥಿಗಳಾಗಿ ಆಗಮಿಸಲಿದ್ದಾರೆ ಎಂದೂ ಅವರು ಹೇಳಿದರು.

ಪ್ರಶಸ್ತಿ ವಿಜೇತರು : ಕೆ. ಶ್ರೀಧರ ಆಚಾರ್‌ (ಪತ್ರಿಕೋದ್ಯಮ), ಕೆ. ಆನಂದ ಗಾಣಿಗ (ರಂಗಭೂಮಿ), ಯು.ಎಸ್‌. ವಾದಿರಾಜ್‌ (ಚಲನಚಿತ್ರ), ವೈದೇಹಿ (ಸಾಹಿತ್ಯ), ಪಿ. ಸದಾನಂದ ಮಯ್ಯ (ಉದ್ಯಮ), ಡಾ. ಎಚ್‌. ಸದಾಶಿವ ಹಂದೆ (ವೈದ್ಯಕೀಯ ವಿಜ್ಞಾನ), ಕೋಳ್ಯೂರು ರಾಮಚಂದ್ರರಾವ್‌ (ಯಕ್ಷಗಾನ), ಶಿವಮೊಗ್ಗ ಸುಬ್ಬಣ್ಣ (ಸುಗಮ ಸಂಗೀತ), ಎಚ್‌. ಸೀತಾರಾಮರಾವ್‌ (ಹೋಟೆಲ್‌ ಉದ್ಯಮ) ಹಾಗೂ ಎಂ.ಎಸ್‌. ಜನಾರ್ದನ ಕಾರಂತ (ಸಮಾಜ ಸೇವೆ).

ಪ್ರಶಸ್ತಿ ಪ್ರದಾನ ಕಾರ್ಯಕ್ರಮದ ನಂತರ ರಾಷ್ಟ್ರ ಪ್ರಶಸ್ತಿ ವಿಜೇತ ಕೆರೆಮನೆ ಶಂಭು ಹೆಗಡೆ ಹಾಗೂ ರಾಜ್ಯ ಪ್ರಶಸ್ತಿ ವಿಜೇತ ನೆಬ್ಬೂರು ಭಾಗವತರನ್ನೊಳಗೊಂಡ ಇಡುಗುಂಜಿ ಮೇಳದವರಿಂದ ಕಾರ್ತವೀರ್ಯಾರ್ಜುನ ಕಾಳಗ ಯಕ್ಷಗಾನ ಬಯಲಾಟವನ್ನು ಸಹ ಏರ್ಪಡಿಸಲಾಗಿದೆ.

(ಇನ್ಫೋ ವರದಿ)