ಬಿರುಸಾಗುತ್ತಿದೆ ಬಿಸಿಲು

ಬೆಂಗಳೂರು : ಬೆಂಗಳೂರಲ್ಲಿ ಕಳೆದ ಮೂರ್ನಾಲ್ಕು ದಿನದಿಂದಲೂ ದಿನದ ಗರಿಷ್ಠ ಉಷ್ಣಾಂಶ 36 ಡಿಗ್ರಿ ಆಸುಪಾಸಿನಲ್ಲೇ ಇದೆ. ಬಿಸಿಲು ಬಿರುಸಾಗಿದೆ. ನೆಲವೆಲ್ಲಾ ಕಾದು ಕೆಂಪಾಗಿದೆ. ಅಸಹನೀಯ ಧಗೆ. ಬೆಂಗಳೂರಿನ ಈಜುಕೊಳಗಳ ಮುಂದೆ ಮೈಲುಗಟ್ಟಲೆ ಕ್ಯೂ ಇದೆ. ತಂಪುಪಾನೀಯ ಮಾರುವ ಅಂಗಡಿಗಳ ಮುಂದೆ ಜನಜಂಗುಳಿ.

ರಾಜ್ಯದ ನದಿಗಳು, ನೀರಿರುವ ಕೆರೆಗಳು ಬಾವಿಗಳಲ್ಲಿ ಈಜುವವರ ಸಂಖ್ಯೆಯೂ ಹೆಚ್ಚಿದೆ. ಎಲ್ಲಾ ಸೂರ್ಯ ಮಹಿಮೆ. ಕಳೆದ 24 ಗಂಟೆಗಳ ಅವಧಿಯಲ್ಲಿ ರಾಜ್ಯದಲ್ಲಿ ಮತ್ತದೇ ಒಣಹವೆ. ಗರಿಷ್ಠ ತಾಪಮಾನ ಕೆಲವೆಡೆ ಕುಸಿದಿದ್ದರೆ, ಮತ್ತೆ ಕೆಲವೆಡೆ ಅಲ್ಪ ಪ್ರಮಾಣದಲ್ಲಿ ಏರಿದೆ. ಇನ್ನು ಕೆಲವೆಡೆ ಸಾಮಾನ್ಯ ಮಟ್ಟದಲ್ಲೇ ಇತ್ತು. ಕನಿಷ್ಠ ಉಷ್ಣಾಂಶ ಕೂಡ ಬಹುತೇಕ ಇದೇ ಜಾಡನ್ನೇ ಅನುಸರಿಸಿತ್ತು.

ರಾಜ್ಯದ ಅತಿಹೆಚ್ಚಿನ ತಾಪಮಾನ ಯಥಾಪ್ರಕಾರ ರಾಯಚೂರಿನಲ್ಲಿ 40.6 ಡಿಗ್ರಿ ಸೆಲ್ಸಿಯಸ್‌ ಹಾಗೂ ಕನಿಷ್ಠ ಬೆಳಗಾವಿ ವಿಮಾನ ನಿಲ್ದಾಣದಲ್ಲಿ 18.2 ಡಿಗ್ರಿ ಸೆಲ್ಸಿಯಸ್‌ ದಾಖಲಾಗಿತ್ತು. ಗುರುವಾರ ಬೆಳಗ್ಗೆ ವರೆಗಿನ ಮುನ್ಸೂಚನೆಯಂತೆ ರಾಜ್ಯದಲ್ಲಿ ಮುಖ್ಯವಾಗಿ ಒಣಹವೆಯೇ ಮುಂದುವರಿಯಲಿದೆ. ಯಾವುದೇ ಗಮನಾರ್ಹ ಬದಲಾವಣೆ ಕಂಡುಬರುವ ಸಾಧ್ಯತೆ ಇಲ್ಲ ಎನ್ನುತ್ತದೆ ಹವಾಮಾನ ಇಲಾಖೆ.

ಬೆಂಗಳೂರು ಹಾಗೂ ಸುತ್ತಮುತ್ತಲ ಪ್ರದೇಶಗಳಲ್ಲಿ ಭಾಗಶಃ ಮೋಡ ಕವಿದ ವಾತಾವರಣ ಇದ್ದು, ಗರಿಷ್ಠ ಉಷ್ಣಾಂಶ 36 ಹಾಗೂ ಕನಿಷ್ಠ ಉಷ್ಣಾಂಶ 21 ಡಿಗ್ರಿ ಸೆಲ್ಸಿಯಸ್‌ ಇರುವ ಸಾಧ್ಯತೆ ಇದೆ.