ಬೆಳಗಾವಿ ತಾಂತ್ರಿಕ ವಿವಿ ಕುಲಪತಿಯಾಗಿ ಡಾ.ಕೆ. ಬಲವೀರ ರೆಡ್ಡಿ

ಬೆಂಗಳೂರು : ರಾಜ್ಯದ ಏಕೈಕ ತಾಂತ್ರಿಕ ವಿಶ್ವ ವಿದ್ಯಾಲಯ ಅನ್ನುವ ಅಗ್ಗಳಿಕೆಗೆ ಪಾತ್ರವಾದ ಬೆಳಗಾವಿಯ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವ ವಿದ್ಯಾಲಯದ ಕುಲಪತಿಯಾಗಿ ಡಾ.ಕೆ. ಬಲವೀರ ರೆಡ್ಡಿ ಅವರನ್ನು ನೇಮಿಸಲಾಗಿದೆ.

ಏಪ್ರಿಲ್‌ 1, 2001 ರಿಂದ ಅನ್ವಯವಾಗುವಂತೆ ಬಲವೀರ ರೆಡ್ಡಿ ಅವರನ್ನು ತಾಂತ್ರಿಕ ವಿವಿ ಕುಲಪತಿಗಳಾಗಿ ನೇಮಿಸಿರುವ ಆದೇಶವನ್ನು ಕರ್ನಾಟಕದ ವಿಶ್ವ ವಿದ್ಯಾನಿಲಯಗಳ ಕುಲಾಧಿಪತಿಗಳಾದ ರಾಜ್ಯಪಾಲೆ ವಿ.ಎಸ್‌. ರಮಾದೇವಿ ಹೊರಡಿಸಿದ್ದಾರೆ ಎಂದು ರಾಜಭವನದ ಪ್ರಕಟಣೆ ತಿಳಿಸಿದೆ. ಮಾರ್ಚ್‌ 31 ಕ್ಕೆ ಎಸ್‌.ರಾಜಶೇಖರಯ್ಯ ಅವರು ತೆರವು ಮಾಡುವ ಸ್ಥಾನವನ್ನು ರೆಡ್ಡಿ ತುಂಬಲಿದ್ದಾರೆ.

ಪ್ರಸ್ತುತ ತಾಂತ್ರಿಕ ಶಿಕ್ಷಣ ಮಂಡಳಿಯ ನಿರ್ದೇಶಕರಾಗಿ ಬಲವೀರ ರೆಡ್ಡಿ ಅವರು ಕಾರ್ಯ ನಿರ್ವಹಿಸುತ್ತಿದ್ದಾರೆ. ಅವರು ಹೊಸದಾಗಿ ಅಲಂಕರಿಸುವ ತಾಂತ್ರಿಕ ವಿವಿ ಕುಲಪತಿ ಅವಧಿ ಮೂರು ವರ್ಷದ್ದಾಗಿದೆ.

(ಇನ್ಫೋ ವಾರ್ತೆ)