ಸುರಿಯುತ್ತಿದೆ ಬಿಸಿಲು, ಬೀಳುತ್ತಿಲ್ಲ ಮಳೆ

ಬೆಂಗಳೂರು : ವಿಕ್ರಮ ನಾಮ ಸಂವತ್ಸರ ಕಳೆದು, ವಿಷು ನಾಮ ಸಂವತ್ಸರ ಬಂದಿದೆ. ಕಲಿಯುಗದ ಇನ್ನೂ ಒಂದು ವರ್ಷ ಉರುಳಿದೆ. ಅಂದರೆ, ಕೃತಯುಗಕ್ಕೆ ನಾವು ಮತ್ತೊಂದು ವರ್ಷ ಹತ್ತಿರವಾದೆವು ಎಂದೇ ಅರ್ಥ ತಾನೆ. ಹೊಸ ವರುಷದ ಹುರುಪಿನಲ್ಲಿ ಚಿಗುರಿದ ಮಾವಿನ ಮರದಲ್ಲಿ ಅಡಗಿ ಕೋಗಿಲೆಗಳು ಪಂಚಮಸ್ವರದಿ ಕೂಗುತ್ತಿವೆ.

ವಸಂತ ಸಂಭ್ರಮದೊಂದಿಗೆ ಆಗಮಿಸಿದ್ದಾನೆ. ಚೈತ್ರದ ಹಿಗ್ಗು ಎಲ್ಲೆಡೆ ಹಬ್ಬಿದೆ. ಎಲ್ಲರ ಮನೆಯ ಮುಂದೂ ತೋರಣವಾಗಿ ಮಾವಿನ ಚಿಗುರು ರಾರಾಜಿಸುತ್ತಿದೆ. ಚೈತ್ರ ಮಾಸದ ಮೊದಲ ದಿನವಾದ ಭಾನುವಾರ ಬಿಸಿಲು ಸುಡುತ್ತಿತ್ತು. ಸೂರ್ಯ ಶಾಖದಿಂದ ಕಾದ ಕಪ್ಪು ಬಣ್ಣದ ಟಾರು ರಸ್ತೆಯಿಂದ ಬೇಸಿಗೆಯ ಕಾವು ಮುಖಕ್ಕೇ ರಾಚುತ್ತಿತ್ತು.

ಸಾಮಾನ್ಯವಾಗಿ ಯುಗಾದಿಯ ದಿನ ಒಂದೆರಡು ಹನಿ ಮಳೆ ಬಿದ್ದೇ ಬೀಳುತ್ತದೆ ಎಂದು ಹಿರಿಯರು ಹೇಳುತ್ತಿದ್ದರಾದರೂ, ಬೆಂಗಳೂರಲ್ಲಿ ಮಳೆ ಆಗಲಿಲ್ಲ. ರಾಜ್ಯದ ಇತರೆ ಭಾಗದಲ್ಲೂ ಮಳೆ ಬಿದ್ದ ಬಗ್ಗೆ ವರದಿ ಬಂದಿಲ್ಲ. ಈ ಮಧ್ಯೆ ರಾಜ್ಯದಲ್ಲಿ ಒಣಹವೆ ಮುಂದುವರಿದಿದೆ. ಉತ್ತರ ಒಳನಾಡಿನಲ್ಲಿ ಹಾಗೂ ಕರಾವಳಿಯಲ್ಲಿ ಗರಿಷ್ಠ ತಾಪಮಾನ ಸ್ವಲ್ಪ ಏರಿತ್ತು. ಎಲ್ಲೆಡೆ ಬಿಸಿಲೇ ಸುರಿಯುತ್ತಿದೆ.

ದಕ್ಷಿಣ ಒಳನಾಡಿನಲ್ಲಿ ಸಾಮಾನ್ಯ ಮಟ್ಟದಲ್ಲಿತ್ತು. ದಕ್ಷಿಣ ಒಳನಾಡಿನ ಕೆಲವೆಡೆ ಕನಿಷ್ಠ ಉಷ್ಣಾಂಶ ಕಡಿಮೆ ಆಗಿತ್ತು. ರಾಜ್ಯದ ಅತಿ ಹೆಚ್ಚು ತಾಪಮಾನ ರಾಯಚೂರಿನಲ್ಲಿ 40.6 ಡಿಗ್ರಿ ಸೆಲ್ಸಿಯಸ್‌ ದಾಖಲಾಗಿದ್ದರೆ, ಕನಿಷ್ಠ ತಾಪಮಾನ 15.2 ಡಿಗ್ರಿ ಸೆಲ್ಸಿಯಸ್‌ ಬೆಳಗಾವಿಯಲ್ಲಿತ್ತು.

ಮುನ್ಸೂಚನೆಯ ರೀತ್ಯ ರಾಜ್ಯದಲ್ಲಿ ಒಣಹವೆ ಇರಲಿದೆ. ಬೆಂಗಳೂರು ಹಾಗೂ ಸುತ್ತಮುತ್ತಲ ಪ್ರದೇಶಗಳಲ್ಲಿ ಶುಭ್ರ ಆಕಾಶ ಇದ್ದು, ಕನಿಷ್ಠ ತಾಪಮಾನ 21 ಡಿಗ್ರಿ ಸೆಲ್ಸಿಯಸ್‌ ಇರಲಿದೆ ಎಂದಿದೆ ಹವಾಮಾನ ವೀಕ್ಷಣಾಲಯದ ವರದಿ.